Inlahen öp Tufömngöre Tövai Panam

Yēḵ meh ngëṅcha öm ihih, i mat ngih, sitih inlahen mufē öm? Hö-ö öng ngam ellōn meh nö lōn tö në lanāmö, ṙanāmölōn, kanôlò tö sā në? Sön Lohten. Hö-ö nun nöng heūvö, tön tökò-en nun min nö teungtö kūö nö i kūö ngih panam?

Pōyen yip nö kò-òren tö ngö ṙô. Nehngenre nun në kinyūngö, ötlinëken, inyāichö, invah, chanöökö​—nup tahëng inrē. Sön in pöri öi lāinynguṙen öi maheūṅkkuvö. Ip yamih ṙētak, pòi vënyu nang töm töhet līpöre töm “tufömngöre halīöngö anë inrē tufömngöre tumlat minë ahökkö hī sā ngam kinlēḵngò(Ò), chūök nup lanöökö inrē.”​—2 Pitör 3:13; Isayā 65:17

Minë “tufömngöre halīöngö” töm “tufömngöre tumlat”sā ṙòm töhet līpöre nö rö-ö nö ṙòtö ngam halīöngö töng tumlat inrē. Pò ngih panam töm halīöngö misī nö tö vī-i töm Tēv nö tövai, tököp inrē nöng örheūheu. (Salmai 89:36, 37; 104:5) Miyööngö tarik öp min “tufömngöre tumlat” i kūö ngih panam,ngaich inyööngö lamöktö el halīöngö min öp “tufömngöre halīöngö” mahayöng yip tarik min ikūö ngih panam. Mihôiṅ öi pökeh ṙātö ellōnre in öp “tufömngöre tumlat,” hēk tölngö tövai panam, tö e nö öthō nö öt teung?

Hòṅ yĕh, rahëichtaṙen man sin aseh kūö re tö inlahen ngih panam ik raneh inlahen e. Ṙāten nak raneh tarik Anga-aṅ nö ël ök panò-òṅ i Ētön ngaich hakôlò cha: “Mikūönlö yēḵ ṙūölöre ṙôken hatöölö ngam tumlat hayööngö e inrē.” (Ranehlö 1:28) pòn kuilōn Ò angu-ö tö cha nö mikūönlö ngaich vī ngih panam nö peretais. Kūö cha pöri nö öt hang chööngö ngam Tēv, lökten cha nö öt kò nö örheūheu nö aṅ, köp pöri ngam kinlēḵngô ngam Tēv. Ngaich teungtökūö min angu-ö ip tufömngöre panam!​—Isayā 55:11.

Hôṅ kò-en,yēḵ meh ṙung vë-ekūö Tēv öm ṙô tö ngam vinë-ekūö Tēv haköptö Yēsū, havëkö ngam pūlngö ngam Tēv man kòl öm ngö ṙô, kayööngö aṅ el halīöngö, Pòn angu-ö min ma-ahetngö nup la-en ngam tötlöök nö i kūö ngih panam ngaich hayöng nö ip tufömngöre panam. (Mëtiv 6:9, 10) Ngaich ṙātö ellōnre ayī-ö tö Ò min nö sapṙô hī in e angu-ö vinë-ekūö Tēv, kūö ngih ṙô Ò kinlēḵngô: “Amin tö panam yip min tölöök, ngaich örheūheu nö iyöng in e.”​—Salmai 37:29.

Panam ngam Tēv Chūök Kumchikṙen

Kūmuröön an min ngam pūlngö tö nup töt ankahen ṙôken yanöölen, hateūngiṙen hēk min nö möl nuk kuilōn Ò nö ing panam misī nup ṙanāmölōn yip tarik Ò nö ing panam. Öt ōt min kumnyahlōn, tinutkö inlahen hol re inrē, ṙòkhöre pöri min yip tarik nö hol re nö tö hāngenlōn inrē tö höö. Kilēkgôre an ngam Töhet Līpöre nö ngöṙô, “Ha-ëtiyö min kinyūngö söl mana-ang kūö ngih panam.” Ane inrē “Hö-ö yip min hēk pumnāmö tarik nö hachônglö sanët re, öt rĕhĕn cha-a min nö haköptöre tö Kinyūngö nö hēk.”​—Salmai 46:9; Isayā 2:4.

Ngaich möl min ngih panam nö teungtö kūö nö Peretais. Ngaich hē e min ngih ṙô ngam Töhet Līpöre nö teung tökūö ngih tö ngö, “Ṙamölōn min inrē öp elinchōn töp chūökö inrē töngesngö; ṙāmölōn ngam tönyalnyi inrē, pöpnyöre kūö inrē sā ṙòng pūl . . . pòn el tönyalnyi min nup mak nö pòplö, el tö-nyalnyi inrē nup kun töhëmlö mak.”​—Isayā 35:​1, 6, 7.

