LESÖN 15
Achīö Ang Yēsū?
Töhěng tak ök misī Yēsū nö tö akahka nö ikūö ngih panam. Sön nöng ngam minë-eny ò mikahkūö yik tarik, öt ōtngöre nup tahëng mikahkūö cha tö ò. Minë töng rahëichyen inrē mikahkūö cha, öt rěhēn cha-a nö hěngren ṙô tö u. Achīö ök rih Yēsū? Töi hang ṙô ngam Paipöl nö vë-eny nang hī.
1. Achīö ang Yēsū?
Tökalēḵ ang Yēsū nö ma-ahānga nö mī-iyöng el ngam halīöngö. Urěhlö vinīlö anga-aṅ tö taṙòkhöre. Lökten ò nö “lanòh në tövilöngö.” (Kòlòsī 1:15) Kaheūkö anga-aṅ nö “töng hěng maneuk” nö kūön ngam Tēv, pön hakôtenre Yāvē nö vīlen ò. (Yôhan 3:16) Holṙenre ngaich cha-a nö la-evṙen nö vīlö në taṙòkhöre. (Vë-evkūö Inchōḵ-oṙô 8:30.) Yēsū an tö röhta nö in Yāvē. Lökten anga-aṅ nö kaheūkö nö “Ṙô” ngam Tēv, pön anga-aṅ löknyö ṙô Ò nö vënyöm tölöök inhānga, tö minë inlēnö inrē chamuh i tarik.—Yôhan 1:14.
2. Kūö yòh ök Yēsū nö yih nö ing panam?
Urēhěkūö tö 2,000 samyeūheu rò-angen nö ngaich ang Yāvē nö löktö im töhet kumlēḵre tī nö chaphöt ngam nômö ngam kūönre Yēsū nö ellōn Mariā nö löktö el halīöngö. Tökiröng angū-ö nö pinngankūö. Lökten ang Yēsū nö kayônyu nö sā tarik. (Vë-evkūö Lūkös 1:34, 35.) Yih ang Yēsū nö ing panam, pön anga-aṅ tökilē-ěyö nö Mesayā hēk Kristū nö ṙamānyö taṙòkhöre tarik. a Teung nun nö ṙòkhöre minë tökilē-ěyö ṙô ngam Paipöl inlahen ngam Mesayā nö in ò. Hòn akahakūö tarik tö Yēsū nö Kristū, nö “Kūön ngam tö aṅ Tēv.”—Mëtiv 16:16.
3. Isuh öp ngaich Yēsū töngamuh?
Unôichrit ngam kinpaha Yēsū nö ing panam, ngaich hachohlöng anga-aṅ nö tökalēḵ nö ma-ahānga, ngaich havan nö chuh el halīöngö. In e ngam “Tēv nö hapōilen Ò, ngaich kētö minënyö Ò töp lamātulöng tö në minë-eny nö ṙòkhöre.” (Filipī 2:9) Lökten öp Yēsū töngamuh nö innëtö nö tökirööngö kumlēḵ hēk minā-aṅ, nö unôichrit Yāvē.
MIKAHTÖKŪÖRE HĒK
Achīö ang Yēsū? Kūö yòh öng nö tötṙanāngen ngam inlahen hī hòṅ mikahtökūöre tö ò?
4. Öt Tökalēḵ kūö Tökalēḵ ang Yēsū
Vënyu nang in töm Paipöl tö Yēsū nö īnu tö kumlēḵ hēk minā-aṅ inrē, nö el halīöngö. Sön anga-aṅ nö hang chööngö ngam Tēv re ngam Yöng ò Yāvē. Kūö yòh öi mihôiṅ ngatī ṙô? Röngnyöm VITIŌ ngaich hang ṙô ngam Paipöl nö vë-eny inlahen inrīkngöre Yēsū töm Tēv tökalēḵ kūö tökalēḵ.
Hayööken hī nun min në ṙô aṅmat ngam töhet līpöre öi akahakūö töm innôlö nā Yēsū nā Yāvē. Vë-ekūö u, ngaich kakkö minë intöönö yamih.
Vë-evkūö Lūkös 1:30-32.
-
Yěn vënyu Yāvē nö Tēv “Lamātulöng” tök ma-ahānga, ngaich asuh öp kamngö Yēsū?
Vë-evkūö Mëtiv 3:16, 17.
-
Asuh ök ṙô tö hāngö lamöktö el halīöngö, hē Yēsū nö vōkö?
-
Ṙô chīö ök hē e tö lōn meh?
Vë-evkūö Yôhan 14:28.
-
Achīö öp tökiröng hēk tökirööngö minā-aṅ, ngam yöng hòng ngam kūön ṙöng?
