LESÖN 21
Sitih Inlahen Inhangkö Öng Ngam Tölöök Inhānga?
Höng Yāvē an min kamëngen në taṙòkhöre kanihngen hī nö löktö in ngam Pūlngö re tī. Hòṅ vënyen e in öi i taṙòkhöre tarik. Lökten ang Yēsū nö lōnu tö yik haköptöre nö vë-eny nang taṙòkhöre töm tölöök inhangkö ngam Pūlngö. (Mëtiv 28:19, 20) Sitih inlahen aich më Vamënyen Yāvē nö hang ngam chööngö kahëtö Yēsū? Töi mikahtökūöre.
1. Sitih inlahen taneungtökūö öng ngam Mëtiv 24:14 töngamuh?
Ngö ṙô ang Yēsū: “Ahangka min ngih tölöök inhangkö ngam Pūlngö, i në taṙòkhöre panam.” (Mëtiv 24:14) Ṙamlōn in īhö Vamënyen Yāvē töngamuh öi kētöre in ngih la-en inhangkö ngam tölöök inhānga. Ngaich in pōyen tö tö 1,000 tumkangen ëlô öi ahangken e öi ikūö në taṙòkhöre panam. Kô-en ngih la-en nö kiröng lökten öi hòṅ kalēḵ alaha, hòṅ lēnö inlahen, hòṅ ṙētakvö inrē öi kēken e. Yěn öt holṙen hī pöri Yāvē, öthō min angū-ö nö kū-ö urěh.
2. Iṙôken kumlēḵ alaha öi yěi ahangkö ngam tölöök inhānga?
Öp töng chūök ih öi meukkūö më tarik, öt hō öi öt vë-eny nang cha tö ngam tölöök inhānga. Öi asīnken yik mu-urěh Kristīön nö ‘chuh kūö minë patī’ nö ahangkö ngam tölöök inhānga. (Inlahen 5:42) Kūö inlēnlö kinëken ngih la-en in öi teungta in më tarik tö lāku ṙôken hamang ngam tölöök inhānga i töhěng samyeūheu. Yěn hö-öv cha-a nö i patī, ngaich tahëng ngö chūökre öi chöhö cha. Höng chöh ṙētakre in öi vë-eny inlahen Yāvē tö minë kuilōn ò inrē.
3. Achīö yip tö kē-ěvkūö tö ngih la-en inhangkö ngam tölöök inhānga?
La-en yip taṙòkhöre tökô-en Kristīön ön ngih la-en inhangkö ngam tölöök inhānga. Kaheūkö e in nö tötṙanāngen. Ip tölngö kanô-òṅre in öi vë-eny nang yip tarik. Pöi akahalōn min tö cha nö aṅ yěn hang ngam tölöök inhānga. (Vë-evkūö 1 Timôtī 4:16.) Öt tö reushu in öi in ngih la-en, pön ngö ṙô ngam Paipöl: “Öt ṙāyu tī yin kē-ĕ e; un ṙāyu kinëngö.” (Mëtiv 10:7, 8) Pòrô yip tarik nö sōḵ nö hang. Sön öi höng iṙūöhen öi ahangkö ngam tölöök inhānga, pön inlahen ih angū-ö inrē öi ha-öiny ngam Tēv. Ṙamlōn inrē ang Yāvē yěi ngatī inlahen.
MIKAHTÖKŪÖRE HĒK
Mikahtökūöre hēk tö ṙôken kumlēḵ alaha më tö keuheūtngöre chūök Vamënyen Yāvē nö ahangkö ngam tölöök inhānga, ngaich sitih inlahen ang Yāvē nö holṙen cha.
Minë panam chūök inhangkö ngam tölöök inhānga töngamuh: (A) Kòsta Rika, (B) Amërikā, (C) Pënin, (D) Tāilën, (E) Yap, (F) Suītön
4. Ma-ainyre öi meukkūö taṙòkhöre tarik
Keuheūttö inlahenre in öi vë-eny nang më tarik tö ngam tölöök inhānga, kò-òren cha-a nö i mana-angkūö ngih panam nö iyöng. Röngnyöm VITIŌ, ngaich kakkö ngih intöönö yamih.
-
Sitih mufē öm yěm meuk ṙôken kumlēḵ alaha më Vamënyen Yāvē nö ahangkö ngam tölöök inhānga?
Vë-evkūö Mëtiv 22:39 hēk Rōma 10:13-15, ngaich kakkö minë intöönö yamih:
-
Sitih inlahen öng ngam la-en ih inhānga nö hameukten ih öi hangenlōn tö më tarik?
