LESÖN 28
Ha-öiny Ngam Hanangenlōn Yāvē Hēk Yēsū Inrē
Sitih lōn öm öre yěn kē-ěkūö meh öp hol meh töp tövai inlōnti? Hö-ö öm min ṙamlōn? Ngaich hòṅ ha-öiny tī ò nö alōnten meh. Ngatī in ayī-ö inrē kē-ěvkūö tö Yāvē hēk Yēsū töm töt insa-av inlōnti. Asuh öng angū-ö inlōnti? Sitih inlahen öi min ha-öiny ngam kinë-ekūöre? Töi mikahtökūöre.
1. Asuh öp töhěng inlahen hī öi ha-öiny ngam kinë-ekūöre tö ngam Tēv hēk Kristū inrē?
Kilēḵngôre an ngam Paipöl tö yip töng ‘ṙamatö-ellōnre nö in Yēsū nö teūngen min tö ngam nômö tö-örheūheu-aṅ.’ (Yôhan 3:16) Öt kô pöri öi höng vë-eny re ṙatö-ellōnre tö Yēsū nö kapah tö pòkūö hī. Pön hòṅ meūkö nup la-en hī nö inup ṙô hī, inlahen hī inrē. (Yāköp 2:17) Yēḵ hī min ngatī inlahen ngaich ngönlöre min ngam innôlö hī öi in Yēsū, tö ngam yöng ò inrē Yāvē.—Vë-evkūö Yôhan 14:21.
2. Asuh öp tö mötlö inlahen hī yěi hòṅ ha-öiny ngam kinë-ekūöre tö Yāvē hēk Yēsū inrē?
Vë-eny nang yik haköptöre ang Yēsū tö ngam tahëng hēk inlahen hī yěn hòṅ hameuktö minlēḵṙen re tö ngam kinpaha ò. Urēhěkūö ngam hatööm finëlngö re ang Yēsū nö rěhlörit infēkö ngam sakāmö kinpaha ò ngam ‘Töhet Inmūlkūö Ngam Mā’ tö ṙô ngam Paipöl. Tö kēkaṙen tö hī nö infēkö ngam kinpaha Kristū, lökten öi Memorīöl ngö ṙô tö e. (1 Kòrin 11:20) Rěhlöngrit angū-ö tö Yēsū misī, hòṅ yik tanīnöṙô tö yik mu-unôichrit cha tökô-en Kristīön nö haköpkö lōn re min tö Yēsū nö kēngö nômö re tö pôkūö cha. Lökten ang Yēsū nö kētö ngih chööngö nö ngö ṙô: “Ngati tī pöichö, haköpkölōnre tö Chu.” (Lūkös 22:19) Mihôiṅ man yihtökūö im infēkö kinpaha ò öm hameuktöre öm ha-öiny ngam hanangenlōn Yāvē hēk Yēsū inrē tö hī.
MIKAHTÖKŪÖRE HĒK
Asuh nup hēk kò-òren inlahen hī öi hameuktöre öi ha-öiny ngam hanangenlōn Yāvē hēk Yēsū inrē tö hī? Kūö yòh öi hòṅ yihtökūö öi el ngam Memorīöl? Töi mikahtökūöre.
3. Sitih inlahen öi min yěi lökngöre ellōn tö nup inyöökenre?
Asehkūöre man, yěm hòṅ pökngö öm el mak ngaich hěng tak öp tarik yamihtöre nö hayööken meh, vaichngö öm min tö tī ò nö hayööken meh? Ha-öiny ngam tī ò ṙöng, kūö ò pön laklö ngam nômö meh?
Kirööngen tī ang Yāvē nö laklö ngam nômö hī ngaich kētö ṙētak hī inrē öi teūngen tö ngam nômö tö-öreūheu-aṅ. Vë-evkūö 1 Yôhan 4:8-10, ngaich kakkö minë intöönö yamih:
-
Kūö yòh öng ngam kinpaha Yēsū nö töpōiṙāi nö inlōnti?
-
Iṙôken öp ngaich ṙanamlōn meh yěm fēkö inlahen tī Yāvē hēk Yēsū inrē nö in meh?
Yēḵ hī min öi ha-öiny ngam kinë-ekūöre tö Yāvē hēk Yēsū inrē ngaich sitih inlahen min ayī-ö? Vë-evkūö 2 Kòrin 5:15 hēk 1 Yôhan 4:11; 5:3. unôichrit ṙô meh öm vë-ekūö minë miröökö, ngaich kò-òren öm kētö sanapṙô ngih intöönö yamih:
-
Sā ṙô minë miröökö vahë-ekūö meh, hòṅ sitih inlahen öi yěi hòṅ ha-öiny tī Yāvē hēk Yēsū inrē tö minë kinë-ekūöre?
