Mirūlö 12

Hameuktö Minlēḵṙen Re Töm Nômö Töm Mahām Inrē

Hòṅ sitih mat öi ngëṅchkö ngam nômö? (1) Tinṙōlhang? (1)

Hòṅ sitih inlahen aich vē kristīön nö lakngö yanīhi pinlāngen? (2)

Tövaich öng ngih finëlngö töṙeūla? (3)

Nup yòh nup la-en mahameukten hī öt milēḵ töm nômö? (4)

Asuh ap chööngö ngam Tēv nö kakkö ngam mahām? (5)

Kakkö kinëhöt mahām öng inrē ngam chööngö? (6)

1. Yāvē an löklö nômö. Ṙòkhöre nun në tö aṅ chehen nö lökngörit im Tēv. (Salmai 36:9) Töhet nun në nômö nö im Tēv. Pòrô ngam nômö ngam nyīö tö öl nö fötnyu töm yöngre nö töpōiṙāi nö i mat Yāvē. Tövaich an ngam tinṙōlngö sanīöpö ngam nyīö më-ellōn yöng re nö i mat ngam Tēv yĕn tööliṙen.—Maneutnyi 21:22, 23; Salmai 127:3.

2. Pōi milak yin vē tökô-en kristīön nö lak yanīhi pinlāngen. Örheūheu yin nö haṙūötken minë inröl re tö minë patī cha inrē hòṅ cha nö öt lökngen in u nö pala-aiṙen. (I.Chööngö 22:8) Hö-ö yin vē tarik ngam Tēv nö vī minyam re tö nup tö mihôiṅ nö pala-aiṙen tī töm nômö. Lökten yin nö öt hanòlhötre nö i nup minnyāmö tö hòṅ pala-aiṙen tī tö tarik. Lāköre yin tö nup inṙamlōn nup lök lö sanīöpö chanökhuṙen.—Salmai 11:5; Yôhān 13:35.

3. Töhet nun inrē minë nômö töṙeūla nö imat ngam vamīlen hī.  Mihôiṅ ön ngòh kristīön tarik nö fëlngö töṙeūla nöng chöö-öny tö ngam nyina-avkūö hēk hinlāṙö tö ngam lināköre tö nup invah hēk kanihngen inrē. (Ranehlö 3:21; 9:3; Maneutnyi 21:28) Öt kô pöri ngam töṙeūla nöng ötlēkaṙen hēk fëli nöng chööḵnyö tö kinëken minnyāmö hēk inṙamlōn.—Inchōḵoṙô 12:10.

4. Hö-ö an ngam pinôpö, kinṙūpö tisā-a, hēk töm inpōho töm töhiyōihukūö nö la-en ngòh kristīön tarik. Tövaich nun anu-ö nö la-en pò u (1) nö vīten hī kūön kūö u, (2) Pala-aiṙen tī tö në alaha hī hēk (3) Öthet nun inrē. (Rōma 6:19; 12:1; 2 Kòrin 7:1) Kihngen man min lohten ṙa-angkūö re nya-avkūö tö u. Yēḵ hī pöri hòṅ haṙamlōn Yāvē ngaich hòṅ ṙa-ang kūöre ayī-ö nya-avkūö tö u.

5. Töhet an inrē ngam mahām nö i mat ngam Tēv. Ngöṙô an ngam Tēv tö ngam nômö nö im mahām. Lökten in öt kô kāḵ mahām. Tövaich an inrē ngam kinā-aṅ alaha yĕn öt keuheūtnyöre inreūnyi ngam mahām. Yēḵ ngam töṙeūla nö hanlöinyhang likeun hēk yĕn höng kapah nö el tinngöp, öt kô anga-aṅ nö ka-a tö hī. Yēḵ ò nö tāmö hēk hareūlö, hòṅ ilöö hareūnyu ngam mahām urĕhĕkūö kina-aṅ ò.—Ranehlö 9:3, 4; La-en Lēvī 17:13, 14; Inlahen 15:28, 29.

6. Vaich öng yĕi hō-o ngam kinëhöt mahām? Kööpölōn, hōtu in ṙūöhöngre töm mahām tö Yāvē. Töngö manah tö hī öt kô kēhöt mahām tahëng nö el alaha re hēk yĕn pòrô nö mahām hī nö tö hachūöki. (Inlahen 21:25) Lökten yin vē tökô-en kristīön nö öt hō nö kēhötvö mahām. Hō-o minë tahëng yin talöökö tī lame-en, tö sā minë lane-en töt hōlu tö mahām. Hòṅ aṅ yin, öt hō pöri min cha-a nö chöö-öny töm nômö re nö filal chööngö ngam Tēv.—Mëtiv 16:25.

[Kepsön el ngam pēch 25]

Yĕm hòṅ haṙamlōn ngam Tēv, Lāköre tömkinëhöt mahām Tö thet la-en hēk Töt akahtuṙen pinlāngen