-
Sitih inlahen mineūkö ön minë kalröön më ma-ahangkö ngam tölöök inhānga tö Yāvē?—Ngëichköm 15 miröökö.
5. Höng hamòlṙen ngam Tēv in
Pōyen nun minë ekspīriön vamënyen Yāvē nö hacho-okūö ngih la-en. Ngëichkö ngam töhěng inlahen Pôl ngam aṅ Niū Chilen. Hē ò nö chuh kūö patī nö ahānga ik töhěng sakamö unôichrit tö nëtsīön köiny ṙô, ngaich meuk ök töhěng tak anga-aṅ yöngnyīö vamë-ekūö Yāvē nö vë-ekūötēv nö havëkö inyöökenre nö in ò, pön hòṅ haköp inlahen ò. Ngö ṙô ang Pôl: “Ilöö umuh ngaich chū-ö tö kinheūtö ṙô ò nö vë-ekūötēv unôichrit tö lūöi kanta.”
Vë-evkūö 1 Kòrin 3:9, ngaich kakkö ngih intöönö yamih:
-
Sitih inlahen öng ngam inlahen Pôl tö minë tahëng ekspīriön nö hameukten Yāvē nö hacho-okūö ngih la-en inhānga töngamuh?
Vë-evkūö Inlahen 1:8, ngaich kakkö ngih intöönö yamih:
-
Kūö yòh öi hòṅ hayöökaṙen tö Yāvē öi keuheūtngen ngih la-en inhānga?
Akahakūö öm?
Harūnö in ṙung öi el minë mīting ihôi minë afta öi ahangkö ngam tölöök inhānga. Yěm ngaich yihtökūö öm in u, sitih lōn öm tö minë inrūnö hī öi el minë mīting?
6. Hang chööngö ngam Tēv in lökten öi ahānga
Akahakūö yik mahaköp nö in Yēsū tö cha nö tö kē-ěvkūö tö chööngö re nö ahānga. Hē yik tö kunyaha elmat pöri nö hòṅ asökngö inlahen cha. Ngaich kahòklökui re cha-a nö in yik mā mahayöng nö ‘laklö ngam tölöök inhānga.’ (Filipī 1:7) Ngatī inlahen yin töngamuh më Vamënyen Yāvē. a
Vë-evkūö Inlahen 5:27-42, ngaich kakkö ngih intöönö yamih:
-
Kūö yòh öi min öt ṙāngenre öi ahangkö ngam tölöök inhānga?—Ngëichkö minë miröökö 29, 38 hēk 39.
ṘÔ YIP TAHËNG: “Kūö yòh aich më Vamënyen Yāvē nö chuh kūö minë patī nö ahānga?”
-
Sitih ṙô öm min më-eṅ?
MINË HAKÖP HĪ NGAICH
Kētö chööngö yik haköptöre ang Yēsū nö ahangkö ngam tölöök inhānga nö i taṙòkhöre tarik. Holṙen më tarik re ang Yāvē nö kēken ngih la-en.
Sitih ṙô öm më-eṅ?
-
Sitih inlahen inhangka öng ngam tölöök inhānga töngamuh nö i në taṙòkhöre panam?
-
Sitih inlahen öng ngam la-en hī inhānga nö hameukten hī öi hangenlōn tö më tarik?
-
Ṙamlōn öi tö lōn meh yěi ahangkö ngam tölöök inhānga? Kūö yòh öm ngatī ṙô?
NGËICHKÖ NË INRĒ
Meuk inlahen më Vamënyen Yāvē nö ahānga nö in minë tökiröng elpanam.
Sitih inlahen aich më Vamënyen Yāvē nö hayööken më tarik ṙamāngö panamre?
Höhlö Më Tarik Ṙamāngö Panamre Pön Hang Ngam Tölöök Inhānga (5:59)
Hang ṙô ngòh kanānö hī kumheuttö ṙētakre, nö vë-eny kumchikṙenre nö löklōn ngam Tēv.
Vë-ekūö minë tö haroh tūmö minhôiṅyö ih kahòklö kuire in yip mahayöng, lökten ngaich öi öt yaha kanihngen öi ahangkö ngam tölöök inhānga.
a Yāvē an kamëtö chööngö hī öi ahānga. Lökten in mihôiṅ öt havë-engritre öi in vē mā mahayöng yěi ahangkö ngam tölöök inhānga.
