LESÖN 19
Kô-en Aich Më Vamënyen Yāvē Nö Tamömkörit Kristū?
Ṙatö-ellōnre in īhö Vamënyen Yāvē töre öi tökô-en Kristīön. Hòṅ mikahtökūöre öm töp lānyngen ih öi ngatī ṙinatö-ellōn? Chumkūöṙen man ngëichkö lökngörit minë haköp ih, haköptö ih inrē. Töm kinṙeuklö minë-eny ih, töm hanangenlōn ih inrē tö höö.
1. Asūp lökngörit ṙinatö-ellōn më Vamënyen Yāvē?
Ngö ṙô ang Yēsū: “Ngam ṙô Meh an kanô-en.” (Yôhan 17:17) Asīnken Yēsū yip Vamënyen Yāvē nöng lökngörit im Paipöl ṙô yěn haköphöti. Töi ngëichken minë tö ngaichngen inlahen më Vamënyen Yāvē më tö kaheūkö sin nö Paipöl istutent, im samyeūheu 1870 cha-a nö chumkūṙen nö ngëichkö ṙô ngam Paipöl. Löktö in e ngaich cha-a nö akahakūö tö ngam tökô-en inköphöti ṙô ngam Paipöl, hēten tö e ngaich ngam ṙinatö-ellōn cha nöng lökngörit im Paipöl. Pòrô minë ṙô cha inköphöti nö öt sāḵta nö sā ṙô më aṅ el keurcha yěn haköphöti. Rö-ö cha-a nöng haköp, pön vë-eny minë haköpre inrē nö in yip tahëng. a
2. Kūö yòh öi kaheuklöng öi Vamënyen Yāvē?
Kaheūkö in öi Vamënyen Yāvē, kūö ih öi vamënyen ngam kanô-en inlahen ò. (Heprāi 11:4–12:1) Köönyu samyeūheu rò-angen ngam Tēv nö ngö ṙô nö in yik Israel: “Yī-ö yin vamënyen chu.” (Vë-evkūö Isayā 43:12.) Kaheūkö ök inrē Yēsū nö ‘tökô-en Vamë-eny.’ (Inmeukhömat 1:5) Lökten in öi löktökūö ik 1931 öi kaheūkö minë-eny öi Vamënyen Yāvē, ṙamlōn in öi kaheūkö öi ngatī minë-eny.
3. Sitih inlahen aich më Vamënyen Yāvē nö asīnköm hanangenlōn Yēsū?
Hangenlōn ang Yēsū tö yik haköptöre, lökten ò nö kaheūkö cha nö holmaneukre. (Vë-evkūö Mākös 3:35.) Keuheūtngöre chūök yin më Vamënyen Yāvē nö ikūö në panam, sön cha-a nöng sā töhěng mikūönö. Lökten yin nö prötör sistör ngö ṙô yěn havëken höö. (Filimòn 1, 2) Hang ngam chööngö inrē cha-a ngam tö ngö: “Hāngenlōn tö māṅre [prötör sistör].” (1 Pītör 2:17, NW) Ṙōlkangen inlahen yin më Vamënyen Yāvē nö hameuktö hanangenlōnre tö höö. Yěn yih nup kanihngen më prötör sistör nö ikūö minë panam cha, ngaich ilööṙen cha-a nö hayööken höö.
MIKAHTÖKŪÖRE HĒK
Ta-a töi mikahtökūöre tö minë tö ngaichngen inlahen më Vamënyen Yāvē. Chumkūöṙen ngëichkö minë inlahen cha, minë vamënyen cha nö tökô-en nö Kristīön.
Lökngörit im Paipöl ngam ṙinatö-ellōn më tökô-en Kristīön, vënyen e inrē cha-a nö i tahëng
4. Ngam Paipöl an lökngörit ngam ṙinatö-ellōn ih
Ha-ehangen ṙô ang Yāvē tö hī min öi ṙūöhölre ṙôken mikah elnang töm kanô-en aṅmat ngam Paipöl ing manā-aṅ sakāmö. Vë-evkūö 2 Kòrin 4:6, ngaich kakkö ngih intöönö yamih:
-
Asūp min tö ṙūöhölre ṙôken nö in më tarik ngam Tēv, yěn chumkūöṙen nö ngëichkö ṙô ngam Paipöl?
Ngëichkö inlahen Chāls Rössöl ngam töhěng tak Paipöl istutent, nö sitih inlahen nö holṙen më tahëng Paipöl istutent nö chöh manah ṙô ngam Paipöl. Röngnyöm VITIŌ, ngaich kakkö ngih intöönö yamih.
-
Asuh ök chahöh Chāls Rössöl tö yik hol ò inrē Paipöl istutent nö hěngkang chūök?
Akahakūö öm?
Yěi rahëichtöre mikah elnang ṙung tö nup haköpre, ngaich halööktitvö anū-ö. Kūö yòh? Pön öt harīkngöre ngam inlahen hī tö inlahen ngam tavūöi yěn meutlö, ngaich yanglöre mat anga-aṅ nö meūkö. Ngatī inlahen inrē ngam Tēv nö hiṙeūtkötīre nö kē-ěkūö hī töm yanāngö aṅ im ṙô ò. (Vë-evkūö Inchōḵ-oṙô 4:18.) Öt haṙī-ingre nun minë aṅmat ngam Paipöl, asā sanīöpö mikah elnang hī pöri tö ṙô ngam Paipöl ngatī inlahen ayī-ö öi halööktit minë tö rahëichtöre mikah elnangre.
