Mirūlö 3

Achīö Ang Yēsū Kristū?

Kūö yòh ang Yēsū nö kaheūkö nö kūön ngam Tēv nö “lanòh”? (1)

Kūö yòh ang nö kaheūkö nö “ngam Ṙô”? (1)

Kūö yòh ang Yēsū nö yih nö ing panam nö sā tarik? (2-4)

Kūö yòh ök nö hameuktö nuk la-en pinngangkūö? (5)

Asuh nup min la-en Yēsū inup yamih ṙētak? (6)

1. Iyöng el halīöngö ön sin misī Yēsū nö alaha tö alaha ma-alaha urĕhĕkūö ò nö yih nö ing panam. Anga-aṅ an raneh nö vahī ngam Tēv, lökten an inrē nö kaheūkö nö “lanòh” nö kūön ngam Tēv. (Kòlòsī 1:15; Inmeukhömat 3:14) Höng Yēsū an töng hĕngtak nö kūön ngam Tēv nö vahī ò takò nö kôten. Anga-aṅ an misī holṙen Yāvē nö ‘yöngkūö töheuveū-en i la-en’ nö vīlö në taṙòkhöre chehen el halīöngö ing panam inrē. (Inchōḵoṙô 8:22-31; Kòlòsī 1:16, 17) Vīten ò anga-aṅ inrē nö ṙamônyö nup ṙô ò. Lökten an Yēsū nö kaheūkö nö “ngam Ṙô.”—Yôhan 1:1-3; Inmeukhömat 19:13.

2. Tīntö ngam kūön re ngam Tēv nö ing panam i kinëtö ò nö ellōn Mariā nö lökten i kumlēḵ ò. Lökten ök Yēsū nö öt yöng tö tarik. Angu-ö lökngen ò nö öt aṅ-havin tö tökööl hēk ötlanöökö inrē. Lūöi nup chööḵnyö Yēsū nö yih nö ing panam: (1) Ameūkö ngam kanô-en inlaha ngam Tēv (Yôhan 18:37), (2) Ṙapkö ngam tökô-en lanënöre hēk ṙā-akūö hī tö inchōten pò hī hōtu tömköröön ò (1 Pitör 2:21), hēk (3) Kamëtö nômöre nö ṙāi ṙinānyö hī ṙa-ang im tökööl töm kinpaha inrē. Kūö yòh anu-ö nö tö hòṅ ngatī?—Mëtiv 20:28.

3. Lökten i inhôngen chööngö ngam Tēv, ök raneh tarik, Ātöm, nö fukngö nö im ṙô ngam töhet līpöre “tökööl.” Lökten ngam Tēv nö reushen ò töm kinpāha. (Ranehlö 3:17-19) Öt timtörekūö ngaich anga-aṅ nö haṙongtu nö im Tēv, öt köp anga-aṅ nö im hanëtö re. Hiṙeūtkö röön re ngaich anga-aṅ nö köiny ngaich kapah. Ṙòkhöre kahë-ekūö ngaich Ātöm töm tökööl nö in yip kūön re. Lökten in ayī-ö inrē köinyngö, vahavö ngaich kapah inrē. Sitih inlahen uvöh min taṙòkhöre tarik nö hayöökaṙen?—Rōma 3:23; 5:12.

 4. Töhet ök misī Yēsū nö tarik nö sā Ātöm. Öt sā inlahen Ātöm pöri anga-aṅ, pò Yēsū nö het, kô-en inrē nö hang chööngö ngam Tēv yĕn pòrò nup kinlaha nö pōyen. Lökten ök nö tökô-òre nö kēngö nômö re nö ṙāi tökööl Ātöm. Ngam ṙô ngam töhet līpöre, “ṙāi ṙinānyi.” Angu-ö an lökten më kūön Ātöm nö mihôiṅ nö teūngen tö ṙinānyöre nö ṙa-ang im öt inkôlô im kinpaha. Ṙòkhöre yip töng ṙamātö-ellōn re nö in Yēsū nö mihôiṅ nö teūngen tö inṙĕ-ĕl tökööl re ngaich teūngen inrē nö nômuvö töm tö örheuheū-aṅ.—1 Timòtī 2:5, 6; Yôhan 3:16; Rōma 5:18, 19.

5. Ik hē Yēsū misī nö ing panam, halanken yik tövahavö anga-aṅ, hanëlö yik tö aheuk hēk ṙaptö chanôichö inrē. Hĕnghöre hachohlö tökapah inrē. Kūö yòh ök nö ngatī hameukti tö pinngangkūö? (1) Pòn aṙĕ-ĕvlōn tö tarik nö kihngen, ngaich hòṅ hayööken cha anga-aṅ. (2) Hameuktu anga-aṅ nö in minë la-en re pinngangkūö tö ò nö kūön ngam Tēv. (3) Tö hameuktu nun nö inlaha tī ò min yēḵ ò nö hayöng nö ing panam nö lumnööṙö yip tölöök tarik.—Mëtiv 14:14; Mākös 2:10-12; Yôhan 5:28, 29.

6. Kapah hë Yēsū ngaich hachohlöngö tö ngam Tēv nö im ma-alaha, ngaich havanlöre anga-aṅ nö chuh el halīöngö. (1 Pitör 3:18) Unôichrit në, ngam Tēv nö vīlen ò nö Rācha. Ötvīngen öp min Yēsū nö kēngö në öt lanöökö tö në kanihngen inrē nö ṙòkhöre nö ṙa-ang ikūö ngih panam.—Salmai 37:9-11; Inchōḵoṙô 2:21, 22.

[Kepsön el ngam pēch 7]

Tumkangen la-en Yēsū haköphöti, hameuktö pinngangkūö, anë inrē kēngö nômöre tö pôkūö hī