Ṙòkhöre yip tö hòṅ haköp nö in Yēsū nö hòṅ kēḵ ngam vinôkö. (Vë-evkūö Mëtiv 28:19, 20.) Asuh öng rih ngam vinôkö? Hòṅ sitih inlahen ang ngòh töhěng tak tarik, yěn hòṅ kēḵ ngam vinôkö?

1. Hòṅ sitih inlahen öi yěi kēḵ ngam vinôkö?

Hòṅ “chupeuktu” in öi el mak, yěi kēḵ ngam vinôkö. Pön tö ngatī manah ngam ṙô “vinôkö” nö i ṙô Krīk. Ngatī vinôkö misī ang Yēsū nö el ök tahël Yôtön nö chupeuktu ngaich ‘yôklö anga-aṅ nö ṙā-ang el mak.’ (Mëtiv 3:​13, 16) Hòṅ ngatī inlahen vē tökô-en Kristīön nö hòṅ chupeuktu nö el mak, yēḵ cha nö kēḵ ngam vinôkö.

2. Hameuktö yòh öng ngam vinôkö ngòh töhěngtak tarik?

Yěn vōkö ngòh töhěng tak tarik, ngaich hameuktöre anga-aṅ nö keuheūttöre tī nö kētö ngam nômöre nö eltī Yāvē. Asuh öp manah ngam kinëtöre? Ngam inlahen ò nö vë-eny nang Yāvē tö ò min nö örheūheu nö urěhlö nup töng kuilōn Ò tö nup töng kuilōnre. I nup inlahen re min anga-aṅ nö ‘hameuktöre nö hayëḵngenre, ngaich örheūheu nö hang nup inköphöti ṙô’ Yēsū, ngaich pītnyöre nö tömköröön ò. (Mëtiv 16:24) Yēḵ ngòh tarik nö kētöre, ngaich kēḵ ngam vinôkö, ngaich ngönlöre ngam innôlö ò nö in Yāvē in më prötör sistör inrē el ngam māṅ.

3. Hòṅ sitih inlahen tinrīken ang ngòh tarik urēhěkūö ò nö kēḵ ngam vinôkö?

Yěn hòṅ kēḵ ngam vinôkö ngòh töhěng tak tarik, ngaich hòṅ haköp ngam kanô-en anga-aṅ inlahen Yāvē, hangönlö ngam ṙinatö-ellōnre inrē nö in ò. (Vë-evkūö Heprāi 11:6.) Sā ṙôken sanīöpö ngam mikahkūö ò min tö Yāvē, ngatī ṙôken sanīöpö min ngam hanangenlōn ò tö ò. Holtö ellōnre min anga-aṅ nö vë-eny nang yip tahëng tö inlahen Yāvē, kēkö kaha nup haköpre inrē. (2 Timôtī 4:2; 1 Yôhan 5:3) Yēḵ ‘minë tinrīken ò min nö sā tinrīken yip lamöklōn Yāvē,’ ngaich möl min anga-aṅ nö mihôiṅ nö kētöre, ngaich kēḵ ngam vinôkö.​—Kòlòsi 1:​9, 10. a

 MIKAHTÖKŪÖRE HĒK

4. Asuh öp haköplö hī im inlahen Yēsū nö vōkö?

Yěm hòṅ ṙūöhtö mikahkūöre tö inlahen ngam vinôkö Yēsū ngaich vë-ekūö ngam līpöre Mëtiv 3:​13-​17. Ngaich kakkö minë intöönö yamih:

• Höng fulka ök misī Yēsū hē ò nö vōkö?

• Höng vōktu kui ök misī Yēsū tö ngam mak hē ò nö vōkö? Sitih inlahen vinôkö ök ṙöng?

Unôichrit inlahen Yēsū nö vōkö, ngaich ilööṙen anga-aṅ nö kētöre nö in ngam tötṙānangen la-en, ngam chö-öny ò nö tīntu tö Yāvē nö ing panam. Vë-evkūö Lūkös 3:​21-​23 hēk Yôhan 6:​38, ngaich kakkö ngih intöönö yamih:

• Asuh ök la-en tö mötlö nö imat Yēsū, unôichrit ò nö kēḵ ngam vinôkö?

5. Mihôiṅ man kēḵ ngam vinôkö

Kô-en man min öt lööṙen öm kētöre hēk kēḵ ngam vinôkö inrē. Uh pöri öm pa-ekūö. Höng iṙūöhen pöri öm haköp inlahen Yāvē ngaich yih min öp ṙētak meh höng kahngenre akahakūö tö inlahen meh yěm mihôiṅ ngaich öm kētöre öm kēḵ ngam vinôkö. Töi ngëichkö inlahen më tarik tö sā mufē meh, röngnyöm VITIŌ.

Vë-evkūö Yôhan 17:3 hēk Yāköp 1:5, ngaich kakkö ngih intöönö yamih:

• Hòṅ sitih inlahen ang ngòh töhěng tak tarik yěn hòṅ kēḵ ngam vinôkö?

1. Ngam inlahen ngòh töhěng tak tarik nö hòṅ vë-eny nang Yāvē tö ò min nö örheūheu nö urěhlö nup töng kuilōn ò tö nup töng kuilōnre

2. Yěn vōkö ngòh töhěng tak tarik ngaich hameuktöre anga-aṅ nö keuheūttöre tī tö ngam nômöre nö eltī Yāvē.

 6. Yěm vōkö ngaich kaheuktu öm tūmö alaha ngam mikūönö Yāvē

Sā töng hěng mikūönö yin më Vamënyen Yāvē tökeuheūt ngöre chūök nö ikūö ngih panam. Kô-en yin nö iyöng nö söl mana-angkūö ngih panam, öt hěngren ngam inruklö cha, sön nöng hēngö ṙinatö-ellōn, hēngö inlahen inrē nö kēkö kaha minë haköpre. Yěn vōkö ngòh töhěng tak tarik, ngaich kaheuktu anga-aṅ nö tūmö alaha ngih mikūönö. Vë-evkūö Salmai 25:14 hēk 1 Pītör 2:​17, ngaich kakkö ngih intöönö yamih:

• Sā ṙô minë miröökö, asuh öp yanöölen öp tarik yēḵ ò nö kēḵ ngam vinôkö?

 MINË HAKÖP HĪ NGAICH

Haköpten hī ang Yēsū, tö ngòh tarik tö hòṅ haköp nö in ò, nö tö hòṅ kēḵ ngam vinôkö. Hòṅ ngön ngam ṙinatö-ellōn ò nö in Yāvē, hòṅ kēkö kaha minë haköpre, hòṅ keuheūttöre tī inrē nö kētö ngam nômöre nö in Ò.

Sitih ṙô öm më-eṅ?

• Tö hòṅ sitih inlahen kinëti öng ngam vinôkö? Kūö yòh öi kēḵ ngam vinôkö?

• Asuh öp manah ngam kinëtöre töm vinôkö?

• Hòṅ sitih inlahen ang ngòh tarik yěn hòṅ kētöre hēk kēḵ ngam vinôkö?