LESÖN 35
Hòṅ Sitih Inlahen Öi Yěi Hòṅ Lööngö Katöllö
Ṙòkhöre in mihôiṅ katöllö nup lōnre. Ōt nup katöllö hī tö lökngöre tī töm tinrīken hī, lökngöre tī inrē tö ngam innôlö hī öi in Yāvē. Tö sā hī yěi hòṅ hapīhö, nup ṙô hī inrē vë-ekūöre el ngam mikūönö, töp chūök hī min iyöng, sitih inlahen öi min ha-aṅ nômöre. Yēḵ hī pöri holtö mikah elmatre öi katöllen u ngaich ṙamlōn min ayī-ö, ṙamlōn tī min inrē tö Yāvē.
1. Sitih inlahen öng ngam Paipöl nö hayööken hī öi vāyö katöllö?
Urēhěkūö hī öi katöllö nup lōnre, ngaich hòṅ havëkö kūö Yāvē ayī-ö tö hinòlṙenre, ngaich haköp mat ngam Paipöl hòṅ hī akahakūö tö mufē Yāvē tö nup katöllö hī. (Vë-evkūö Inchōḵ-oṙô 2:3-6.) Ōt nup chööngö imat ngam Paipöl tinöölö ṙô hī tö Yāvē. Ngaich tölöng ngam inlahen hī yěi hāngö u.
Yěn öt kētu pöri nup chööngö nö imat ngam Paipöl, ngaich sitih inlahen min ayī-ö? Öt hō min ang Yāvē nö öt hayööken hī öi lök ‘el ngam talöökö ngam hameuktö ò nö in hī.’ (Isayā 48:17) Ōt nun minë lökngörit chööngö aṅmat Paipöl kahëtö Yāvē. Hayööken hī min anū-ö öi akahakūö tö mufē Yāvē tö nup katöllö hī. Tö sā hī ṙung yěi vë-ekūö öp töhěng inlahngen aṅmat ngam Paipöl ngaich kôtökūö ayī-ö tö mufē Yāvē tö inlahen e. Lökten yēḵ hī min öi akahakūö tö nup kuilōn Yāvē hēk nup mufē ò inrē ngaich la-evṙen min ayī-ö tö nup tö ṙamölōn tī tö ò.
2. Hòṅ sitih inlahen öi urēhěkūö hī kēḵ nup katöllöre?
Ngö ṙô an ngam Paipöl: “ngëichkö talöökö re pöri ngam tö akaha.” (Inchōḵ-oṙô 14:15) Tö ngö manah an tö hī öi hòṅ urěh chumkūöṙen afēkö ṙòng nup la-enre urēhěkūö hī kēken u. Mihôiṅ öi hatöönöre öi ngö ṙô, ‘asuh öp min lökngörit chööngö aṅmat Paipöl tö mihôiṅ nö hayööken chu? Ṙamlōn öich min tö ngih kahëkenre ip lā-unôich? Asuh öp min lanökngöre yip tahëng tö tī chu? Ngam tö mötlö pöri tö u, ṙamlōn hòng min Yāvē tö nup katöllö chu?’—I.Chööngö 32:29.
Yāvē an tö mihôiṅ nö vë-eny nang hī tö nup tölöng hēk tövaich inrē. Yēḵ hī min öi keuheūtlöre mikahkūö tö minë chööngö hēk tö minë lökngörit chööngö aṅmat Paipöl, lök in u inrē, ngaich teūngen min ayī-ö öi harun ngam töhet elkuilōnre. (Rōma 2:14, 15) Yěi harun ngam elkuilōnre min ngaich hayööken hī min angū-ö öi katöllö nup tölöng la-en.
MIKAHTÖKŪÖRE HĒK
Ngëichkö inlahen minë lökngörit chööngö aṅmat Paipöl hēk tö ngam töhet elkuilōn nö hayööken hī öi katöllö nup la-en re.
3. Hachō-okūö meh an ngam Paipöl
Sitih inlahen ön minë lökngörit chööngö aṅmat Paipöl nö hayööken hī öi katöllö nup la-en kahëken re? Röngnyöm VITIŌ, ngaich kakkö minë intöönö yamih.
-
Asuh öp kinë-ekūö hī tö Yāvē?
-
Kūö yòh anga-aṅ nö kē-ěkūö hī öi kahngenre öi katöllö lōn re?
-
Asuh öp kinë-ekūö hī tö Yāvē nö mahayööken hī öi kahngenre katöllö nup lōn re?
Ngëichkö ngam töhěng lökngörit chööngö aṅmat Paipöl, vë-evkūö Efisös 5:15, 16. Ngaich ‘ lööngö tī öm haṙënngö minë ṙētak’ . . .
-
hòṅ meh örheūheu vë-ekūö mat ngam Paipöl.
-
hòṅ meh öm tö akaha öm inpīhö kikōnyö, kikānö, inyööngö, nyīö kikōnyö, nyīö kikānö inrē.
-
hòṅ meh ṙētakvö öm chuh el minë mīting.
4. Harun ngam elkuilōnre yěm hòṅ vāyö katöllö
Yěn lēnngen vinënyi minë chööngö kahëken hī nö imat ngam Paipöl ngaich lööṙen mihôiṅ öi hāngö u. Sitih inlahen pöri min ayī-ö yěn öt vënyu anū-ö? Röngnyöm VITIŌ, ngaich kakkö ngih intöönö yamih.
