LESÖN 43
Sitih Ṙô Öng Ngam Paipöl Tö Ngam Ka-eūt?
Öt hěngren ṙô yin më tarik ing panam tö ngam kin-eūtö. Ngö ṙô yip muh, öt fehnguṙen in yěi hēṙu hol kūöre tö yip holre öi òk ka-eūt. Ngö ṙô yip muh, ötkô in òk ka-eūt. Ōt yip tö yahlö ṙôkvat töm kanò-òre nö ka-eūt. Sitih ṙô pöri ngam Paipöl tö ngam ka-eūt?
1. Tövaich öng ngam inôkö ka-eūt?
Öt vaich an ngam kin-eūtö nö vënyu tö ngam Paipöl. Töhěng ngam vāin nö in minë kahëtö Yāvē nö inṙamlōn ngòh tarik. Ngö ṙô ngam Paipöl: “Vāin inrē tö ṙāmölōn tī tö tarik.” (Salmai 104:14, 15) Ōt yik lamöklōn ngam Tēv misī tö vënyu tö ngam Paipöl nö nyā-avkūö tö ngam ka-eūt.—1 Timôtī 5:23.
2. Sitih ṙô öng ngam Paipöl nö halēn yip kam-eūt?
Ngö ṙô an ngam Paipöl: “Un hol kam-eūt, hēk un i tö pōivat nyamā-avkūö.” (Inchōḵ-oṙô 23:20) Tövaich an nö imat Yāvē, yēḵ hī öi pōivat òk ka-eūt hēk örheūheu inrē öi hiyōi (hiyōi-aṅ). (Kalatī 5:21) Lökten in ötkô öi pōivat òk ka-eūt, pöi mihôiṅ min öt akahngen nup ṙô re hēk inlahenre, mihôiṅ min inrē öi ötkôlò el alaha. Lökten öi hòṅ chumkūöṙen yěi ṙònghöichṙen öi ka-eūt, pòrô öi el ṙòngö hēk höng hěngtak inrē. Lökten yěi ötkô ṙap nup ṙô re hēk inlahen re, ěhten yěi höng ṙā-angkūöre öi ka-eūt.
3. Sitih inlahen öi min milēḵṙen tö yip tahëng yěi nyā-avkūö tö ngam ka-eūt?
Katöllö ngòh töhěng tak an tarik, tö ò yěn hòṅ nyā-avkūö tö ngam ka-eūt hēk yěn hö-ö. Ötkô öi kaheuk öp tarik nö vaich yěn rahëichvat anga-aṅ nö ka-eūt. Yěn tö sō pöri öp tarik nö ka-eūt ngaich ötkô öi timlö alaha ò. (Rōma 14:10) Tö lökten yěn öt ööire yip tahëng nö meūkö hī öi ka-eūt, ngaich hòṅ milēḵṙen ayī-ö töp elkuilōn cha. Ngaich lohten min öi öt ka-eūt öi ikūö cha. (Vë-evkūö Rōma 14:21.) Ngatī ṙô an ngam Paipöl: “Un tarīku yēḵ töng chamöh kanahngenre, inkôlò ngam holre pöri.”—Vë-evkūö 1 Kòrin 10:23, 24.
MIKAHTÖKŪÖRE HĒK
Ta-a hēk töi ngëichkö në tö rahëichyen lökngörit chööngö aṅmat Paipöl. Në mahayööken hī min lööngö katöllö yěi hòṅ òk ka-eūt hēk yěi hö-ö. Yěi katöllö ngam inôkö, ngaich hòṅ iṙôkvat. Mikahtökūöre in min tö inlahen re yěi töt ṙanāngenkūö öi ka-eūt, ngaich sitih inlahen mihôiṅ öi ṙa-angkūöre.
4. Katöllö lōnre man yěm hòṅ òk hēk yěm hö-ö
Sitih mufē ök Yēsū tö ngam ka-eūt hēk tö ngam kam-eūt? Löktö in ngam raneh hameuktö ò pinngangkūö öi akahakūö tö ngam mufē ò. Vë-evkūö Yôhan 2:1-11, ngaich kakkö minë intöönö yamih:
-
Sitih mufē ök Yēsū tö ngam ka-eūt hēk tö yip amòk ka-eūt inrē?
-
Öt vaich ngam kin-eūtö tö ṙô Yēsū, hòṅ sitih mat öm më-eṅ inrē töp holre nyamā-avkūö tö ngam ka-eūt?
Öt sōḵtu in öi òk ka-eūt tö ngam Paipöl. Öt tö ngö manah pöri angū-ö tö meh ngaich öp töng yòh ṙētak kūö, öm òk ka-eūt. Vë-evkūö Inchōḵ-oṙô 22:3, ngaich chumkūöṙen öm ngëichkö në lāinyngen meh yěm mihôiṅ öm òk hēk yěm ötkô öm òk ka-eūt:
-
Yěm chūvē lôrī hēk yěm la-evṙen in nup töṙōlkangen tökiröng machine.
-
Yēḵ meh öm puyōsö.
-
Yěm sōḵtu kūö töp tòktör öm ka-eūt.
-
Yěm tö kihngen öm ṙap ṙôkvat re ka-eūt.
-
Kūö ngam ṙēḵti meh nö öl nö ṙēḵti kam-eūt nö i panam meh.
-
Yēḵ meh holtuṙah töp holre öp tö kihngen nö ṙap ṙôkvat re nö ka-eūt.
