LESÖN 41
Sitih Ṙô Öng Ngam Paipöl Tö Ngam Sex?
Pōyen yip tarik tö piyu-uṙô nö kakken ngam sex. Sön pöri nö kakken e ngam Paipöl nö milēḵṙen ṙô. Asuh öp min yanöölen hī yěi hang minë inlēnö i alaha e? Kūö Yāvē nö Vamīlen hī, lökten nöng anga-aṅ tö akahakūö tö nup yanöölen hī, yēḵ hī öi hang minë chööngö. Hameukhömat hī anga-aṅ tö minë tölöng inlahen hī öi mihôiṅ haṙamlōn ò. Ngaich teūngen min ayī-ö tö ngam töt chanuhuvṙen ṙanamlōn.
1. Sitih ṙô öng ngam Paipöl tö ngam sex?
Sā ṙēngen inlōnti an ngam sex nö kinë-ekūö ngòh tarik tö Yāvē. Löktö in e minā pamīhöre nö mihôiṅ nö kūönu, rö-ö pöri nöng angū-ö, pön talöökö cha angū-ö nö hameuktö hanangenlōnre tö höö, kē-ěkūö höö inrē tö ngam ṙanamlōn. Lökten an ngam Paipöl nö ngö ṙô, ‘ṙamölōn inrē me-eṅ in öp pīhö meh tö-ayal.’ (Inchōḵ-oṙô 5:18, 19) Maheūkku Yāvē tö më tö pihövö Kristīön nö köp nö hangenlōn tö höö. Lökten cha nö hòṅ ṙūöhöngre tö ngam chinô-òṅkānö, insěha inrē.—Vë-evkūö Heprāi 13:4.
2. Asuh öng ngam chinô-òṅkānö?
Vënyu nang in tö ngam Paipöl ‘tö vē chamô-òṅkānö nö öt kuhēthötre min nö in ngam Pūlngö ngam Tēv.’ (1 Kòrin 6:9, 10) Pòrniā [por·nei] ngö ṙô tī yin më kamūich Paipöl tö ngam ṙô chinô-òṅkānö nö i ṙô Krīk. Në nun tö kaheukhötre nö in ngam pòrniā (1) yěn ṙōlngöre minā töt pamīhöre nö in höö a, (2) yěn asěhken höö, kikōnyö nöng kikōnyö hēk kikānö nöng kikānö, (3) pòrniā an inrē ngam chinô-òṅ töṙeūla. Yēḵ hī min “ṙāngö ngam insěha,” ngaich ṙamlōn tī min ayī-ö tö Yāvē.—1 Tösalònikē 4:3.
MIKAHTÖKŪÖRE HĒK
Sitih inlahen öm min ṙūöhöngre tö ngam chinô-òṅkānö? Asuh öp min yanöölen meh yěm hëtö tinrīken? Ta-a töi mikahtökūöre.
3. Ṙūöhöngre tö ngam chinô-òṅkānö
Vënyu nang in tö ngam Paipöl tö kanihngen Yôsěf nö haköpkö hanëtö ngam tinrīkenre. Vë-evkūö Ranehlö 39:1-12, ngaich kakkö minë intöönö yamih:
-
Kūö yòh ök Yôsěf nö hòṅ falngöre?—Ngëichköm miröökö 9.
-
Lööngö katöllö ök Yôsěf tö lōn meh? Kūö yòh öm ngatī ṙô?
Sitih inlahen aich kò-òren vē ṙāl tarik töngamuh nö asīnken Yôsěf nö ṙūöhöngre tö ngam chinô-òṅkānö? Röngnyöm VITIŌ.
Lōnu Yāvē tö hī öi ṙūöhöngre tö ngam chinô-òṅkānö. Vë-evkūö 1 Kòrin 6:18, ngaich kakkö minë intöönö yamih:
-
Asuh nup min lāinyngen meh mihôiṅ öm chô-òkānö?
-
Sitih inlahen öm min ṙūöhöngre tö ngam chinô-òṅkānö?
4. Mihôiṅ man ṙūöhöngre tö nup kinlahare
Asuh nup min kinlaha tö mihôiṅ nö kihngen tī tö meh öm ṙūöhöngre tö ngam chinô-òṅkānö? Röngnyöm VITIŌ, ngaich kakkö ngih intöönö yamih.
-
Sitih inlahen ang ngam prötör hē ò nö akahalōn tö minë mufē re hēk minë la-enre inrē nö mihôiṅ min nö tī-iv tö ò nö asěhkö tahëng?
Pòrô yip Kristīön nö töngönö ṙinatö-ellōn, sön cha-a nö hēṙu nö kihngen nö haköpkö ngam hanëtö elkuilōnre. Sitih inlahen öm min më-eṅ kēngö nup tötlöng mufē nö ellōn meh? Vë-evkūö Filipī 4:8, ngaich kakkö minë intöönö yamih:
-
Hòṅ asuh nup ṙô tö afēka tö hī?
-
Sitih inlahen öng min ngam vinë-ekūö Paipöl, tö ngam tö örheūheu linöklōn Yāvē, nö hayööken hī öi la-al nup tötlöng mufē re?
