LESÖN 04
Achīö Ang Ngam Tökô-en Tēv?
Löktö kūö misī pōyen nup Tēv tö ha-öönyö tö tarik. Höng hěngtak pöri ngam tökô-en Tēv vahënyö ngam Paipöl tö “kiröng tö Tēv nö ṙòkhöre.” (2 Kinṙötngö 2:5) Achīö anga-aṅ? Kūö yòh anga-aṅ nö kiröng tö më tahëng Tēv? Lōnu an ngam tökô-en Tēv tö meh öm mikahtökūöre tö ò.
1. Achīö öp minë-eny ngam tökô-en Tēv, ngaich sitih inlahen anga-aṅ, hòṅ hī akahakūö tö ngam minë-eny ò?
Vë-eny minë-eny re an ngam tökô-en Tēv nö imat ngam Paipöl. Nö ngö ṙô: “Chū-ö chin Yāvē.” (Vë-evkūö Maneutnyi 6:2, 3.) “Yāvē” an ngam minë-eny ò nö i ṙô Heprāi ngam tö ngö manah “Anga-aṅ lāinyngen u nö teung.” Lōnu Yāvē tö hī öi mikahtökūöre tö ngam minënyö ò. (Maneutnyi 3:15) Kūö yòh mihôiṅ öi ngatī ṙô? Pön pōyen tö tö 7,000 tumheuh tī anga-aṅ nö kūich höt ngam minë-eny re nö imat ngam Paipöl! a Höng Yāvē an tökô-en Tēv “el halīöngö lātulöng, i kui ngih panam, lā taṙeūḵ inrē töng tumlat; öt tahënguvö.”—I. Chööngö 4:39.
2. Sitih ṙô öng ngam Paipöl nö vë-eny inlahen Yāvē?
Vënyu Yāvē töm Paipöl nö harīkngöre tö më tahëng Tēv. Höng anga-aṅ tökô-en nö Tēv, “lamātulöng tö në panam nö ṙòkhöre.” (Vë-evkūö Salmai 83:18.) Hēk ‘tökalēḵ kūö tökalēḵ’ öt hěng la-en töt kanò-òṅ ò. Anga-aṅ “vamī-iṅl taṙòkhöre” el halīöngö hēk ing panam inrē. (Inmeukhömat 4:8, 11) Höng Yāvē an töt ranehlu, töt manāngenvö inrē.—Salmai 90:2.
MIKAHTÖKŪÖRE HĒK
Ngëichkö inrīkngöre minë invëkö ngam Tēv töm minënyö ò. Sitih inlahen ngam Tēv nö vë-eny ngam minë-eny re nö i taṙòkhöre? Kūö yòh anga-aṅ nö lōnu tö meh öm akahakūö töm minë-eny ò? Ta-a töi mikahtökūöre.
3. Höng hěng ngam minënyö ngam Tēv, ṙōlkangen pöri minë invëkö ò
Minë invëkö ngam tarik hēk töm minë-eny ò, kö harīkngöre anū-ö tö höö, yěm hòṅ mikahtökūöre ngaich kò-òren öm, röngnyöm VITIŌ, ngaich kakkö ngih intöönö yamih.
-
Ngam invëkö ngam Tēv nö “Mā” hēk töm minë-eny ò nö Yāvē, asuh öp inrīkngöre u tö höö?
Vënyu nang in töm Paipöl tö yip Tēv nö pōyen, yip tö ha-öönyö tö tarik. Vë-evkūö I. Chööngö 10:17, ngaich kakkö ngih intöönö yamih:
-
Achīö öp “Tēv vē tēv” hēk “Mā vē mā”?
4. Lōnu Yāvē tö meh öm akahakūö töm minë-eny ò hēk havëköm minë-eny ò inrē
Ta-a töi mikahtökūöre töm inlahen tī Yāvē pön hōten hī öi akahakūö töm minënyö ò. Röngnyöm VITIŌ, ngaich kakkö minë intöönö yamih.
