Yěn kapah ṙung yip hol maneuk hī ngaich haṙivlōn ayī-ö. Ngatī miṙivlōn öm ṙung më-eṅ? Lohten në intöönö nö yih nö ellōn meh, ‘sitih inlahen ang ngòh tarik unôichrit ò nö kapah? Havanlöre yik hol hī min nö hēk? Hēk öi min meukkūö cha?’ In ngih lesön hēk in öp yamih min lesön öm teūngen tö sanapṙô u, nöng löknyö mat ngam Paipöl. Öthō man min öt teūngen tö hanöhlöre hēk ṙamlōn inrē, yěm teūngen tö sanapṙô u.

1. Sitih inlahen ang ngòh tarik unôichrit ò nö kapah?

Kaheuktu an ngam kinpaha tö Yēsū nö sā ṙēngen öp tarik tö lapat nö im inṙòhö. Öt hēngö mikahngen ön ngòh tarik tö lapat nö haṙòh. Ngatī ngòh tarik unôichrit ò nö kapah nö öt hēngö mikahngen, öt hēngö chanöökö, öt rēhěn nöng rahëichyen kanihngen. Lökten ön nö kūichi nö imat ngam Paipöl nö ngö ṙô: “Öt mikahavlōn pöri ngam tökapah.”​—Vë-evkūö Mumkahten 9:5.

2. Asūp min yanöölen hī yěi akahakūö tö ngam kanô-en inlahen yik tökapah?

Pōyen tarik tö vöö nö kapah, vöö inrē cha-a yěn hakihtuṙen tö yip tökapah. Yěi akahakūö pöri min tö ṙô ngam Paipöl nö vë-eny inlahen yip tökapah, ngaich falngöre min ngam vanööṙö hī, teūngen inrē ayī-ö tö hanöhlöre. Ngö ṙô ang Yēsū: ‘Luhnyen meh an min ngam kanô-en.’ (Yôhan 8:​32) Pōyen nup tinlööken tö ngö ṙô nö haköphöti, tö ngam ma-alaha ngòh tarik nyin nö ōttit nöng aṅ unôichrit ò nö kapah. Öt hěngkang chūök pöri ngih töngatī inköphöti nö imat ngam Paipöl. Afītöre öm chěi, sitih inlahen ang min ngòh tarik nö kihngen unôichrit ò nö kapah. Yěn öt akahaiṙen ngòh tarik tökapah ngaich sitih inlahen min anga-aṅ nö hakihten hī? Yanööluṙen öi rih min yěi afēken cha öi vī tökiröng nyina-aṅ, vë-ekūö cha hēk vë-elkui cha inrē?

Ōt yip tarik vamë-enyre tö cha nö mihôiṅ nö vë-ekūö yip tökapah. Sitih inlahen angū-ö nö ngatī? Sā ṙô ngam vahë-ekūö hī pöri taheui nö ngö ṙô, “öt mikahavlōn pöri ngam tökapah.” Asehkūöre öm chěi, tö yip tarik yěn öt vë-ekūö yip tökapah, achīö öp rih vahë-ekūö cha? Un höng vë-ekūö yip tötlöök ma-ahānga röh? Lohten mihôiṅ nö ngatī, pön hòṅ halō-ongkūö tarik yip tötlöök ma-ahānga nö asīnkö ṙô yik tökapah nö ṙô-òv. Lökten yěi akahakūö min tö ngam tökô-en inlahen yik tökapah ngaich laklöre min ayī-ö tö yip tötlöök ma-ahānga. Fēḵlen hī inrē ang Yāvē tö hī ötkô öi vë-ekūö yip tökapah. Pön akahalōn anga-aṅ tö yip tötlöök ma-ahānga min nö mihôiṅ nö halō-ongkūö hī.​—Vë-evkūö I. Chööngö 18:10-​12.

3. Ngam kanô-en inlahen yip tökapah

Sitih inlahen ang ngòh tarik unôichrit ò nö kapah. Öt hěngren ngam ṙinatö-ellōn më tarik aṅkūö ngih panam tö inlahen yip tökapah. Sitih inlahen ön min minë ṙô cha nö ṙòkhöre nö löng?

• Asuh öp ṙinatö-ellōn yip tarik aṅkūö panam meh tö inlahen yip tökapah?

 4. Yöölen yěi akahakūö tö inlahen yip tökapah

Yöölen in yěi akahakūö tö ngam kanô-en inlahen yik tökapah, pöi öt pa-ekūö min tö cha. Vë-evkūö Mumkahten 9:​10, ngaich kakkö ngih intöönö yamih:

• Mihôiṅ yik hol hī tö ngaich nö kapah nö hakihten hī?

Pōyen yip tarik ṙamatö-ellōnre tö hī öi hòṅ haṙamlōn yip tökapah, öi kēken minë la-en kui panam öi afēken cha. Ṙānyen hī pöri ngam kanô-en öi ṙā-ang in u nö ṙòkhöre. Vë-evkūö Isayā 8:19 hēk Inmeukhömat 4:11, ngaich kakkö ngih intöönö yamih:

• Sitih mufē ang Yāvē tö lōn meh, yēḵ tarik nö vë-ekūö yip tökapah, havëkö inyöökenre inrē nö in cha?

5. Höhlö in yěi akahakūö töm kanô-en inlahen yik tökapah

Pōyen ngaich tarik töhaköptuvö tö cha min yěn chōichö la-en, ngaich hakihtuṙen min cha-a unôichrit kinpahare. Höhlö pöri öi hang ṙô ngam Paipöl, tö ngòh töhěng tak tarik nö öt hakihtuṙen unôichrit kinpahare, pòrô inrē öp tö pōyen kahëken tö töchōich la-en. Vë-evkūö Rōma 6:7, ngaich kakkö ngih intöönö yamih:

• Kūichi an nö ihih, tö ngòh tarik nö ṙānyu nö ṙā-ang in nup tököölre yēḵ ò ngaich nö kapah. Ōt öp rih tö lōn meh chūök ò nö hakihtuṙen, unôichrit ò ngaich nö ṙānyu nö ṙā-ang inup tököölre?

Sā ṙôken mikahkūö hī min öi in ò tö Yāvē, ngatī ṙôken min öp ṙinatö-ellōn hī tö ò nö öt hakihten yip tökapah. Öt rēhěn inrē nö halöngten tö ngatī. Vë-evkūö Inmeukhömat 15:4 hēk 1 Yôhan 4:8, ngaich kakkö minë intöönö yamih:

• Asuh nup tinrīken Yāvē tö vënyu nö in minë miröökö? Yěn aṅhavin anga-aṅ tö u anū-ö tinrīkenre, mihôiṅ ang rih min nö föng yip tarik nö ikūö öp tötnyangngö kūö tameūyö?

• Höhlö öm, pöm akahakūö tö ṙô ngam Paipöl nö vënyö ngam kanô-en inlahen yip tökapah? Kūö yòh öm min ngatī ṙô?

 MINË HAKÖP HĪ NGAICH

Öt ōttit unhômö ön ngòh tarik tö ngaich nö kapah. öt rēhěn nö ōt öp chūök ò nö hakihtuṙen, öt rēhěn cha-a nö kô nö hakihten yip tö aṅ tarik.

Sitih ṙô öm më-eṅ?

• Sitih inlahen öi unôichrit hī öi kapah?

• Asuh nup min la-en ṙahāngö hī yěi akahakūö ngaich tö ngam kanô-en inlahen yip tökapah?

• Sitih inlahen öi teūngen tö hanöhlöre kūö hī akahakūö tö ngam kanô-en inlahen yip tökapah?