5. Yöölen tö minë inlēnö aṅ in Yāvē
Akahakūö Yāvē tö yanöölen hī, yěi hang minë inlēnö aṅ in ò öi ha-et ngam tinrīkenre. Vë-evkūö Inchōḵ-oṙô 7:7-27 ngaich röngnyöm VITIŌ, ngaich kakkö minë intöönö yamih.
-
Asuh öp la-en ngam ṙāl tarik töp lökten ò nö haṙööyi?—Ngëichköm Inchōḵ-oṙô 7:8, 9.
-
Vë-eny nang hī ngam Inchōḵ-oṙô 7:23, 26, tö minë tötlöng ṙòng ngam insěha. Yēḵ hī min öi hāngö u, asuh öp min yanöölen hī?
-
Sitih inlahen öng ngam hanëtö tinrīken nö hayööken hī öi örheūheu ṙamlōn?
Pōyen yip tarik tötṙamlōn nö hang ngam chööngö aṅmat ngam Paipöl, sinôngen kikōnyö nö pīhö tö kikōnyö, kikānö nö pīhö tö kikānö pön öt hanangenlōn angū-ö tö ṙô cha. Lōnu pöri ngam Tēv tö hī öi hang minë chööngö ò. Vë-evkūö 1 Kòrin 6:9-11, ngaich kakkö minë intöönö yamih:
-
Höng angū-ö öng ngih tövaich nö i mat ngam Tēv, yěn pīhöre kikōnyö tö kikōnyö, kikānö tö kikānö?
Yěi hòṅ haṙamlōn ngam Tēv ngaich hòṅ halööktitre ayī-ö tö nup tövaich kahëken re. Yanööluṙen öi min yěi ngatī? Vë-evkūö Salmai 19:8, 11, ngaich kakkö minë intöönö yamih:
-
Sitih lōn öm, tölöng öng tö lōn meh ngam hināngö minë tölöök chööngö kahëtö Yāvē? Kūö yòh öm ngatī ṙô?
Pōyen yip ngaich tö hayöökaṙen tö Yāvē nö kēkö kaha minë töhet inchöngten kahëtö ò. Mihôiṅ an inrē nö hayööken meh
ṘÔ YIP TAHËNG: “Kūö yòh öi min sōngen tö hòṅ pīhöre pòrô nöng kikōnyö tö kikōnyö, kikānö tö kikānö, yěn tö hangenlōn cha-a tö höö.”
-
Sitih ṙô öm min më-eṅ?
MINË HAKÖP HĪ NGAICH
Höng minā tö hapīhö nan tö mihôiṅ nö kēken ngam sex, pò e nö inlōnti nö kinë-ekūö cha tö Yāvē, hòṅ cha nö ṙamlōn nö lökten in e.
Sitih ṙô öm më-eṅ?
-
Asuh nup tö kaheukhötre nö in ngam tötlöng sex?
-
Asuh nup min mahayööken hī öi ṙūöhöngre tö ngam tötlöng sex?
-
Sitih inlahen öi min yöölen yěi hang minë töhet inchöngten kahëtö Yāvē?
NGËICHKÖ NË INRĒ
Sitih mat ang ngam Tēv, yěn höng holtöṙah re nap töt pamīhöre? Töi mikahtökūöre.
“Sitih Mat Ang Ngam Tēv, Yěn Höng Holtöṙah Re Nap Töt Pamīhöre?”(El vepsāit töhakööpö)
Tövaich an tö ṙô ngam Paipöl, yěn pīhöre nap kikōnyö, pīhöre nap kikānö, hinôtö hī hòng ngaich angū-ö öi kunyaha elmat tö yip tö ngatī inlahen? Töi mikahtökūöre.
“Vaich Öng Yěn Höng Pīhöre Nap Kikōnyö Hēk Nap Kikānö?” (El vepsāit töhakööpö)
Akahakūö Yāvē tö yanöölen hī, yěi hang minë inlēnö aṅ in ò öi ha-et ngam tinrīkenre.
“Sex Öng Tö Ṙô Yěn Höng Sustu Ngam Chehen Nö Elvāng [Oral Sex]?” (El vepsāit töhakööpö)
“Vāyö Inlahen Cha-a Nö In Chu,” vë-ekūö istōri ngam tarik ngam töng pīhövö sin tö kikōnyö nöng kikōnyö. Asuh öp mahayööken ò nö halööktit ngam tinrīken re, hòṅ ò nö haṙamlōn ngam Tēv.
“Vailöre Tinrīken Tīm Paipöl” (Chūökamahati-E, Ĕprĕl 1, 2011)
a Në nun inrē la-en hol ngam pòrniā tö sā öp tarik yěn sustö ngam chehenre nö elvāng öp kikānö pīhö ò hēk pòrô nap töt pamīhöre [oral sex], nap kikōnyö yěn yihtöre nö in höö nöng kikōnyö, hēk öp tarik yěn asěhkö öp kikānö öp töt pīhö ò [anal sex].
