Mirūlö 14

Sitih Inlahen Manūlö Aich Vē Vamënyen Yāvē

Asuh ök samyeūheu ranulten vē Vamënyen Yāvē nö la-evṙen inë sakāmö hī töngamuh? (1)

Sitih inlahen kinëken ön minë manūlö vē Vamënyen Yāvē? (2)

Löktö yih ön minë rupīö cha nö kēken minë la-en re? (3)

Achīö ap mahayöngken cha nö el minë māṅ cha? (4)

Asuh nup tökiröng manūlö cha tökēkaṙen nö kaheuk samyeūheu? (5)

Asuh nup la-en tökēkaṙen nö im tökiröng ôfis tö minë mupākö u inrē? (6)

1. Vē Vamënyen Yāvē inë sakāmö hī töngamuh nö ihôi ngam samyeūheu tö 1870 ranulten. Urĕh yin sin nö Mahaköp töhet līpöre invëka. Ik samyeūheu pöri tö 1931 nö kaheūkö minë-eny cha-a nö Vamënyen Yāvē nö lökngörit imat ngam töhet līpöre. (Isayā 43:12) Töng kūöṅnen yin sin ngaich pöri töngamuh nö eltö kööṅnyu sanīöpö vē vamë-eny, vē töt samökkenre nö ahānga nö inë panam tö pōyen tö tö 230.

2. Lūöi heuh kinëken nun minë manūlö vē vamënyen Yāvē itöhĕng afta nö el minë māṅ cha nö ṙòkhöre. Havëtu man öm yihtökūö in u anū-ö manūlö. (Heprāi 10:24, 25) Höng ngam töhet līpöre an lökngörit minë töhaköptu. Rĕhlöngrit hēk ma-airit nun minë manūlö cha töm vinë-eṅkūötēv. In u anu-ö manūlö nö ṙòkhöre nö tiköökö minë “töhet tinköökö.” (Efisös 5:18, 19) Öt ṙāyu man yihtökūö, öt rĕhĕn öm havëkakūö tö ṙāi re.—Mëtiv 10:8.

3. Ṙòkhöre nun minë manūlö nö kēkaṙen nö el minë Patī ngam Pūlngö. Tövi-i nun minë Patī ngam Pūlngö tö më tarik vamë-eny tö la-evṙen kamëtöre nö in u. Hö-ö man hō maheūṅku öm el minë Patī ngam Pūlngö tö minë insā, hēk kurôs, tö nup tahëng inrē tö sā u. Höng löktö in më tarik nun minë rupīö më kamahanglōnre  nö kēten u. Yip töhòṅ lōnu nö kētö nup rupīö inlōnti, lēn nup kasòng chūök nup kanahanglōn tökētu.—2 Kòrin 9:7.

4. Tanīnöṙô hēk Mameukken aṅ ngam māṅ yin më tö la-evṙen, nö el minë töhĕng māṅ. Acha-a yin mahayöngken ngam inköphöti nö el ngam māṅ. (1 Timòtī 3:1-7; 5:17) Hōluṙen yin tö më Töhaköövö Mameukṙen. (1 Timòtī 3:8-10, 12, 13) Hö-ö yin vē tarik nö kiröng hēk lātulöng tö më tahëng holre el ngam māṅ. (2 Kòrin 1:24) Hö-ö yin nö kĕ-ĕvkūö tö inkahköre. (Mëtiv 23:8-10) Öt harīkngöre chinhënen yin tö më tahëng. Ötrĕhĕn yin nö reushu nö in minë la-en re. Löknyö ellōn re lōn yin vē Tanīnöṙô nö haṙūötken ngam māṅ nö inup töt ṙanāngen tölöök inköphöti. Cha-a yin tömihôiṅ nö kētö inṙamlōn hēk inchō-okūö hē el kanihngen.—Yāköp 5:14-16; 1 Pitör 5:2, 3.

5. Kaheuk samyeūheu yin vē Vamënyen Yāvē nö kēken nup tökiröng manūlö hēk töhet manūlöre inrē. In u anu-ö ṙētak nö ṙòktöre kūö minë māṅ nö mūl nö i inkööpö ṙô ngam töhet līpöre. Örheūheu in öi meuk vinôkö yip tufömngöre mahaköp hē u anu-ö töhet manūlö.—Mëtiv 3:13-17; 28:19, 20.

6. Kamtö New York an ngam tökiröng ôfis vē vamënyen Yāvē nö ṙòkhöre ing pūlngö. In e yin më mahayöng minë la-en, më tö-heuveū-en Tanīnöṙô nö mūl nö ngamëṅchkö minë taṙòkhöre la-en minë tö keuheūtngöre chuök māṅ inë panam. Pōyen tö tö 100 nun minë mupākö ngam tökiröng ôfis nö tö la-evṙen nö keuheūtngöre chuök inë panam. In e yin më kamëtöre kamtān minë līpöre samööm-ken u inrē. Lökngörit in e inlēnlö ön inrē ngam inhangkö ngam tölöök inhānga. Hö-ö öm rih hòṅ ngëṅchkö ṙētak re öm chöhken minë töröhta mupākö ngam tökiröng ôfis?