Höng ṙanāmölōn nyöre yip min tarik nö ikūö öp Peretais panam. Öt neūkuvö min yip tarik hē e. Ngatī r̈ô an ngam Töhet Līpöre, “Kētö ṙòng re an min ngam tumlat.” (Salmai 67:6; 72:16) Ṙòkhöre min tarik hē e nö teūngen tö ṙāi lumrāḵre, sā ṙô ngam Tēv nö kilēḵngôre: “Teūch vāin min cha-a nyā ṙòng u inrē . . . öt teūch min cha-a ngaich nya-aṅ ṙòng tö tahëng.”​—Isayā 65:​21, 22.

Öt tarīkuvö min nö hēk kumrichöre nö ël patī re hēk ël sanrā re, tö kūö ṙôken re inrē, nö i kūö öp tufömngöre panam, pò e nö lōn ngam Tēv tö tarik nö ṙòkhöre nö chūöku nö iyöng. Sā ṙô ò nö ngö: “Mānö min cha-a ngaich iyöng ël u inrē . . . Hö-ö cha-a min nö mānö ngaich iyööngö ël tö tahëng.” “Öt chök alaha yip min nö la-evṙen.” (Isayā 65:​21-23) Ṙanāmölōn nyöre min tarik nö la-evṙen hē e, höng kumchikṙen nyöre inrē.

Hē e min ngam pūlngö ngam Tēv nö havantö lanāmö nö ihôi töṙeūla tö töṙeūla, ihôi tarik tö töṙeūla inrē sā inlahen u misī nö el ök panò-òn i Ētön. Ngö ṙô an ngam Töhet līpöre: “Ngaich min öp am aṅ el inchōn nö iyöng nö holtöṙah kūön sīṅp, hol re inrē kūön nuā tö Kūön Layön inrē tö ha-òknyu alaha, hachō-o min anu-ö tö tö kūöṅnö nyīö.”​—Isayā 11:​6-9; Hōsī 2:18.

Yĕh meuk, tö minë invah tö nup töt kumlĕ-en min inrē nö öt ōtre nö ikūö öp Peretais! Ṙūölö ṙinātö ellōn hī ön ngih ṙô ngam Tēv: “Öt tarīkuvö min tö ngö ṙô vahav chin.” (Isayā 33:24) “Chūtngö makmat min anga-aṅ nö ṙa-ang imat cha, Öt ōtngöre min inrē ngam ­kinpaha, ötrĕhĕn min miṙivlōn nö umuh, öt chanööku nö hēkngöre, ngaich nuk raneh inlahen nö chuhngöre.”​—Inmeukhömat 21:4.

 Raneushö meh yēḵ meh Chamöh ngam Tēv

Lohten man yīhi pinṙööingö ellōn öm hang në kinlēḵngô ngam Tēv në tö teungtökūö min nö ip tufömngöre panam. Ngaich in inrē meuk minë inkôlô nö öthĕng min töt teung, Pòn eltī ngam Vamī-i hī min anu-ö nö ṙòkhöre nö teungökūö.​—Salmai 145:16; Maika 4:4.

Yē meh öm hòṅ teūngen töm nômö tö örheūheu-aṅ öm iyöng kūö öp tufömngöre peretais tumlat hòṅ mikahtökūöre me-eṅ töngih ṙô Yēsū nö vë-ekūö Tēv: “Ngih ön nômö tö-örheūheu-aṅ, ngam mikahkūö cha tö meh, öm tökô-en Tēv akahakūö inrē tö ngam tahīntö meh Yēsū kristū.”​—Yôhān 17:3.

Lökten yēḵ meh hòṅ iyöng kūö öp panam ngam Tēv, ngaich hòṅ akahakūö më-eṅ töm Tēv tö nup lōn ò ngaich hòṅ löökö u inrē. kūö ngih tö ngöṙô: “[ngaich] ngih panam nö chuhngöre nö holtö nup tö chōich lōn re, anga-aṅ pöri ngòh tö la-evṙen tö lōn ngam Tēv köp nöng örheūheu.” Lökten hameuktö neūkölōn re im Vamīlen hī hòṅ meh teūngen tö inkôlò töt chanuhuvṙen ṙama-ang im Vamī-i hī.​—1 Yòhan 2:17.

Yēn öt hameuktu chūök, ngaich höng ṙôkhöre anu-ö nö aṅ mat ngam töhet līpöre.