Mirūlö 6

Asuh Öng Ngam Pūlngö Ngam Tēv?

Kamtö yih chūök öng ngam Pūlngö ngam Tēv? (1)

Achīö ap Rācha e? (2)

Holṙen ngam Rācha yip min tahëng tarik nö im inyööngö? Yĕn ngatī, iṙôken yip? (3)

Asuh nup mahameukten hī ngaich ing mana-aṅ sakāmö? (4)

Asuh nup min la-en ngam Pūlngö ngam Tēv lumnööṙö taṙòkhöre tarik? (5-7)

1. Ik hē ò misī nö ing panam, hachōtô yik haköptöre Yēsū nö vë-ekūötēv nö havëkö ngam Pūlngö ngam Tēv. Inyööngö an ngam Pūlngö nö töhĕng tak mahayöngken tö Rācha. Töt insā-av an nö inyööngö ngam pūlngö ngam Tēv. El halīöngö an nö asöklöng tö ò ngaich hayöng min nö ing panam. Angu-ö min ma-ahetlö, hēk töhëtö tī, töm minë-eny ngam Tēv. Teungtökūö min nup lōn ngam Tēv nö ing panam nö sā nup lōn ò ngaich nö el halīöngö.—Mëtiv 6:9, 10.

2. Kinlēḵngô ngam Tēv an Yēsū nö Rācha ngam pūlngö ò min. (Lūkös 1:30-33) Hē Yēsū misī nö ing panam, hameuktö re anga-aṅ nö tö aṙĕ-ĕlōn, tö aheūkölōn, töṙong hēk töteung inrē nö mahayöng. Im invanlö ò nö chuh el halīöngö, öt ilööṙen anga-aṅ nö haūichlöngö nö Racha nö im pūlngö ngam Tēv. (Heprāi 10:12, 13) Ik samyeūheu tö 1914, möl Yēsū nö kĕ-ĕvkūö tö Yāvē töm inyööngö sā ngam kinlēḵngô Ò. Hēten tö e ngaich Yēsū nö hayöng nö el halīöngö nö tö vīlöngö nö Rācha tö Yāvē.—Tanīël 7:13, 14.

3. Katöllö tö akaha tarik kikōnyö kikānö inrē ang Yāvē nö ṙa-ang ing panam nö chamuh el halīöngö. Holṙen ngam Rācha Yēsū min cha-a nö hayöng nö kamhòṅka, hēk Mākūö kūönṙô inrē nö i kui taṙòkhöre tarik. (Lūkös 22:28-30; Inmeukhömat 5:9, 10) “Tökūön Kiteūm” invëka yin tö Yēsū vē hol ò nö hayöng nö im pūlngö. 144,000 ṙôken yin.—Lūkös 12:32; Inmeukhömat 14:1-3.

4. Ilööṙen unôichrit anūichlö Yēsū nö Racha, suktö ngam Sī-ö anga-aṅ tö yip ma-ahānga ò inrē nö ṙa-ang el halīöngö nö chuh in në panam. Töp lökten ngih panam ngaich nö ötkôlò nö löktö kūö ik samyeūheu tö 1914. (Inmeukhömat 12:9, 12) Kinyūngö, inyāichö, lanëlngö, sanīöpö në ötlanöökö inrē—nö anu-ö  “minkahngö” tö Yēsū nö hayöng, tö hī inrē ing manā-aṅ sakāmö.—Mëtiv 24:3, 7, 8, 12; Lūkös 21:10, 11; 2 Timòtī 3:1-5.

5. Ngaich an min Yēsū nö kahòkken tarik, ngaich harēvö cha sātī ap yōm pöököre nö harēvngö nup sīöṅp nö ṙa-ang inup pöököre. “Sīöṅp” ngö ṙô in tö cha yip mahameuktöre nö tö akaha nö lamök lōn Ò. Ngaich teūngen min cha-a tö ngam nômö tö-örheuheū-aṅ nö i kūö ngih panam. Acha-a yip “pöököre” yip samò-ò ngam pūlngö ngam Tēv. (Mëtiv 25:31-34, 46) Öt ṙòktörevöṙen min Yēsū nö ahetngen yip tarik tö sā pöököre tö sō nö hayōmkaṙen. (2 Tösalònikē 1:6-9) Lökten yēḵ meh hòṅ kaheukhöt re inup “sīöṅp,” Yēsū ötkò me-eṅ öt hang ngam tölöök inhāṅnga hēk kēkö kaha nup haköp re inrē.—Mëtiv 24:14.

6. Ngaich ön töngamuh ngih panam nö ṙōltit kamnāichö, ṙōl pumnāmö inrē. Kö aṅhav in nun minë panam tö mahayöngken re. Örheūheu nun në panam nöng kiyūngö höö. Hachūök tö chūök minë inyööngö pöri min ngam pūlngö ngam Tēv. Höng angu-ö an inyööngö mahayöng min nö keuheūtngöre chūök nö örheūheu nö ikui ngih tumlat. (Tanīël 2:44) Öt ōtngöre min kinyūngö, öt lanöökö, tinṙōlen inrē. Ṙòkhöre min tarik nö iyöng im hinëngö, lanāmö inrē.—Maika 4:3, 4.

7. In minë tö hĕngköiny samyeūheu rò-òten Yēsū nö hayöng, ngaich ṙòkhöre yip tölöök tarik min nö chuh im chaniplen, ngaich keuheūtngöre chūök min ngih panam nö peretais. I mana-angrit minë tö 1,000 samyeūheu, keuheūten min ngaich Yēsū tö nup la-en kinë-ekūö ò tö ngam Tēv. Ngaich kētu min ngam inyööngö nö eltī ngam Yöng Ò. (1 Kòrin 15:24) Hö-ö öm rih hòṅ vë-eny nang yip hanāngenlōn holre tö nup la-en ngam pūlngö ngam Tēv min?

[Kepsön el ngam pēch 13]

El katòh ngam inyööngö tö Yēsū, öt ōttit min sunrīkhö tö nup tinutkö fālen inrē