Kuchikṙô in yěi vë-ekūö mat ngam Paipöl. Mihôiṅ pöri nö ōt nup kanihngen hī. Lohten öm ngö lōn, mihôiṅ öich min chū-ö iṙūöhen haköpmat ngam Paipöl? In ngih lesön in min mikahtökūöre tö nup yanöölen hī yěi höng iṙūöhen öi haköpmat ngam Paipöl pòrô nup kanihngen hī.

1. Kūö yòh öi yöölen yěi haköpmat ngam Paipöl?

‘Tö aṅ an ngam ṙô ngam Tēv īnu inrē töm kumlēḵre.’ (Heprāi 4:12) Löknyö mat ngam Paipöl ṙô ang Yāvē nö vë-eny mufē elkuilōnre tö hī. Pōyen nup ṙô haköp hī aṅmat ngam Paipöl, rö-ö pöri nöng angū-ö chö-öny hī hòṅ haköpmat e. Tön hòṅ haköp ayī-ö, hòṅ hī yöölen öi katöllö nup tölöng kuilōnre, teūngen inrē tö maheūkköre inup yamih ṙētak. Mötlö pöri ngam chö-öny hī öi haköpmat ngam Paipöl pöi hòṅ hanôl ngam Tēv. Halööktö tinrīken hī min ngam Paipöl, yěi höng iṙūöhen öi haköpmat e.

2. Kūö yòh öi hòṅ akahakūö tö minë kanô-en aṅmat Paipöl nö töpōiṙāi?

Töpōiṙāi nun minë kanô-en aṅmat ngam Paipöl. Lökten öi hōtu ‘havaha u, ui inyihngen u.’ (Inchōḵ-oṙô 23:23) Yēḵ hī min akahakūö tö minë kanô-en aṅmat ngam Paipöl nö töpōiṙāi, öthō min ayī-ö ṙāngenre haköpmat ngam Paipöl.​—Vë-evkūö Inchōḵ-oṙô 2:4, 5.

3. Sitih inlahen ang Yāvē nö mihôiṅ nö hayööken meh öt ṙāngenre haköpmat Paipöl?

Köplōn tö Yāvē nö Tēv tö kalēḵ nö hol meh. Lōnu anga-aṅ tö meh öm mikahtökūöre tö ò, hòṅ ò nö hayööken meh. Ngö ṙô an ngam Paipöl “Mihôiṅ chin keuheūttöre la-en in Ò ngam mahangëken chu.” (Vë-evkūö Filipī 4:13.) Yěm kihngen öm iṙūöhen vë-ekūö mat ngam Paipöl, mihôiṅ min ngam Tēv nö hangëken meh, nö kētö kumlēḵ meh öm la-al nup kanihngenre. Lökten örheūheu vë-ekūö Yāvē, havëkö hinòlṙenre, hòṅ meh öt ṙāngenre öm haköpmat ngam Paipöl.​—1 Tösalònikē 5:17.

 MIKAHTÖKŪÖRE HĒK

4. Tötṙanāngen an ngam inkööpö mat Paipöl

Lohten in ṙung pōyen la-en ngaich kihngen öi kēnyö ṙētak re haköpmat ngam Paipöl. Sitih inlahen öi min yěi ngatī? Vë-evkūö Efisös 5:​16, ngaich kakkö minë intöönö yamih:

• Asuh nup la-en tö lōn meh tinöölö ṙô hī öi “haṙënngö ṙētak”?

• Sitih inlahen öm min yěn pōiṙāi ngam inkööpö mat Paipöl nö in meh?

1. Yěm urěhlö ngam kuyāyö nö el ngam pālti, möl minë ihong, ngaich öt keuheūtlöre min minë ihong

2. Yěm urěhlö minë ihong pöri, ngaich chūöku min ngam kuyāyö nö keuheūtlöre. Ngatī min, yěm “urěhlö nup tötṙanāngen la-en” aṅ in meh, ngaich mihôiṅ min öm keuheūt tö nup la-enre sön öm ōttit ṙētak öm kēken nup tahëng la-enre

Yēḵ hī min vë-ekūö mat ngam Paipöl, ngaich hang nup inchōḵokūöre min ayī-ö lamöknyö elvang ngam Tēv. Ngaich kētöre min öi ha-öönyan. Vë-evkūö Mëtiv 4:4, ngaich kakkö ngih intöönö yamih:

• Asūp min yanöölen hī yěi vë-ekūö mat ngam Paipöl?

 5. Um ṙāngenre yěm hakihtuṙen

6. Hayönglenre in Yāvē hayööken meh an min

 MINË HAKÖP HĪ NGAICH

Öt lööṙen in iṙūöhen haköpmat Paipöl, yěi höng iṙūöhen pöri ngaich teūngen min ayī-ö tö ngam töt chanuhuvṙen ṙanamölōn. Lökten hayönglenre in Yāvē, hayööken meh an min.

Sitih ṙô öm më-eṅ?

• Kūö yòh ön minë kanô-en aṅmat Paipöl nö töpōiṙāi nö imat meh?

• Sitih inlahen öm min yěn pōiṙāi ngam inkööpö mat Paipöl nö imat meh?

• Kūö yòh öi hòṅ havëkö hinòlṙen re in Yavē yěi hòṅ iṙūöhen öi haköpmat ngam Paipöl?