-
Yěn yöngrevö ṙô ang Yēsū tö Yāvē, achīö öp pökeh tökiröng tö cha?
Vë-evkūö Yôhan 12:49.
-
Vë-eny re ök Yēsū tö cha nöng hěng töm Yöng ò? Asūp mikah elnang meh tö ṙô ngam vahë-ekūö meh?
5. Asūp mahameukten Yēsū tö ò nö Mesayā
Imat ngam Paipöl nun minë tö-eūka inlahen ngam Mesayā, hòn akahakūö min tarik töm katöllö ngam Tēv nö ṙamānyö taṙòkhöre tarik. Röngnyöm VITIŌ ṙōlkang chūök vinënyi an ngam Mesayā nö imat ngam Paipöl, hòṅ yip tarik min nö akahakūö tö ò. Ta-a töi ngëichkö minë tö-eūka kinlēḵngô, minë tö teungtökūö nö in Yēsū.
Vë-ekūö minë miröökö aṅmat Paipöl vinënyö ngam tö-eūka, ngaich kakkö minë intöönö yamih:
Tö hòṅ isuh kamtö chūök ang ngam Mesayā nö fötnyu, yěm hòṅ mikahtökūöre ngaich Vë-ekūö ngam Maika 5:2. b
-
Kô-en ök misī Yēsū nö fötnyu im kamtö chūök ngam ineūkö ò nö fötnyu?—Mëtiv 2:1.
Yěm hòṅ mikahtökūöre tö inlahen ngam tö urěhngöre vinënyi inlahen kinpaha ngam Mesayā, ngaich vë-ekūö ngam Salmai 34:20 hēk Sakariā 12:10.
-
Ṙòkhöre ön minë tö-eūka kinlēḵngô nö teung?—Yôhan 19:33-37.
-
Mihôiṅ öp nyīö el chūök kanūönö öp yöngre nö vënyö kamtö chūökre min nö kayônyu hēk mihôiṅ hòng öp tö fëli tarik nö akahakūö tö inlahen tī yip famëlngen ò min?
-
Sitih inlahen ön anū-ö në nö teung nö in Yēsū?
6. Yöölen in min yěi akahakūö tö Yēsū
Vë-eny nang hī an ngam Paipöl töm tökiröng yanöölen hī yěi akahakūö tö ngam kamtö Yēsū nö im kuilōn ngam Tēv. Vë-evkūö Yôhan 14:6 hēk Yôhan 17:3, ngaich kakkö ngih intöönö yamih:
-
Kūö yòh öi hòṅ mikahtökūöre takô tö Yēsū?
Yēsū an talöökö, kanô-en, nômö inrē. Anga-aṅ tö mihôiṅ nö ṙòngnyökūö talöökö hī öi hanôlö Yāvē. Haköptö ngam kanô-en anga-aṅ inlahen Yāvē, höng anga-aṅ talöökö hī mihôiṅ teūngen töm nômö tö-örheūheu aṅ
ṘÔ YIP TAHËNG: “Hö-ö yin më Vamënyen Yāvē nö ṙātö-ellōnre nö in Yēsū.”
-
Sitih ṙô öm min më-eṅ in cha?
MINË HAKÖP HĪ NGAICH
Tökalēḵ Yēsū nö ma-ahānga, kūön ngam Tēv anga-aṅ hēk tö-eūka nö Mesayā.
Sitih ṙô öm më-eṅ?
-
Kūö yòh ang Yēsū nö vënyu nö “lanòh në tövilöng”?
-
Asuh nuk la-en Yēsū urēhěkūö yanīhi ò nö ing panam?
-
Sitih löktö mikahkūö öi tö Yēsū tö ò nö Mesayā?
NGËICHKÖ NË INRĒ
Ṙūöhtö mikahkūöre töm kamtö Yēsū nö Mesayā.
Kô-en ang ngam Tēv nö kayônyö ngam kūönre nö sā inlahen yip tarik tökô-en inlahen nö kayônyö kūönre. Töi mikahtökūöre.
“Kūö Yòh Ang Yēsū Nö Kaheūkö Nö Kūön Ngam Tēv?” (El vepsāit töhakööpö)
Öt aṅmat Paipöl an ngam inköphöti vinënyöm Tēv nö Tölūöi Nöng Hěng. Kūö yòh? Töi mikahtökūöre.
Ngëichköm yöngnyīö nö sitih inlahen inṙīngöre tinrīken hē ò nö haköp inlahen Yēsū nö imat ngam Paipöl? Töi mikahtökūöre.
“Kūö Yòh Ök Yöngnyīö Nö Haṙī-ingre Mufē Töm Tinlöökenre Nö Yahūti” (Hīnöre!-E, ātiköl)