-
Sitih inlahen ang ngam sistör imat ngam vitiō nö harun ngam elkuilōn re hòṅ ò nö haṙamlōn Yāvē?
Kūö yòh öi ötkô tölṙô yip holre nö katöllö nup kanahang lōn hī la-en? Vë-evkūö Heprāi 5:14, ngaich kakkö minë intöönö yamih:
-
Kô-en in lööṙen yěi höng tölṙô yip holre nö katöllö nup kanahang lōn hī la-en, hòṅ asuh pöri öp tö hòṅ heuneū-en hī öi kahngenre?
-
Asuh nup mahayööken meh öm harun ngam elkuilōn re hòṅ meh vāyö katöllö?
Sā ṙēngen map an ngam töhet elkuilōn nö mahachōkūö hī öi lööngö talöökö
5. Milēḵṙen tö ngam elkuilōn yip tahëng
Mihôiṅ nup kahëken yip hol hī min la-en nö harīkngöre tö nup la-en kahëken hī. Hòṅ sitih inlahen öi rih yēḵ hī hòṅ milēḵṙen töm elkuilōn yip tahëng? Töi ngëichken në tö nët lāinyngen:
1: Hěng tak ngam sistör chamuh el ngam tufömngöre māṅ, ngam töyal nö cheū-eul keūyö. Ōt pöri yip sistör hī el ngam māṅ tö harīkngöre mufē nö meuk tö cheū-eul keūyö.
Vë-evkūö Rōma 15:1 hēk 1 Kòrin 10:23, 24, ngaich kakkö minë intöönö yamih:
-
Sā ṙô minë miröökö, hòṅ asuh öp öre katöllö ngam sistör? Hòṅ sitih inlahen öm min më-eṅ yěm hōlu töp tarik tö vëka töp elkuilōnre nö kēken öp la-en hinôtö meh töm elkuilōn meh?
Hěng tak ngam prötör tö akahakūö tö ṙô ngam Paipöl tö ngam kineūṅtö nö öt vaich yēḵ hī öt pōivat, hòṅ ṙūöhöngre pöri anga-aṅ töm kineūṅtö. Havëtu kūö anga-aṅ nö nyā tö më hol re aṅ ngam māṅ ò ngaich meuk kūö cha anga-aṅ nö òk ka-eūt.
Vë-evkūö Mumkahten 7:16 hēk Rōma 14:1, 10, ngaich kakkö minë intöönö yamih:
-
Sā ṙô minë miröökö asuh öp min katöllö ngam prötör? Sitih inlahen öm min më-eṅ yěm meuk inlahen öp holre nö kēken öp la-en sinôngen meh töm elkuilōn meh?
Hòṅ sitih inlahen öi yěi hòṅ vāyö katöllö?
1. Vë-ekūötēv man öm havëkö kūö Yāvē tö hinòlṙenre öm lööngö katöllö.—Yāköp 1:5.
2. Chöhö u man minë inlēnö imat ngam Paipöl imat minë līpöre inrē tövī-i nö lökngörit im Paipöl minë tö mihôiṅ nö hayööken meh. Mihôiṅ inrē öm havëkö inyöökenre in yip tö heuveū-en hol maneuk hī.
3. Afēken u man nup tö lökngöre tī tö ngam elkuilōn meh, hēk lökngöre tī tö nup elkuilōn yip tahëng min tö nup kahëken meh.
ṘÔ YIP TAHËNG: “Öp töng yòh kahëken chu. Öt lökngöre chin chū-ö tö nup mufē yip tahëng.”
-
Kūö yòh pöri öi hòṅ ngëichkö mufē Yāvē hēk mufē yip tahëng inrē?
MINË HAKÖP HĪ NGAICH
Yēḵ hī min akahakūö tö nup mufē Yāvē tö inlahen nup la-en kahëken hī ngaich löng hēk vai min nup katöllö hī la-en. Hòṅ afēkö lanökngöre yip tahëng inrē ayī-ö tö ṙòng nup la-en re yēḵ u nö tövai hēk yěn tötvai.
Sitih ṙô öm më-eṅ?
-
Sitih inlahen nup min katöllö meh la-en nö haṙamlōn Yāvē?
-
Sitih inlahen öm min harun ngam elkuilōn re?
-
Sitih inlahen öm min hameuktö minlēḵṙenre tö nup elkuilōn yip tahëng?
NGËICHKÖ NË INRĒ
Katöllö nup la-en re man hòṅ ngam innôlö meh nö in ngam Tēv nö ngönlöre.
“Katöllö Nup La-en Maharōilen Ngam Tēv” (Chūökamahati-HI, Ĕprěl 15, 2011)
Mikahtökūöre takô man tö inlahen Yāvē nö hachōkūö hī.
Kihngen ngam tarik nö katöllö ök töhěng la-en re. Asuh nuk mahayööken ò nö lööngö katöllö? Töi mikahtökūöre.
Sitih inlahen öi min höng iṙūöhen öi haṙamlōn Yāvē, yěn pôrò anga-aṅ nö öt kētö minë chööngö tinöölö ṙô hī nö löknyö mat ngam Paipöl? Töi mikahtökūöre.
“Hòṅ Halēnö Öm Tö Ngam Paipöl Höng Örheūheu?” (Chūökamahati-HI, Tisempör 1, 2003)
