LESÖN 16

Asuh Nuk La-en Yēsū Hē Ò Nö Ing Panam?

Röngnyen e

Pōyen tarik töngölōn yěn hang inlahen Yēsū nöng kun nyīö tö hulalhaka nö el chūök kūö nuā, ōt vamënyen ò nö pròfět hēk tarik tökilöllöng nö i rōi chōn. Sitih ṙô öng ngam Paipöl nö vë-eny inlahen ò? In ngih lesön in min öi kakkö minë tökiröng la-en ò, minë tö lökngöre tī min tö hī.

1. Asūp tötṙanāngen nö la-en Yēsū misī?

Tötṙanāngen ngam la-en Yēsū nö “mumkahten . . . tö ngih tölöök inhangkö ngam Pūlngö ngam Tēv.” (Vë-evkūö Lūkös 4:43.) Pön höng angū-ö tökô nö kēngen në taṙòkhöre kanihngen hī min ikūö ngih panam. a Keuheūt chahuhure hēk keuheūttö inlahenre anga-aṅ nö ahangkö ngam tölöök inhānga nö lūöi samyeūheu ròngti.—Mëtiv 9:35.

2. Asūp chö-öny Yēsū nö hameuktö nuk la-en pinngangkūö?

Vënyu nang in töm Paipöl ‘tö ngam Tēv nö lökten in Yēsū tī nö hameuknyö nup minhôiṅyö la-en, pinngangkūö, minkahngö inrē.’ (Inlahen 2:22) Löktö im kumlēḵ ngam Tēv anga-aṅ nö ṙaptö chanôichö, hanëlö tököönyu, halanken tövahavö, hachohlö tö kapah inrē. (Mëtiv 8:23-27; 14:15-21; Mākös 6:56; Lūkös 7:11-17) Löktö in minë pinngangkūö öi akaha kūö tö ò nö tahīntö ngam Tēv. Hameukten Yāvē anū-ö nö minhôiṅyu nö kēngen në kanihngen hī.

3. Asūp haköplö hī in ngam tinrīken Yēsū?

Örheūheu ang Yēsū nö hang nup töng chööngö Yāvē. (Vë-evkūö Yôhan 8:29.) Pòrô anga-aṅ nö kihngen, sön nö öt heūlngöre nö hang nup tölöng chööngö ngam Yöng re nö söl kinpahare. Hameukhömat hī anga-aṅ tö tarik nö mihôiṅ nö hang chööngö ngam Tēv, pòrô nö kihngen. Lökten Yēsū “nö kihngen töpòkūö yīö, ṙā-akūö yīö tö inchōten.”—1 Pītör 2:21.

MIKAHTÖKŪÖRE HĒK

Asūp haköplö hī im inlahen Yēsū nö ahangkö ngam tölöök inhānga, hameuknyö minë pinngangkūö inrē. Ta-a töi mikahtökūöre.

4. Ahangkö ngam tölöök inhānga ang Yēsū

Marô-òlkūö takô ang Yēsū nöng kiröön nö chuh in yik tarik, pön hòṅ pōyen vahë-eny nang anga-aṅ tö yik tarik töm tölöök inhānga. Vë-evkūö Lūkös 8:1, ngaich kakkö minë intöönö yamih:

Höng vë-eny nang yik tarik hòng ang Yēsū töm tölöök inhānga yik töng hěngkang chūök nö mūl nö hangihtö ṙô ò?
Sitih inlahen ök misī Yēsū nö chöh yik tarik?

Eūka ngam Mesayā tö ngam Tēv nö ahangkö ngam tölöök inhānga min. Vë-evkūö Isayā 61:1, 2, ngaich kakkö minë intöönö yamih:

Sitih inlahen ang Yēsū nö hateungngö ngih kinlēḵngô?
Kô-en aich vē tarik nö hòṅ hang ngam tölöök inhānga töngamuh, sitih lōn öm më-eṅ?

5. Kētö tövai inlēnö ang Yēsū

Kētö minë tövai inlēnö ang Yēsū hē ò nö haköphöti nö i kui Rôngö, pön hōten hī öi ṙamlōn öi lökten in u, nö hol ngam la-en ò inhangkö yanīhi ngam Pūlngö ngam Tēv. Vë-evkūö Mëtiv 6:14, 34 hēk 7:12, ngaich kakkö minë intöönö yamih:

Asūp tövai inlēnö kahëtö Yēsū in minë vahë-ekūö meh?
Yöölen öi tö lōn meh inrē töngamuh yěi hang minë tövai inlēnö?

6. Hameuknyö minë pinngangkūö ang Yēsū

Kētö kumlēḵ Yēsū ang Yāvē nö hameuknyö minë pinngangkūö. Ngëichköm töhěng pinngangkūö öm vë-ekūö Mākös 5:25-34 ngaich röngnyöm VITIŌ. Ngaich kakkö ngih intöönö yamih.

VITIŌ: Lööken Ngam Yöngnyīö Tök Invahre (5:10)

Asuh ök tökiröng ṙinatö-ellōn ök yöngnyīö tövahavö?
Asuh öp tölökngöre tī tö ellōn meh in ngam vitiō?

Vë-evkūö Yôhan 5:36, ngaich kakkö ngih intöönö yamih:

Sitih inlahen ön minë pinngangkūö nö vë-eny tinrīken Yēsū?

Akahakūö öm?

Imat minë tö fën līpöre Tölöök Inhānga nö kūchi minë inlahen Yēsū. Tö sā ngam Mëtiv, Mākös, Lūkös, Yôhan inrē. Kö harīkngöre tī yin më kamūich nö vë-eny inlahen ò. Sön pöri öi löktö in u mikahkūö tö minë tökô-en tinrīken Yēsū.

MËTIV

ngam Tölöök Inhānga Mëtiv an tö urēhě kinūchö. Pōyen nun minë inköphöti ṙô Yēsū nö imat e, mötlö vinë-eny ngam Pūlngö ngam Tēv nö imat e.
MĀKÖS

tö kūönö ön nö in minë līpöre Tölöök Inhānga. Öt pōyen ṙô keung minë tö vënyu, veūtö inmeuknyi, hěngkang chūök inrē.
LŪKÖS

vënyu ngam vinë-ekūötēv nö tötṙanāngen, vënyu inlahen Yēsū nö milēḵṙen tö më kikānö.
YÔHAN

vënyu minë tinrīken Yēsū, minë inlahen ò nö in yik holre mahaköp tö yik tahëng inrē tarik.