LESÖN 09

Haröhtöre Im Tēv Im Vinë-ekūötēv

Röngnyen e

Ṙōlheuh in ṙung öt akaha elmat tö inlahen re öi kētöre inup la-en re. Hēṙu ṙung nup intöönö nö yih nö elkuilōn hī, ngaich hòṅ chöh sanapṙô u ayī-ö. Ṙōlheuh öi yīhi miṙivlōn, ngaich hòṅ hareuska alaha. Höng ngam vinë-ekūötēv an tökô nö hayööken meh öm la-al u. Yěm vë-ekūötēv ngaich röhta min öm in Yāvē. Në pöri intöönö, hòṅ sitih inlahen öi yěi vë-ekūötēv? Ṙòkhöre öi hāngö ṙô yěi vë-ekūötēv? Ta-a töi mikahtökūöre.

1. Hòṅ achīö öp töhòṅ vë-evkūö tö hī yěi vë-ekūötēv, ngaich asuh nup havëkö hī?

Hachōtô hī Yēsū öi höng vë-ekūö ngam Yöngre el halīöngö. Höng vë-ekūö Yāvē ang Yēsū nö ngö ṙô: “Sā ngih ṙô yin lökten vë-ekūötēv ‘Kayöngö, aṅ el halīöngö. . .’” (Mëtiv 6:9) Yēḵ hī min vë-ekūö Yāvē, ngaich ngönlöre min ngam innôlö hī öi in ò.

Ngö ṙô an ngam Paipöl. “Yē hī havëkuvö tö tösā lōn ò, hang ṙô hī anga-aṅ.” (1 Yôhan 5:14) Hachōtô hī ang Yēsū tö nup tölöng ṙô hī öi vë-ekūötēv. (Vë-evkūö Mëtiv 6:9-13.) Öi hòṅ vë-eny nup töng mufē re öi hěng tak, ui vaichngö pöri töm kinëtö nöönyö ngam Tēv tö nup töng tī ò nö in hī, hòṅ vë-elkui yip holre inrē ayī-ö.

2. Hòṅ sitih inlahen öi yěi vë-ekūötēv?

Hòṅ holtö ellōnre in yěi vë-ekūötēv ngö ṙô ngam Paipöl ‘keuheūt nyö [ellōnre] man öm vë-ekūö ngam [Tēv].’ (Salmai 62:8 NW). Mihôiṅ in höng ellōnre ṙô yěi vë-ekūötēv hēk pōitô, mihôiṅ sökhak, hēk ūichhaka, öp töng yòh inlahen hī vë-ekūötēv, yěi höng holtö minlēḵṙenre pöri. Öp töng yòh chūök hēk ṙētak inrē öi vë-ekūötēv.

3. Asuh nup inlahen tī Yāvē nö kētö sanap ṙô hī yěi vë-ekūötēv?

Ṙōlkangen inlahen tī Yāvē nö kētö sanapṙô hī yěi vë-ekūö ò. Yěn yih nup intöönö nö el kuilōn hī, ngaich löknyö mat ngam Paipöl tī anga-aṅ nö kētö sanapṙô u. Ngö ṙô an ngam Salmai 19:7, ‘[Ngòh] töt aṅhavin tö mikah yěn vë-ekūö Paipöl ngaich akahaṙa.’ (Vë-evkūö Yāköp 1:5.) Kētö lanāmö ellōn hī an ngam Tēv el nup kanihngen. Halöinykö ellōn yip hol hī anga-aṅ nö hayööken hī inrē.

MIKAHTÖKŪÖRE HĒK

Hòṅ sitih inlahen öi yěi vë-ekūötēv, hòṅ nup ṙô hī nö hāngö töm Tēv hēk asuh öp yanöölen hī yěi vë-ekūötēv. Ta-a töi mikahtökūöre.

4. Hòṅ sitih inlahen öi hòn hang nup ṙô hī ngam Tēv yěi vë-ekūötēv

Hòṅ sitih inlahen öi yěi hòṅ hāngö ṙô öi vë-ekūötēv? Röngnyöm VITIŌ.

