LESÖN 17

Asuh Nup Tinrīken Yēsū?

Röngnyen e

Mihôiṅ in öi akahakūö tö minë tövai tinrīken Yēsū öi löktö in minë ṙô ò hēk la-en ò inrē, anū-ö min maharöhten hī öi in ngam Yöng ò Yāvē. Asuh nup rih tövai tinrīken Yēsū? Sitih inlahen öi mihôiṅ asīnken ò?

1. Sitih inlahen ang Yēsū nö sā inlahen ngam Yöngre?

Pōyen haköplö ang Yēsū nö im Yöngre, kūö ò nö ha-ëhelen misī nö in ò nö el halīöngö. Lökten ò nö sāḵta mufē, inlahen inrē nö im Yöngre. (Vë-evkūö Yôhan 5:19.) Ngö ṙô ang Yēsū, “Ngòh mameūkö Chu, ngaich meuk ngam Yöng chu inrē.” (Yôhan 14:9) Yěm haköp inlahen tinrīken Yēsū min ngaich akahakūö takô min më-eṅ tö Yāvē. Tö sā ngam miṙēḵlōn Yēsū tö tarik, löktö in e mikahkūö ayī-ö tö Yāvē nö tö chumkūöṙen.

2. Sitih inlahen ang Yēsū nö hameuktö hanangenlōnre tö Yāvē?

Pôrò Yēsū nö kihngen nö hang chööngö ngam Yöngre hē ò misī nö ing panam, sön anga-aṅ nö hang chööngö ò pòrô nö öt lööṙen. Angū-ö inlahen ò nö hameuktö hanagenlōnre töm Yöngre. Lökten Yēsū nö ngö ṙô, “Hòṅ ngih panam nö akahalōn tö chu hāngenlōn töm Yöng; ngaich sā ngam Yöng; nö tölṙô Chu.” (Yôhan 14:31) Hangenlōn Yēsū nö vë-eny inlahen ngam Yöngre, hayööken yip tarik inrē nö hanôlan.—Yôhan 14:23.

3. Sitih inlahen ang Yēsū nö hameuktö hanangenlōnre tö tarik?

Vënyu nang in töm Paipöl tö Yēsū nö “kirööngen hanagenlōn tö më tarik.” (Inchōḵ-oṙô 8:31, NW) Sitih inlahen anga-aṅ nö hameuktö hanangenlōnre tö më tarik? Hareuskö alaha cha, ngëichkö minë kanihngen cha, hayööken cha inrē. Pōyen hameuknyi inrē anga-aṅ tö pinngangkūö, rö-ö nöng kūö ò nö hòṅ hameuknyö ngam kumlēḵ re, kūö ò pöri nö hòṅ hayööken më tarik tö minë kanihngen cha. (Mākös 1:40-42) Hangenlōn inrē Yēsū tö yik tarik nö ṙòkhöre, höhlö cha-a tö nuk tölöök ṙô ò, maheūkku inrē. Hangenlōn Yēsū tö yip tarik yip hamô-en nup inköphötī ṙô ò.—Vë-evkūö Yôhan 15:13, 14.

MIKAHTÖKŪÖRE HĒK

Ṙūöhtö mikahkūöre hēk tö minë tinrīken Yēsū. Sitih inlahen öi mihôiṅ hameuktö hanangenlōnre, hēk haṙūötken yip tahëng öi sā ò.

4. Hangenlōn Yēsū töm Yöngre

I nuk inlahenre ang Yēsū nö hameuktöm hanangenlōnre töm Tēv. Vë-evkūö Lūkös 6:12 hēk Yôhan 15:10; 17:26. Unôichrit ṙô meh vë-ekūö minë miröökö ngaich kakkö ngih intöönö yamih:

Sitih inlahen öi ayī-ö hameuktöre hangenlōn tö Yāvē, öi asīnken Yēsū?

Hangenlōn ang Yēsū tö ngam Yöngre, ngaich vë-ekūö ò nö örheūheu

5. Chumkūöṙen Yēsū tö tarik

Öt höng ngëichköre ang Yēsū pön chumkūöṙen tö yip tahëng. Pòrô anga-aṅ nö chëi, sön nö kē-ěny ṙētakre nö hayööken yik tarik nö holtö ellōnre. Vë-evkūö Mākös 6:30-44, ngaich kakkö minë intöönö yamih:

Sitih inlahen ök Yēsū nö hameuktöre nö chumkūöṙen tö yik tahëng tarik?—Ngëichkö ngam miröökö 31, 34, 41, hēk 42.
Kūö yòh ök Yēsū nö hayööken yik tarik?—Ngëichkö ngam miröökö 34.
Hameuknyö minë tövai tinrīken ngam Yöngre ang Yēsū, asūp haköplö hī inlahen Yāvē öi in Yēsū?
Sitih inlahen öi min ayī-ö öi hameuktöre öi chumkūöṙen tö yip tahëng öi asīnken Yēsū?

6. Holtö ellōnre ang Yēsū nö meukṙen yik tö hāṅten

Öt tö yaha ṙôken aṅ in ök Yēsū tö chehen, sön anga-aṅ nö holtö ellōnre nö meukṙen yik tö hāṅten, tölṙô hī anga-aṅ inrē öi meukṙen yip holre tö kihngen. Vë-evkūö Inlahen 20:35, ngaich kakkö ngih intöönö yamih:

Asuh öp inlēnö hī kahëtö Yēsū, yēḵ hī hòṅ ṙamlōn?

Röngnyöm VITIŌ, ngaich kakkö ngih intöönö yamih:

VITIŌ: “Mötlö Ṙanamlōn Nö Im Kinë-eti”—Rahëichtamat (4:00)

Yēḵ hī pòrô öi öt yaha ṙôken aṅ in tö nup chehen, sön öi sitih inlahen mihôiṅ holtö ellōnre kē-ěti?

Akahakūö öm?

Vë-eny nang hī an ngam Paipöl tö hī yěi hòṅ havëkuvö öi in Yāvē, ngaich hòṅ i minë-eny Yēsū ṙô ayī-ö öi havë-a. (Vë-evkūö Yôhan 16:23, 24.) Pōyen la-en Yēsū töpòkūö hī, hòṅ hī öi röhta in Yāvē. Lökten yěi i minë-eny Yēsū ṙô öi vë-ekūötēv, ngaich hameuktöre ayī-ö öi milēḵṙen tö ò.

ṘÔ YIP TAHËNG: “Öt uroh an kòl ngam Tēv nö lökngöre yěn meuk nup kanihngen hī, pön töng öt chumkūöṙen tö hī.”

Mihôiṅ öi vënyen Yāvē nö tö chumkūöṙen, yěi ngëichkö minë la-en Yēsū misī hē ò nö ing panam?

MINË HAKÖP HĪ NGAICH

Hangenlōn Yēsū tö Yāvē, hangenlōn inrē anga-aṅ tö yik tarik. Kô-en Yēsū nö sā ngam Yöngre. Sā ṙôken mikahkūö hī min tö Yēsū, ngatī ṙôken min öp mikahkūö hī tö Yāvē.