Lōnu in tö yip holre nö kò-òṙô, un michūḵṙen inrē. Ngatī maheūkka inrē ang Yāvē tö yip holre. Öt lööṙen pöri öi chiplö ikūö ngih panam. Pōyen pöri minë yanöölen hī, yěi öt michūḵṙen i tö keuheūttöre.

1. Asuh öp tökiröng lāinyngen hī ötkô michūḵṙen?

Yēḵ hī öt michūḵṙen öi in yip tahëng, ngaich mahameuktöre ayī-ö öi töhangenlōn tö Yāvē, milēḵṙen inrē tö ò. Mihôiṅ Yāvē nö keuheūtlöre mikahkūö tö hī, nup mufē hī hēk nup la-en hī inrē. (Heprāi 4:​13) Yěi meūkö tö ò öi öt michūḵṙen, ngaich ṙamlōn anga-aṅ. Ngö ṙô ngam Paipöl: “Kunyah elmat ang Yāvē tö yip mahanyatkö elmat, hanôl yip töchiplö pöri anga-aṅ tarik.”​—Inchōḵ-oṙô 3:​32 NW.

2. Sitih inlahen öi min hameuktöre öi öt michūḵṙen?

Lōnu Yāvē tö hī öi “kö kò-òṙô in höö.” (Efisös 4:​25) Tö ngö manah angū-ö, tö hī hòṅ kò-òṙô öi in yip aṅ patīre, in yip holmaneukre, ip chūök hī la-evṙen, öt kô inrē öi minyôny-aṅ in yip mā mahayöng, ui halō-ongkūö cha tö nup ṙô re hēk ui ulāya hēk hachīl holre. (Vë-evkūö Inchōḵ-oṙô 24:28 hēk Efisös 4:​28.) Yěi töölô kētö tax tö më mā mahayöng, ngaich hòṅ kē-ěti ayī-ö. (Rōma 13:​5-7) Anū-ö min inlahen hī ‘öi hameuktöre chiplö i taṙòkhöre la-en.’​—Heprāi 13:18.

3. Asuh nup min yanöölen hī yěi öt michūḵṙen?

Yēḵ hī akahka öi töt michūḵṙen, ṙatö-ellōnre min yip tahëng nö in hī. Ngatī min yip holmaneuk hī el ngam māṅ nö ṙinatu-ellōn nö in hī. Sīöp ngam hanangenlōn nö ihôi hī öi töhěng mikūönö. Het ngam elkuilōn hī yěi öt michūḵṙen. Rö-ö nöng anū-ö, pöi ‘hameuktö nup kanô-enre; öi hanyööt ngam inköphöti aṅ im Tēv mahayööken,’ ngaich tūöktöre ellōn yip tarik nö im tökô-en nöönyö ngam Tēv.​—Taitös 2:​10.

 MIKAHTÖKŪÖRE HĒK

5. Uh man michūḵṙen

 6. Yanöölen hī yěi öt michūḵṙen

Mihôiṅ in min fukkui tö kanihngen yēḵ hī öi öt michūḵṙen. Yanöölen hī pöri min angū-ö ip lā unôich. Vë-evkūö Salmai 34:12-​16, ngaich kakkö ngih intöönö yamih:

• Asuh öp min yanöölen meh yēḵ meh öm öt michūḵṙen?

1. Yēḵ minā pamīhöre nö öt michūḵṙen nö in höö, ngön min ngam innôlö cha

2. Öt michūḵṙen ngam tarik nö inup la-en re, lökten nö ṙamlōn ngam yöngren ò

3. Akahka ngam tarik nö hamang minë chööngö, lökten ngam òfisör nö ṙamlōn nö in ò

 MINË HAKÖP HĪ NGAICH

Lōnu Yāvē tö yip holre nö un michūḵṙen nö i ṙô, i inlahen re, i tö keuheūttöre.

Sitih ṙô öm më-eṅ?

• Asuh nup tumkangen inlahen hī hameuktöre öi töt michūḵṙen?

• Kūö yòh öng nö vaich ngam mufē hī, tö hī mihôiṅ hayuntö mat Yāvē tö lōnre?

• Kūö yòh öm ötkô michūḵṙen?