VITIŌ: Ṙòkhöre Ahang Ṙô Ang Ngam Tēv Tö Hī Yěi Vë-ekūötēv?—RAHËICHTAMAT (2:42)

Lōnu Yāvē tö hī öi ṙòkhöre vë-ekūö ò. Vë-evkūö Salmai 65:2, ngaich kakkö minë intöönö yamih:

Asūp lōn Yāvē nö in meh ngam “Hamang vinë-ekūöre”? Ngaich kūö yòh öm ngatī ṙô?

Hòṅ sāta nup tinrīken hī nö sā kuilōn ngam Tēv, yěi lōnu tö ò nö hang ṙô hī öi vë-ekūötēv. Vë-evkūö Maika 3:4 hēk 1 Pītör 3:12, ngaich kakkö ngih intöönö yamih:

Kūö yòh öi mihôiṅ ṙatö-ellōnre tö Yāvē min nö hang ṙô hī yěi vë-ekūötēv?

Vë-elkui re më kumyung pòn hòṅ mihôiṅ. Hang nup tö ngatī ang ngam Tēv ṙô hī vinë-elkui?

5. Hòṅ löknyö ellōnre ṙô in yěi vë-ekūötēv

Ōt yip ṙung töng hěngren ṙô yěn vë-ekūötēv, pön ngatī inköpti cha-a. Ngatī lōn hòng pöri ngam Tēv tö inlahen hī öi vë-ekūötēv? Vë-evkūö Mëtiv 6:7, ngaich kakkö ngih intöönö yamih:

Ngö kinūchngö an “uh man hěngre ṙô yē meh öm vë-ekūötēv” sitih inlahen öm köplōn tö ngih ṙô?

Kaheuk nup inkòlô re man tī Yāvē hòṅ meh ha-öönyan. Hěng afta kò-òren öm kaheuk ṙôken nup inkôlòre, ngaich sat kangen löknyi ṙô min öm ha-öinyan yěm vë-ekūötēv. Ngaich öthō öm höng hěngren ṙô yěm vë-ekūötēv.

Lōnu an ngam inyööngö tö ngam nyīö nö vë-eny nup ṙô ellōnre nö in ò. Ngatī inrē Yāvē nö lōnu tö hī öi vë-eny nup ṙô ellōnre yěi vë-ekūötēv.

6. Inlōntö hī ön ngam vinë-ekūötēv nö aṅ im Tēv

Teūngen in tö nganöönöre yěi vë-ekūötēv, mötlö hē el kanihngen. Röngnyöm VITIŌ.

VITIŌ : Hayööken Hī Ngam Vinë-ekūötēv La-al Nup Kanihngen (1:32)

Vënyu nang in tö ngam Paipöl tö hī yěi vë-ekūötēv ngaich teūngen ayī-ö tö ngam lanāmö ngam Tēv Vë-evkūö Filipī 4:6, 7, ngaich kakkö minë intöönö yamih:

Lohten nup min kanihngen meh nö öt ṙāngen meh pòrô öm örheūheu vë-ekūötēv, sitih inlahen pöri min öm yöölen?
Asuh nup kuilōn meh havëkö meh öm vë-ekūötēv?

Akahakūö öm?

“Āmen” ngö ṙô in tö “ngatī an yēḵ.” “Āmen” ngö ṙô yik misī tarik ngam Tēv unòichṙit ṙô öp vamë-ekūötēv.—1 Kinṙötngö 16:36

7. Kēnyö ṙētak re man vë-ekūötēv

Yēḵ hī ṙung öi pōi la-en ngaich vaichngö kò-òren ayī-ö öi öt vë-ekūötēv. Hang ṙô Yēsū nö vënyöm vinë-ekūötēv nö tötṙanāngen. Vë-evkūö Mëtiv 14:23 hēk Mākös 1:35, ngaich kakkö minë intöönö yamih:

Sitih inlahen ök Yēsū nö kē-ěny ṙētak re nö vë-ekūötēv?
Ihē öm më-eṅ ṙung öm kē-ěny ṙētak re öm vë-ekūötēv?

ṘÔ YIP TAHËNG: “Hö-ö in kòl yanööluṙen yěi vë-ekūötēv.”

Sitih ṙô öm më-eṅ?

MINË HAKÖP HĪ NGAICH

Yěi holtö ellōre min öi vë-ekūötēv ngaich röhta min ayī-ö öi in ngam Tēv, īnu inrē tö lanāmö el kuilōnre hēk yěi hang nup ṙô Yāvē ngaich teūngen ayī-ö tö nganöönöre.