5. Teung öi sā ngam minënyöre
Kūö yòh öi ṙamlōn töm minë-enyre öi Vamënyen Yāvē? Röngnyöm VITIŌ, ngaich kakkö ngih intöönö yamih.
-
Kūö yòh öng nö tölöng yěi vë-enyre öi Vamënyen Yāvē?
Kūö yòh yip tarik nö katöllöng tö Yāvē nö vamënyen ò? Hòṅ cha nö vënyen ngam kanô-en inlahen ò, tötṙanāngen angū-ö pön pōyen yip tarik töng lamök ṙô re nö vë-eny nup töng öt kô-en inlahen Yāvē. Töi ngëichkö minë tö nët minyôinyaṅ cha.
Ōt nup tinlööken mahaköptö inlahen ngam Tēv, nö hō-o lōn tö yip tarik nö ṙāḵtö nup insā yěn vë-ekūö ò. Vë-evkūö La-en Lēvī 26:1, ngaich kakkö ngih intöönö yamih:
-
Sitih inlahen mufē ang Yāvē tö inlahen minë insā in ngam vahëkūö meh miröökö?
Ōt yip mahaköptö tinlööken vamënyen Yēsū tö ò nö Tēv. Kô-en hòng angū-ö nö löng? Vë-evkūö Yôhan 20:17, ngaich kakkö minë intöönö yamih:
-
Sitih ṙô öng ngam vahë-ekūö meh töng hěng aich nā Yēsū tö ngam Tēv?
-
Tīni më Vamënyen Yāvē nö chuh in më taṙòkhöre tarik, hòṅ cha nö vënyö ngam kanô-en inlahen Yāvē tö ngam kūön ò inrē. Sitih mufē öm më-eṅ hāngö e?
6. Hangenlōn īhö tö höö
Vënyu yin më tökô-en kristīön tö ngam Paipöl nö sā ṙēngen minë tö ṙōlkangen tūmö pak alaha hī. Vë-evkūö 1 Kòrin 12:25, 26, ngaich kakkö minë intöönö yamih:
-
Sitih inlahen öp min tökô-en Kristīön yěn meuk öp holre tö kihngen?
-
Iṙôken öp maheuk meh hanangenlōn ihôi më Vamënyen Yāvē?
Yěn yīhiv yip Vamënyen Yāvē tö nup kanihngenre nö ikūö panamre, ngaich höng ilööṙen yip tö keuheūtngöre chūök Vamënyen Yāvē nö hayööken cha. Kò-òren ngëichkö ngam töhěng inchō elmat in ngam vitiō, röngnyöm VITIŌ. Ngaich kakkö ngih intöönö yamih.
-
Sitih inlahen öng ngam la-en mineukṙen më tö pala-aiṙen nö hameuknyö hanangenlōn më Vamënyen Yāvē tö më prötör sistör?
Kūö hanagenlōnre më tökô-en Kristīön nö hayööken më tahëng
ṘÔ YIP TAHËNG: “Töng tufömngöre ön kòl ngam tinlööken më Vamënyen Yāvē.”
-
Ihēten ang Yāvē nö kaheuklö më tarik re nö vamënyen ò?
MINË HAKÖP HĪ NGAICH
Tökô-en yin më Vamënyen Yāvē nö Kristīön. Sā töng hěng mikūönö yin nö keuheūtngöre chūök nö ikūö në taṙòkhöre panam. Aṅmat Paipöl nun minë ṙô cha inköphöti, ngaich vënyö ngam kanô-en cha-a inlahen Yāvē nö i taṙòkhöre tarik.
Sitih ṙô öm më-eṅ?
-
Kūö yòh öi hō öi kaheuklöng minë-eny öi Vamënyen Yāvē?
-
Sitih inlahen öi hameuktö hanangenlōnre tö höö?
-
Tökô-en aich tölōn meh më Vamënyen Yāvē nö Kristīön?
NGËICHKÖ NË INRĒ
Ṙūöhtö mikahkūöre tö nuk tö ngaichngen inlahen ih.
Vamënyen Yāvē Tövai nö Inchō Elmat im Ṙinatö-ellōn—Pāt 1: Ṙā-ang El Ngam Sinngūlö (1:00:53)
Ngëichköm töhěng inchō elmat hī inlahen më Vamënyen Yāvē nö hameuknyö minë tövaich inköphöti.
Yěn ōt nup intöönö elkuilōn meh inlahen më Vamënyen Yāvē, isuh öm min teūngen tö nup sanap ṙô u?
“Tö Chöngṙen Intöönö Intönkö Inlahen Më Vamënyen Yāvē” (El vepsāit töhakööpö)
Tö kunyaha elmat ang Istiven tö yip tö tahëngö tinrīken, uroh nö teungta tī nö chökṙen cha. Asuh pöri ngaich ök maheuk ò inlahen më Vamënyen Yāvē töp lökten ò nö haṙī-ingre. Ta-a töi mikahtökūöre.
“Höng Iṙūöhöng Röön Chū-ö In Minë Tötlöng” (Chūökamahati-E, ātiköl)
a Löktö kūö im 1879 in öi katān ngam Chūökamahati, hòn sölta ngam kanô-en aṅmat Paipöl nö in yip tarik.
