Sā haköp hī in ök tö ngaich lesön, öt ṙamlōn ngam Tēv nö in në tinlööken nö ṙòkhöre. Sön pöri, öi mihôiṅ haṙamlōn ngam Tēv yěi ha-öinyan. Asuh öp “töhet falngen [hēk, nöönyö]” öp tö ṙamölōn tī tö ò? (Yāköp 1:​27) Ta-a töi mikahtökūöre tö ṙô ngam Paipöl.

1. Hòṅ asuh öp lökngörit inlahen hī öi ha-öiny ngam Tēv?

Ngö ṙô Yēsū nö vë-ekūötēv: “Ngam ṙô meh an kanô-en.” (Yôhan 17:17) Hòṅ lökngörit im Paipöl nup ṙô hī öi ha-öiny ngam Tēv. Pōyen pöri nup tinlööken töt mötlö lōn töm inköptö ṙô ngam Tēv, mötlö lōn pöri cha-a nö kēken minë la-en hachöngten tarik tökiröng sakamö. Öt ṙamlōn pöri Yāvē tö yip tarik yěn ‘sōḵo nup chööngö ngam Tēv.’ (Vë-evkūö Mākös 7:9.) Ṙamlōn pöri anga-aṅ nö in hī yěi asīnkö minë inchöngten imat ngam Paipöl yěi ha-öinyan.

2. Hòṅ sitih inlahen öi ha-öinyö Yāvē?

Höng Yāvē an tö hòṅ ha-öinyö, pò ò nö Vamīlen hī. (Inmeukhömat 4:​11) Tö ngö manah angū-ö tö hī hòṅ keuheūttö ellōnre öi hangenlōn tö ò, höng anga-aṅ inrē tö hòṅ ha-öinyö. Ötkô nö kē-ěyö ngam nöönyö ò nö in nup töka-īpö insātēv.—Vë-evkūö Isayā 42:8.

Hòṅ ‘töhet hēk tö hōḵovö tö ngam Tēv’ nup kahëtö hī nöönyö Yāvē. (Rōma 12:1) Tö ngö manah angū-ö tö hī hòṅ kēkö kaha minë töhet inchöngten kahëtö ò. Tö sā yip töhangenlōn tö Yāvē, nö hang minë töhet inchöngten min i alaha ngam pinīhö. Ṙūöhöngre inrē min cha-a tö minë sin-òkkūö Yāvē. Tö sā ngam nyina-aṅ yang, minë tö hiyōihukūö hēk yěi yahlö ṙôkvat öi òk ka-eūt. a

3. Kūö yòh öi hòṅ hanôltöre in yip tarik Yāvē yěi hòṅ ha-öinyan?

Ṙētak hī nun minë tökaheuk afta mīting öi “ha-öiny ngam Mā Tēv [Yāvē]; elṙôngö . . . yip tö maṙôngö.” (Salmai 111:​1, 2) Ngam tinkökṙôre inrē tö minë nöönyö ngam Tēv töhěngkangen inlahen hī öi ha-öinyan. (Vë-evkūö Salmai 104:33.) Tölṙô hī Yāvē öi yihtökūö el minë mīting kūö ò nö hangenlōn tö hī. Akahakūö inrē anga-aṅ tö hī öi teūngen min töm tö-örheūheu ṙanamlōn öi löktö in minë mīting. Yēḵ hī min meukkūöre el mīting ngaich reuslöre alaha ayī-ö, tö yip hol hī inrē.

 MIKAHTÖKŪÖRE HĒK

4. Sōtö ngam nöönyöre Yāvē nö kē-ěyö nö inup insā tev

5. Ṙānyu in min ṙā-ang in minë tövaich inköphöti yěi höng ha-öinyö Yāvē

 6. Ha-öinyö Yāvē tö hī öi el mīting

Yěi tikök nup nöinyö Yāvē el mīting hēk kētö sanap ṙô inrē, ngaich sā maha-öinyö Yāvē ayī-ö, hareuskö alaha yip tahëng inrē. Vë-evkūö Salmai 22:22, ngaich kakkö minë intöönö yamih:

• Sitih lōn öm më-eṅ yěm hang ṙô yip kamëtö sanap ṙô el mīting?

• Hö-ö öm më-eṅ hòṅ halēnkö öp töhěng sanap ṙôre min yěm chuh el mīting?

7. Ṙamlōn Yāvē yěi vënyö nup haköpre in yip tahëng

Nup haköplö hī ngaich aṅmat ngam Paipöl, mihôiṅ öi vë-eny nang yip tahëng min tö u. Vë-evkūö Salmai 9:1 hēk 34:1, ngaich kakkö ngih intöönö yamih:

• Asuh nup ngaich haköplö meh aṅmat ngam Paipöl nup tö mihôiṅ nö vënyu tö meh öm in yip tahëng?

 MINË HAKÖP HĪ NGAICH

Yēḵ hī min öi ha-öiny ngam Tēv Yāvē ngam Vamīlen hī, tikök nup nöönyö ò inrē öi el mīting hēk vë-eny nang yip holre tö nup haköpre aṅmat ngam Paipöl ngaich ṙamlōn anga-aṅ.

Sitih ṙô öm më-eṅ?

• Hòṅ asuh öp lökngörit ngam inlahen hī öi ha-öiny ngam Tēv?

• Kūö yòh öi höng hòṅ ha-öiny Yāvē?

• Kūö yòh öi hòṅ hamūlhötre in yip tarik Yāvē öi ha-öinyan?