-
Lōn Yāvē öng tö lōn meh, tö hī hōtu akahakūö töm minë-eny ò? Ngaich kūö yòh?
Kuilōn Yāvē an tö tarik nö havëkö ngam minënyö ò. Vë-evkūö Rōma 10:13, ngaich kakkö minë intöönö yamih:
-
Kūö yòh öng nö töt ṙanāngen ngam inlahen hī hòṅ havëköm minë-eny ngam Tēv, Yāvē?
-
Sitih mufē öm öre yěn köplōn yip tarik töp minë-eny meh, ngaich havëkö minë-eny meh inrē?
-
Ngaich sitih lōn inrē ang Yāvē tö lōn meh yěm havëkö ngam minë-eny ò?
5. Lōnu an Yāvē tö meh öm ṙūöhtöre öm in ò
Öt ha-eh ök yöngnyīö aṅ Kömpōtiā nö “ngatī ṙôken ṙanamlōn nö ing panam” pön akahakūö töm minënyö Yāvē. Röngnyöm VITIŌ, ngaich kakkö ngih intöönö yamih.
-
Sitih inlahen mufē ang Sôrtön hē ò nö akahakūö töm minënyö ngam Tēv?
Hòṅ urěh in öi hòṅ akahakūö töp minë-eny öp holre, ngaich möl kò-òren öi hanôlan. Vë-evkūö Yāköp 4:8a, ngaich kakkö minë intöönö yamih:
-
Asuh öp ṙô Yāvē nö vë-ekūö meh nö löknyö im miröökö vahë-ekūö meh?
-
Sitih inlahen öng ngam mikahkūö meh töm Tēv, nö haröhten meh öm in ò? Sitih lōn öm?
ṘÔ YIP TAHËNG: “Öp töng yòh kòl ṙô hī havëkö minë-eny ngam Tēv, pön höng hěngtak ngam Tēv.”
-
Ṙatö-ellōnre öm më-eṅ töm minë-eny ngam tökô-en Tēv nö Yāvē?
-
Sitih ṙô öm min mikahtö elmat yip tahëng tö ngam Tēv nö lōnu tö hī öi havëköm minënyö ò?
MINË HAKÖP HĪ NGAICH
Yāvē an ngam minë-eny ngam tökô-en Tēv. Lōnu anga-aṅ tö hī öi akahakūö tö ò hēk havëkö ngam minënyö ò inrē, hòṅ hī röhta öi in ò.
Sitih ṙô öm më-eṅ?
-
Sitih inlahen ang Yāvē nö harīkngöre tö yip tahëng tēv tö ha-öönyö tö tarik?
-
Kūö yòh öi hòṅ havëkö minë-eny ngam tökô-en Tēv?
-
Sitih löktö mikahlōn öm tö Yāvē nö lōnu tö meh öm ṙūöhtöre öm in ò?
NGËICHKÖ NË INRĒ
Öt kintööngulōn in töm Tēv nö ōt, kò-òren ngëichkö minë tö 5 lāinyngen.
Kūö yòh öng nö tölöng ngam vinënyö ngam Tēv tö ò nö töng örheūheu.
“Achīö Öp Vamī Ngam Tēv?” (Chūökamahati-HI, Òktopör 1, 2014)
Öt akahakūö in tö ṙô yik tarik misī nö kēḵ minënyö Yāvē sön pöri öi kūö yòh hòṅ havëkö ngam minënyö ò.
Ṙōlkangen ṙô tarik yěn havëkö minë-eny ngam Tēv. Kūö yòh pöri mihôiṅ öi vënyen ò nöng hēngö minë-eny?
a Kūö yòh nö öt ōtre ngam minë-eny ngam Tēv nö imat nup tahëng Paipöl? Ngëichköm manah ngam minënyö ngam Tēv in ngam Appendix A4 in ngam Niū Vöörlt Translēsön òf tī Hōli Iskripchörs.
