Mirūlö 8

Ngam Mikūönö Töṙāmölōn Tī Tö Ngam Tēv

Asuh ap kamtö ngam kikōnyö töpihövö nö el ngam mikūönö? (1)

Hòṅ sitih inlaha ang ngam kikōnyö nö haṙūötken ngam pīhöre? (2)

Āmkangen nup la-en hayōmken ngam kikōnyö nö el ngam mikūönö? (3)

Asuh nup la-en ngam kikānö nö el ngam Mikūönö? (4)

Asuh nup lōn ngam Tēv nö in hī öi inyööngö hēk i nyīö inrē? (5)

Asuh nup inlēnö hī töm töhet līpöre yēḵ hī harēvngöre hēk yēḵ hī ṙāngö pihöre inrē? (6, 7)

1. Kui ngam mikūönö re an ngam kikōnyö tö pihövö tö ṙô ngam töhet līpöre. (1 Kòrin 11:3) Töng hòṅ hĕnglö an tö pihöre. Tö hòṅ vāyö inlahen an nö kēḵ ngam pinīhö nö asā ngam chööngö.—1 Timòtī 3:2; Taitös 3:1.

2. Hōtu an ngam kikōnyö töpihövö nö hangenlōn töm pihöre nö sā re tö re. Hòṅ haṙūötken ò anga-aṅ sā Yēsū nö iyik haköptöre. (Efisös 5:25, 28, 29) Sōtu an nö kësen nö in ò hēk sōtu nö ötlēken ngam pihöre nö i tökeuheūttöre. Hōtu pöri, nö hameuktö minlēḵṙen re nö im pihöre.—Kòlòsī 3:19; 1 Pitör 3:7.

3. Hōtu ön ngòh inyööngö kikōnyö nö tö ṙūötökūö nö la-evṙen nö chöö-öny töm mikūönö re. I kinëtö nya-aṅkūö, hinlāṙö hēk mānlö patī ngam pihöre tö më kūön cha inrē. Tumkangen minë la-en hayōmken ngam kikōnyö an inrē ngam inköptö ngam ṙô ngam Tēv nö el ngam mikūönö. (1 Timòtī 5:8) Anga-aṅ an mahachōḵröön ngam mikūönö nö i inkööpö inlahen ngam Tēv tö nup chööngö ò inrē.—I.Chööngö 6:4-9; Efisös 6:4.

4. Hòṅ hamòlṙen ngam kikōnyö an ngam kikānö töpihövö. (Ranehlö 2:18) Hòṅ holṙen ngam pihöre anga-aṅ nö i inköptö më nyīö hēk inrūnö cha inrē nö im mikah. (Inchōḵoṙô 1:8) Lōn Yāvē an inrē tö ngam kikānö töpihövö nö hol tö hanāngenlōn re nö chumkūöken ngam mikūönö. (Inchōḵoṙô 31:10, 15, 26, 27; Taitös 2:4, 5) Hòṅ kirööngö minlēḵṙen an töm pihöre.—Efisös 5:22, 23, 33.

 5. Lōn ngam Tēv an inrē tö vē nyīö nö hōtu nö hang chööngö yöng re. (Efisös 6:1-3) Meūka an tö më inyööngö nö kētö inköphöti hēk inlööktit më kūön re. Hòṅ kēḵ rētak re më inyööngö nö in më kūönre nö hakūöken cha tö minë inköphöti aṅ mat ngam töhet līpöre, nö chö-öny tö tölöök inköphöti. (I.Chööngö 11:18, 19; Inchōḵoṙô 22:6, 15) Sōtu yip inyööngö nö harunnyö lanīnö yip kūön re hòṅ cha nö öt kayūmi.—Kòlòsī 3:21.

6. Yēḵ minā pamīhöre nö kanihnguṙen nö in höö nö im pinīhö tö cha, ngaich hòṅ kēḵ minë inlēnö cha-a minë aṅmat ngam töhet līpöre. Hōtu in töm töhet līpöre öi hameuktö hanāngenlōn hēk kö aṙēlen höö inrē. (Kòlòsī 3:12-14) Öt tölṙò hī an ngam töhet līpöre höng ilöö ṙāngen höö yĕi rahëichyen kanihngen. Mihôiṅ pöri ngam kikānö nö atöllö në talöökö re nö ṙāngen ngam pīhöre yĕn (1) huso-o anga-aṅ nö hayööken ngam mikūönö re, (2) Yēḵ ò nö angëṅtöchōch hēk yāha tī nö fël ngam pihöre töp lökten ò kò-òren nö kapah, (3) Hēk yēḵ ngam kikōnyö nö yāhatī nö sōngen ò nö i linöökö lōn ngam Tēv Yāvē.—1 Kòrin 7:12, 13.

7. Hōtu nan mina pamihöre nö tökô-en hanāngenlōn tö höö. Tökööl an ngam insĕha nö im Tēv i pihö inrē. (Heprāi 13:4) Höng kūö chinò-òṅ re tö tahëng in kò-òren ṙāngö pihöre tö ṙô ngam töhet līpöre töp lökten ò nö kò-òren nö kēḵ pihöre tö tahëng. (Mëtiv 19:6-9; Rōma 7:2, 3) Kunyahalōn an Yāvē yēḵ tarik nö ṙāngö ngam pihöre nö öt sā ṙô ngam töhet līpöre ngaich hēk nö kēḵ pihöre tö tahëng.—Malakī 2:14-16.

[Kepsön el ngam pēch 17]

Meūka an ngam Tēv tö më inyööngö nö haköptö kūön re hēk halööktit më kūön re

[Kepsön el ngam pēch 17]

Ngòh töhāngenlōn inyööngö meukṙen ngam mikūönö re tö nya-aṅkūö tö minë tölöök inköphöti inrē