Kēngen yik hanangenlōn hī an ngam kinpaha ngaich kētö miṙivlōn hī. Lökten an nö vënyu töm Paipöl nö tökunyaha-elmat. (1 Kòrin 15:26) In ök Lesön 27 man ngaich öm hang inlahen Yāvē tö ò min nö kēngen ngam tökunyaha-elmat tö hī. Sitih inlahen pöri min yik tarik tö ngaich nö kapah? Kilēḵngôre Yāvē tö ò min nö hachohlö yik tarik tö söm van söm köiny ṙôken, hòṅ cha min nö ṙamlōn nö örheūheu nö aṅ. In ngih lesön in min öi mikahtökūöre tö ngih töt insa-av kinlēḵngô Yāvē. Kô-en yik rih tarik tö ngaich nö kapah nö mihôiṅ min nö hachohlöng nö hēk? Isuh yip min nö hachohlöng, el halīöngö hēk ing panam ṙöng? Töi mikahtökūöre.

1. Sitih mufē ang Yāvē tö inlahen yik hol hī tö ngaich nö kapah?

Öt ansökngen an ngam kuilōn Yāvē nö hachohlen yik tarik tö ngaich nö kapah. Ṙinatu-ellōn ök tarik ngam Tēv ang Yōp tö Yāvē min nö öthō nö vaichngen ò, yēḵ ò ngaich nö kapah. Ngö ṙô anga-aṅ nö in ngam Tēv: “Havëken chu min më-eṅ, ngaich [löknyö el anūlö] chū-ö min sapṙô meh.”​—Vë-evkūö Yōp 14:13-​15 NW.

2. Kô-en inchohlö yik min hol hī nö hēk yik tö ngaich nö kapah?

Hē Yēsū misī nö ing panam, kētu kumlēḵ anga-aṅ tö ngam Tēv nö hachohlö tökapah. Hachohlö ök tö 12 samyeūheu ṙēḵti anga-aṅ kikānö, tök töng hěngtak inrē kūön ök tafīösi. (Mākös 5:​41, 42; Lūkös 7:​12-​15) Hachohlö ök holre inrē anga-aṅ Lāsörös, pòrô ngaich nö fën hata sumkam nö el anūlö. Hē Yēsū nö yihtöre nö in ök anūlö Lāsörös ngaich vë-ekūötēv anga-aṅ, ngaich nö ngö ṙô: “Lāsörös; kunyī-inyre man!” ngaich “ngam tökapah nö kunyī-inyre” aṅlö ngaich Lāsörös. (Yôhan 11:43, 44) Asehkūöre man tö ṙanamlōn yik aṅ patī Lāsörös, tö yik hol ò inrē hē cha nö meūkö ò nö aṅ!

3. Asuh öp maheūkkö yik holmaneuk hī yik tö ngaich nö kapah?

Kilēḵngôre an ngam Paipöl: “Tö yik tarik tö ngaich nö kapah nö hachohlöng min nö hēk.” (Inlahen 24:15 NW) In yik tarik tö hachohlöng misī tö Yēsū öthěng tak in cha yamônlö nö el halīöngö, unôichrit cha nö kapah. (Yôhan 3:​13) Lökten hē Yēsū nö hachohlen cha nö ingih panam, ngaich öt haṙivlōn cha-a, keuheūtnyöre pöri tö ṙanamlōnre. Ngatī inchohlö yip min tö köönyu-köönyu ṙôken hol hī tö ngaich nö kapah nö ing panam, ngaich kē-ěvkūö min cha-a tö ngam nômö tö örheūheu aṅ nö el öp peretāis. Ngö ṙô misī ang Yēsū, tö “yip taṙòkhöre el anūlö” nö aṅ min nö hēk. Tö ngö manah, tö yik taṙòkhöre tarik kanöplōn ngam Tēv, nö hachohlöng min nö hēk. Pòrô tarik min nö vaichngö tö cha, öthō pöri Yāvē nö vaichngen cha.​—Yôhan 5:​28, 29.

 MIKAHTÖKŪÖRE HĒK

4. Hameuktöre ang Yēsū nö mihôiṅ nö hachohlö tökapah

Hē ök hol Yēsū ang Lāsörös nö kapah ngaich sitih inlahen anga-aṅ? Yěm hòṅ mikahtökūöre ngaich vë-evkūö ngam Yôhan 11:14, 38-​44, ngaich kakkö minë intöönö yamih:

• Sitih mikahlōn öi tö Lāsörös nö kô-en misī nö kapah?—Ngëichköm miröökö 39.

• Yěn ngaich öre ang Lāsörös nö im kumchikṙen nö el halīöngö, tölṙô ò hòng öre hēk ang Yēsū nö havan nö chuh ing panam tö lōn meh?

Röngyöm VITIŌ.

5. Pōyen yip min tarik tö hachohlöng nö hēk!

Vë-evkūö Salmai 37:29, ngaich kakkö ngih intöönö yamih:

• Isuh chūök inchohlö yip min hol hī tö köönyu köönyu ṙôken?

Pōyen yip min inrē tö hachohlöng tö Yēsū nö hol inchohlö yip lamöklōn Yāvē. Vë-evkūö Inlahen 24:15, ngaich kakkö ngih intöönö yamih:

• Hòṅ achīö öp lōn meh maheukkūö meh hēk?

• Hēk an min Yāvē nö hachohlö yik hol hī. Sitih inlahen nak yöng Fëlisitī nö teūngen tö hanöhlöre hēk nganöönöre nö löktö im invanlö tökapah?

 MINË HAKÖP HĪ NGAICH

Kilēḵngôre ang Yāvē tö ò min nö hachohlö yik hol hī tö köönyu-köönyu ṙôken. Öthěng tak tökô nö asökngen ngam kuilōn ò nö hachohlen cha. Kē-ěkūö Yēsū anga-aṅ tö kumlēḵ, hòṅ ò nö hachohlö tökapah.

Sitih ṙô öm më-eṅ?

• Sitih mufē ang Yāvē hēk Yēsū tö ngam inchohlö yip tökapah?

• Isuh chūök yip tököönyu ṙôken tarik nö hachohlöng, el halīöngö, ing panam ṙöng? Kūö yòh öm ngatī ṙô?

• Kūö yòh öm ṙatö-ellōnre tö yip hol hī min nö hachohlöng nö hēk?