Hö-ö an ngam Tēv Yāvē nö Tēv ötlanënen. (1 Kòrin 14:33) Ngatī maheūkka in inrē in yip tarik ò tö cha min nö lēnö inlahen nö la-evṙen. Sitih inlahen Yāvē nö hachōkūö minë māṅ? Sitih inlahen öi min ayī-ö öi holṙen më töla-evṙen tö lēnö inlahen? Töi mikahtökūöre.

1. Achīö öp kui në māṅ?

Ngö ṙô an ngam Paipöl: “Tö Kristū nö kui në Māṅ.” (Efisös 5:​23) Löktö el halīöngö ang Yēsū nö ngëichken minë la-en më tarik ngam Tēv Yāvē. Nö sitih inlahen? Nöng vīlö më “tökô-en hēk tö-akaha mahalanṙen.” Yōm La-en ngö in tö cha më töng kun kun nö kiteūm töhuveū-en pöri nö la-evṙen, töhuveū-en yin nö minṙöinylen. (Vë-evkūö Mëtiv 24:45-​47.) Ṙama-ang in më Yōm La-en nun minë inlēnö chamuh in minë māṅ tö keuheūtngöre chūök. Ngatī inlahen kinëti minë inlēnö nö in yik mu-urěh Kristīön nö i Yerūsalem tö yik tanīnöṙô hēk minṙöinylen inrē. (Inlahen 15:2) Hö-ö yin më holmaneuk hī Yōm La-en nö kui ngam söngkötön ngam Tēv. Pò cha nöng tumṙeūtöre tö Yāvē, hang minë inlēnö inrē aṅmat ngam Paipöl, tumṙeūtöre inrē cha-a tö Yēsū ngam kui në māṅ.

2. Asūp la-en më minṙöinylen nö el minë māṅ?

Töhuveū-en yin më minṙöinylen nö haköptö më tarik Yāvē nöng löknyö mat ngam Paipöl. Sā yōm pöököre cha-a nö haṙūötken më holmaneuk re hayööken cha inrē. Hö-ö yin nö tö reushu nö in ngam la-en re, ‘kanahang lōnre yin, öt rēhĕn nö kūö taneūngen tö yô-òv, töhōḵ pöri nö lōn.’ (1 Pītör 5:​1, 2) Ōt yin më prötör mahayööken më minṙöinylen el minë māṅ, mahayööken töla-evṙen ngö ṙô in tö cha, më tö mihôiṅ min nö unôichngöre nö vīlöng nö minṙöinylen.

Vahīlö më Yōm La-en yin më sörkit ovösīör, cha-a yin chamöhken minë māṅ tö keuheūtngöre chūök. Kamëtö inlēnö inrē nö in më prötör sistör el minë māṅ, hareuskö alaha cha inrē. Cha-a yin kamtöllen më minṙöinylen tö më mahayööken töla-evṙen yěn teung minë tinrīken cha nö sā ṙô ngam Paipöl.​—1 Timôtī 3:​1-​10, 12; Taitös 1:​5-9.

3. Hòṅ asuh öp la-en më Vamë-eny nö ṙòkhöre?

Hòṅ ṙòkhöre yin më vamë-eny nö “Ha-öiny ngam mine-eny ngam Mā Tēv[Yāvē].” (Vë-evkūö Salmai 148:12, 13.) Öt höng yamihtökūö yin nö el minë mitīng pön kētöre nö in u. Ahangköm tölöök inhānga inrē sā tölngö kanô-òre.

 MIKAHTÖKŪÖRE HĒK

4. Kamëtö hanöhlö Yēsū nö mā

Holtö hanangenlōnre ang Yēsū nö tölṙô hī öi hō-en ò nö mā. Vë-evkūö Mëtiv 11:28-​30, ngaich kakkö minë intöönö yamih:

• Sā ṙô ngam vahëkūö meh asūp min taneūngen hī yěi yihtöre in Yēsū?

5. Öt höng ṙô-òv më minṙöinylen pön kētöre inrē nö la-evṙen

1. Ngön ngam innôlö më minṙöinylen nö in Yāvē, hayööken më mikūönöre inrē cha-a nö ngatī

2. Chumkūöṙen yin më minṙöinylen tö më taṙòkhöre tarik aṅ minë māṅ

3.   Kalēḵ alaha yin më minṙöinylen nö ahangköm tölöök inhānga

4. Haköphöti yin më minṙöinylen nö el minë māṅ. Kētöre inrē nö im inhëtö tö minë tahëng la-en el ngam māṅ

6. Hòṅ keuheūttö ellōnre in hang chööngö më minṙöinylen

Vë-eny nang hī an ngam Paipöl tö minë lānyngen hī ötkô öi öt hang chööngö më minṙöinylen el minë maṅ. Vë-evkūö Heprāi 13:17, ngaich kakkö minë intöönö yamih:

• Hareuskö alaha hī ngam Paipöl öi elkatòh chööngö më mahachōkūöre. Löng öng tö lōn meh? Kūö yòh öm ngatī mufē?

Vë-evkūö Lūkös 16:10, ngaich kakkö ngih intöönö yamih:

• Kūö yòh öi hòṅ hang nup chööngö më minṙöinylen, pòrô anū-ö nö töng rahëichyen?

 MINË HAKÖP HĪ NGAICH

Yēsū an tö akaha nö kui në māṅ. Hang chööngö ò yin më minṙöinylen, hareuskö alaha hī yin inrē. Lökten öi ṙamlōn öi hang nup chööngö cha.

Sitih ṙô öm më-eṅ?

• Achīö öp kui në māṅ?

• Asuh nup la-en më minṙöinylen nö chö-öny tö minë māṅ?

• Hòṅ asūp la-en ngòh töhěng tak tarik Yāvē nö el ngam māṅ?