Mirūlö 9

Tö Hòṅ Het Yin Vē Tarik Ngam Tēv

Kūö yòh öi hòṅ keuheūttöre hanëtö? (1)

Tö sitih manah öng ngam hanëtö im ma-alaha? (2)Hanëtö im tinrīken? (3)Hanëtö el kuilōn? (4) Hanëtö im alaha? (5)

Asuh nup töthet vane-eṅ tö hòṅ lākö tö hī? (6)

1. Töhet hēk tö chiplen an ngam Tēv Yāvē. Meūka an tö yip vame-eṅkūö re nö köptī töm hanëtö—im ma-alaha, hanëtö im tinrīken, hanëtö im el kuilōn hēk hanëtö inrē im alaha. (1 Pitör 1:16) Öt lööṙen in kiṙapkö ngam hanëtö i mat ngam Tēv. Pô hī iyöng kūö ngih panam töchōich. Höng örheūheu in inrē öi kiyung öi la-al nup töt löng el kuilōn re. Öt kò pöri öi ṙāngen re.

2. Hanëtö im ma-alaha: Yēḵ hī hòṅ löklōn Yāvē, ngaich öt kô ayī-ö köp in minë inköphöti hēk minë hötṙeh tinrīken ngam tövaich tinlööken. Hòṅ kunyi-inyre ayī-ö ṙa-ang inup tötkô-en tinlöökö hēk öt rĕhĕn kô öi holṙen u. (2 Kòrin 6:14-18; Inmeukhömat 18:4) Yēḵ hī ngaich akahakūö töm kanô-en inlahen ngam Tēv, ngaich hòṅ chumkūöṙen ayī-ö hòṅ hī öt lōmngö tö tī yip tarik yip tö kumtö töt löök inköphöti.—2 Yôhan 10, 11.

3. Hanëtö im tinrīken: Lōnu an Yāvē tö yip vame-eṅkūöre nö örheūheu nö löök inup inlahare nö hameuktöre nö tökô-en  kristīön. (1 Pitör 2:12) Lingāṅlhaka nup vahīṙen hī, pòrô nup tö hayunkaṙen. (Heprāi 4:13) Hòṅ ṙūöhöngre in töm insĕha hēk tö nup tahëng töchōich inlaha inrē ing panam.—1 Kòrin 6:9-11.

4. Hanëtö el Kuilōn: Yēḵ hī hatööḵlö el kuilōn re tö nup tölöök hēk tölöök mufē re, ngaich ngatī ngam inlahen hī min inrē nö löök. (Filipī 4:8) Ngaich yēḵ hī pöri iyū-öre i tö chōich, ngaich ngatī nup la-en hī mīnö inrē nö chōich. (Mëtiv 15:18-20) Hòṅ lāköre in tö nup tö ngatī minnyāmö nup tö chōichötī tö el kuilōn hī. Mihôiṅ pöri öi hatööḵlö ellōn re tö nup töhet afēköre öi löktö i inkööpö ṙô ngam Tēv.

5. Hanëtö im alaha: Hòṅ hëtö alaha hēk chinhënen yin vē kristīön, pòn lökten in cha nö yeichta ngam tinrīken ngam Tēv. Hòṅ söichtīre in unôichrit hī ikūöchōn, hòṅ söichtīre inrē urĕhĕkūö re nyā hēk lūölkö nup nya-aṅkūö. Yēḵ meh öt lēn tö chūök re ikūöchōn hòṅ hölngö kui nup isôre me-eṅ tö tumlat. (I.Chööngö 23:12, 13) Löktö im hanëtö alaha an ngam yanöölen kanôlò alaha. Lökten nun nö hòṅ het hēk vai në patī kristīön nö lā tuhēt hēk lā uk inrē. Hòṅ hameuknyu angu-ö nö inchōḵ elmat taṙòkhöre tarik.

6. Hanëtö im ṙinò-òṅ: Hòṅ örheūheu yin vē tarik ngam Tēv nö kò-ò ṙô. Pò vē tö minyôiny min nö öt kuhēthötre nö im pūlngö ngam Tēv. (Efisös 4:25; Inmeukhömat 21:8) Öt tö chōichö vanë-e yin vē kristīön. Hö-ö yin nö hangihtöre tö nup töchōich istori hēk ṙô tö nup tö chōich minônṙô. Kūö ngam hanëtö ṙô cha nö ṙò-òv lökten in e inrīkngöre mineūkö cha-a nö inup la-en re, yĕn el iskul, hēk in yip aṅ chīṙö cha inrē.—Efisös 4:29, 31; 5:3.

[Kepsön el ngam pēch 19]

Hòṅ het yin vē tarik ngam Tēv nö i tö Keuheūttöre