4. Tömköröön Yēsū
Ngam tahëng hēk inlahen hī kò-òren, yěi hòṅ hameuktöre öi ha-öiny ngam kinë-ekūöre tö Yēsū öi höng tömköröön ò. Vë-evkūö 1 Pītör 2:21, ngaich kakkö ngih intöönö yamih:
-
Asuh nup tahëng hēk inlahen hī yěi hòṅ ha-öiny ngam kinë-ekūöre tö Yēsū?
Hangenlōn ök Yēsū tö ngam Ṙô ngam Tēv, ahānga anga-aṅ, hayööken yik tahëng tarik inrē
5. Yihtökūö man im Memorīöl infēkö kinpaha Kristū
Asuh nuk maheuk hī tö kēkaṙen, hē kinëken ngam raneh Töhet Inmūlkūö Ngam Mā. Yěm hòṅ mikahtökūöre ngaich, vë-ekūö Lūkös 22:14, 19, 20. Ngaich kakkö minë intöönö yamih:
-
Sitih inlahen kinëken öng ngam Töhet Inmūlkūö Ngam Mā?
-
Minkahngö yòh öng ngam ròtī hēk tö ngam vāin?—Ngëichkö minë miröökö 19 hēk 20.
Lōnu ang Yēsū tö yik haköptöre nö hěngheuh i tö hěng samyeūheu nö holkūö re nö nyā ngam Töhet Inmūlkūö Ngam Mā nöng im sakamö kinpaha ò. Lökten yin më Vamënyen Yāvē nö kaheuk samyeūheu nö hamūlöre nö fēköm kinpaha ò. Ngatī inlahen cha-a nö fēkö ngam kinpaha ò nöng sā ṙô Yēsū nö tölṙô cha. Yěm hòṅ mikahtökūöre tö inlahen cha, nö afēkö ngam kinpaha Yēsū ngaich, röngnyöm VITIŌ. Ngaich kakkö ngih intöönö yamih.
-
Sitih inlahen öi yěi kēken ngam Memorīöl?
Höng minkahngö nun minë rôti hēk tö ngam vāin inrē. Ngam rôti nö minkahngö ngam töhet alaha Yēsū ngam tökētu tö ò tö pòkūö hī. Ngaich ngam vāin nö minkahngö ngam mahām tökitaknyuvö tö ò töpòkūö hī
ṘÔ YIP TAHËNG: “Höng ṙatö-ellōnre man yěh tö Yēsū nö mā, öthō öm öt hayöökaṙen.”
-
Sitih ṙô öm min öm mikahtö elnang cha öm löknyö mat ngam Yôhan 3:16 hēk Yāköp 2:17 tö hī ötkô öi höng ṙatö-ellōnre öi in Yēsū?
MINË HAKÖP HĪ NGAICH
Yēḵ hī öi in nup ṙô re, inup la-enre hēk nup katöllö hī inrē la-en öi hameuknyö ngam ṙinatö-ellōnre. Ngaich yihtökūö öi el Memorīöl ngaich hameuktöre ayī-ö öi ha-öiny ngam inlahen Yēsū nö kēngö nômöre töpòkūö hī.
Sitih ṙô öm më-eṅ?
-
Tö Sitih manah öng ngam inlahen hī öi ṙatö-ellōnre in Yēsū?
-
Sitih inlahen öm min hameuktöre ha-öiny ngam kinë-ekūöre tö Yāvē hēk Yēsū inrē?
-
Kūö yòh öi ötkô öt yihtökūö öi el Memorīöl?
NGËICHKÖ NË INRĒ
Asuh öp inreuskö alaha hī öi löktö im kinpaha Yēsū?
Asuh öng ngam ṙinatö-ellōn, sitih inlahen öi min hameuktöre öi īnu tö ngam ṙinatö-ellōn? Töi mikahtökūöre.
“Ṙatö-ellōnre In Minë Kinlēḵngô Yāvē” (Chūökamahati-HI, Òktopör 2016)
Vë-ekūö ngam istori “Ṙamlōn Chin Ngaich Pön Het Ngam Elkuilōn Chu,” ngaich ngëichkö lanökngöre tinrīken ngam yöngnyīö hē ò nö akahakūö tö Yēsū nö kēngö nômöre töpòkūö ò.
“Vailöre Tinrīken Tīm Paipöl” (Chūökamahati-E, Òköst 1, 2011)
Kūö yòh nöng öt ṙōltak më nyamā ngam rôti hēk òk ngam vāin inrē nö im Memorīöl, töi mikahtökūöre.