Hòṅ halēnlö ka-eūt öm el inpīhö hēk nup tahëng tökiröng nyinā-a? Asuh öp min mahayööken meh, yěm hòṅ halēnlö ka-eūt hē u anū-ö ṙētak? Röngnyöm VITIŌ.
Vë-evkūö Rōma 13:13 hēk 1 Kòrin 10:31, 32. Unôichrit ṙô meh vë-ekūö minë miröökö, ngaich kakkö ngih intöönö yamih:
-
Sitih inlahen öng ngih lökngörit chööngö nö hayööken meh min öm lööngö katöllö?
Yēḵ ngòh Kristīön nö hòṅ òk ka-eūt hēk yěn hö-ö, katöllö ò angū-ö. Yēḵ ò nö amòk, mihôiṅ min anga-aṅ nö hēṙu nö öt òk
5. Katöllö lōnre man tö ṙôkvat re
Kööpölōn tö ngam inôkö ka-eūt nö öt vaich, vaich pöri angū-ö nö imat Yāvē yēḵ hī yahlö ṙôkvat töp kanò-òre. Kūö yòh? Vë-evkūö Hōsī 4:11, 18, ngaich kakkö ngih intöönö yamih:
-
Asuh nup min mihôiṅ pinlāngen öp tarik tö yahlö ṙôkvat nö ka-eūt?
Hòṅ sitih inlahen öi hòṅ hī öt yahlö ṙôkvat öi ka-eūt? Hòṅ akahakūö in töp tölngö ṙôkvat re. Vë-evkūö Inchōḵ-oṙô 11:2, ngaich kakkö ngih intöönö yamih:
-
Kūö yòh öi hòṅ akahakūö töp tölngö ṙôkvat re öi ka-eūt?
6. Sitih inlahen öi yěi tötṙanāngen kūö öi ka-eūt?
Hěngtak ök tarik tö pōivat sin nö ka-eūt, sitih inlahen ök nö ṙā-angkūöre. Töi mikahtökūöre. Röngnyöm VITIŌ, ngaich kakkö minë intöönö yamih.
-
Sitih inlahen ök misī Timitrī yěn òklö kūöre tö ngam ka-eūt?
-
Lööṙen ök nö ṙā-angkūöre nö ka-eūt?
-
Asuh öp mahayööken ò nö ṙā-angkūöre?
Vë-evkūö 1 Kòrin 6:10, 11, ngaich kakkö minë intöönö yamih:
-
Kūö yòh öng ngam hinyōi-aṅ nö tökiröng nö fālen tö ṙô ngam Paipöl?
-
Asuh öp löktö mikahkūö hī tö ngòh tötṙanāngen kūö nö ka-eūt nö mihôiṅ nö halööktitre?
Vë-evkūö Mëtiv 5:30, ngaich kakkö ngih intöönö yamih:
-
Tö ngö manah an ngam rinökngö këlre, tö hī hòṅ harööngenre tö kūö ngam linöklōn Yāvē. Sitih inlahen öm min më-eṅ yěm öt ṙanāngenkūö öm òk ka-eūt? a
Vë-evkūö 1 Kòrin 15:33, ngaich kakkö ngih intöönö yamih:
-
Yēḵ meh öm hanôl yip tarik tö yahlö ṙôkvat nö òk ka-eūt, asuh öp min lanökngöre meh tö tī cha?
ṘÔ YIP TAHËNG NÖ HATÖN: “Yěn tövaich ngam inôkö ka-eūt, ngaich kūö yòh yī-ö öi òk ka-eūt?”
-
Sitih ṙô öm min më-eṅ?
MINË HAKÖP HĪ NGAICH
Töhěng an ngam ka-eūt nö in minë kahëtö Yāvē nö inṙamlōn ngòh tarik. Vaich pöri angū-ö nö imat Yāvē yěi yahlö ṙôkvat öi ka-eūt, örheūheu inrē öi höng hiyōi.
Sitih ṙô öm më-eṅ?
-
Sitih ṙô öng ngam Paipöl nö vë-eny inlahen ngam kin-eūtö?
-
Asuh nup kanihngen hī yěi yahlö ṙôkvat öi òk ka-eūt?
-
Sitih inlahen öi min milēḵṙen tö yip tahëng yěn hòṅ nyā-avkūö cha-a tö ngam ka-eūt?
NGËICHKÖ NË INRĒ
Hòṅ asuh nup mikahkūö më ṙāl tarik inlahen ngam ka-eūt?
Hòṅ sitih inlahen öm yěm kihngen öm ṙā-angkūöre im kin-eūtö? Töi mikahtökūöre.
“Kamngu Chūök Tī Tö Ngam Ka-eūt” (Chūökamahati, Chönvörī 1, 2010)
Kēḵ nup òk re yip tarik, ngaich ngö ṙô: “i minë-eny meh chiörs.” Hòṅ ngatī inlahen aich më Kristīön?
Inlahen ngam Istōri “Tö Akahka Öich Tö Pōivat Ka-eūt,” ngam tarik töt kūöngu ṙôkvat sin nö ka-eūt, ngaich sitih inlahen anga-aṅ nö ṙā-angkūöre.
a Yip tö kihngen nö ṙā-angkūöre nö òk ka-eūt, lohten min cha-a nö chuh in yip tòktör nö havëkö inyööken re yěn hòṅ ṙā-angkūöre nö ka-eūt. Pōyen yip ngaich tòktör tö ngö ṙô, tö yip tö yahlö ṙôkvat sin nö ka-eūt, ötkô hēk min cha-a nö havantökūöre nö ka-eūt.
