LESÖN 47

Lēn Öm Ngaich Öm Kēḵ Ngam Vinôkö?

Röngnyen e

Pōyen haköp man ngaich tö inlahen Yāvē kūö rò-òten meh ngaich öm istötī mat ngam Paipöl. Halööktitre inrē tö nup tövaich kahëken re. Ōtngöre pöri lohten nup lāinyngen meh öm vöö öm kētöre, ngaich kēḵ ngam vinôkö. Vënyu nup min nö in ngih lesön nup tö chöngṙen insökngöröön meh yěm hòṅ kētöre öm kēḵ ngam vinôkö, ngaich sitih inlahen min më-eṅ öm mihôiṅ öm la-al u.

1. Hòṅ iṙôken mikahkūö öm töm kanô-en aṅmat ngam Paipöl yěm hòṅ kēḵ ngam vinôkö?

Yēḵ meh hòṅ kēḵ ngam vinôkö ‘hòṅ akahakūö takô më-eṅ tö ngam kanô-en.’ (1 Timôtī 2:4) Rö-ö pöri angū-ö nö tö ngö manah, tö meh öm hòṅ keuheūtlöre mikahkūö tö sanapṙô minë intöönö aṅmat ngam Paipöl. Pön pòrô yip Kristīön tö ha-ehangen ngaich nö kēḵ ngam vinôkö, sön cha-a nöng ölngen nö haköp nup tö tuföm tufömngöre ṙô inköphöti aṅmat ngam Paipöl. (Kòlòsi 1:9, 10) Kô-en pöri öi hòṅ akahakūö tö minë tötṙanāngen ranehlô mahaköp Paipöl, yěi hòṅ kēḵ ngam vinôkö. Ngatī ṙôken mikahkūö öm më-eṅ ngaich? Yip minṙöinylen yip min mahatönnyö ṙôken mikahkūö meh tö nup haköp meh aṅmat ngam Paipöl.

2. Asuh nup tö hòṅ la-en hī yěi hòṅ kēḵ ngam vinôkö?

Hòṅ la-evṙen man yěm hòṅ teungta öm kēḵ ngam vinôkö. Ngö ṙô an ngam Paipöl. “Lökten yin havöötö ellōnre, havantöre inrē.” (Vë-evkūö Inlahen 3:19.) Tö ngö manah angū-ö tö meh hòṅ haṙivlōn tö nup tökööl kahëken re, ngaich havëkö inṙē-ělre öm in Yāvē, ngaich ötkô hēk öm kēken nup töchōich la-en sahō-o Yāvē. In nup tinrīkenre inrē öm haṙamlōn Yāvē, hòṅ yihtökūö öm el minë mīting, mihôiṅ inrē öm havëkö inlahen re öm pöplisör tö öl nö vōkö.

3. Kūö yòh öm ötkô heūlngöre öm kēḵ ngam vinôkö tö kūö vanööṙöre?

Ōt yip tarik hameūlngöre nö kēḵ ngam vinôkö pön vöö yěn ötkô nö hateung nup kinlēḵngôre nö im linökölōn Yāvē. Mihôiṅ man min më-eṅ öm ngatī mufē, ngatī vanaichköre inlahen yik misī tarik tö vënyu inlahen tö ngam Paipöl. Öt meūkken meh Yāvē öm öt hēngö vanāichö. (Vë-evkūö Salmai 103:13, 14.) Höng ngih kuilōn ò, tö meh hòṅ ma-anyre öm havai ngam tinrīkenre nö sā ngam kuilōn ò. Yēḵ meh min öm ngatī inlahen ngaich ṙamlōn min anga-aṅ, ngaich hayööken meh. Rö-ö nöng anū-ö, hōten hī pöri anga-aṅ öi ṙatö-ellōnre im ṙô ò, nö öthěng tak tökô min nö ‘haköhngen hī tö ngam hanāngenlōn ngam Tēv.’—Vë-evkūö Rōma 8:38, 39.

MIKAHTÖKŪÖRE HĒK

Yěm höng kô-en mikahkūö min tö Yāvē, anū-ö min mahayööken meh öm la-al nup insökngöröön re yěm hòṅ sölta öm kēḵ ngam vinôkö.

4. Mikahtökūöre man tö Yāvē

Hòṅ iṙôken takô öp mikahkūö meh tö Yāvē yěm hòṅ kēḵ ngam vinôkö? Mihôiṅ nöng rahëichyen, yěm höng hangenlōn tö ò, hòṅ haṙamlōn ò inrē. Höng ngatī inlahen yin më hol meh mahaköp mat ngam Paipöl më tö keuheūtngöre chūök nö ikuö ngih panam. Röngnyöm VITIŌ ngaich kakkö ngih intöönö yamih.

VITIŌ: Talöökö Meh Öm Sölta Kēḵ Ngam Vinôkö (3:56)

Asuh öp mahayööken më tarik nö halēnlö inlahenre nö kēḵ ngam vinôkö më tö hameuknyu el ngam vitiō?

Vë-evkūö Rōma 12:2, ngaich kakkö minë intöönö yamih:

Ōt nup tö öltöre mikah elnang meh inköphöti aṅmat ngam Paipöl tö katööngalōn tī tö meh? Haköptö ngam kanô-en aich më Vamënyen Yāvē tö lōn meh?
Yěn ōt öp kintööngölōn meh nö i alaha minë haköp meh, ngaich hòṅ sitih inlahen më-eṅ?

5. La-al nup insökngöröön re man kēḵ ngam vinôkö

Öt hěngren nun minë lāinyngen hī öi sökngöre inlahen öi kētöre ngaich kēḵ ngam vinôkö. Asuh nup ma-asökngöröön ngòh töhěng tak sistör nö kēḵ ngam vinôkö. Töi mikahtökūöre, röngnyöm VITIŌ, ngaich kakkö minë intöönö yamih.

VITIŌ: Hanangenlōn Meh Tö Yāvē Tö Tī-iv Tö Meh Mihôiṅ (5:22)

Asuh nuk kanihngen Naröngkeröl nö kētöre nö löklōn Yāvē?
Sitih inlahen anga-aṅ nö mihôiṅ tö nuk kanihngenre pön hangenlōn tö Yāvē?

Vë-evkūö Inchōḵ-oṙô 29:25 hēk 2 Timôtī 1:7, ngaich kakkö ngih intöönö yamih:

Löktö yih öng ngam kumlēḵ hī öi la-al minë kanihngenre?

6. Ṙatö-ellōnre tö Yāvē nö öthō nö öt hayööken meh min

Öthō an Yāvē nö öt hayööken meh min. Röngnyöm VITIŌ, ngaich kakkö minë intöönö yamih.

VITIŌ: Yāvē An Min Mahayööken Meh (2:50)

Kūö yòh ang ngam mahaköp Paipöl nö heūlngöre nö kēḵ ngam vinôkö ngam tö hameuknyu nö el ngam vitiō?
Asuh öp ngaich haköp ò inlahen Yāvē, töp lökten ò nö sīöpö ṙinatö-ellōn nö in Yāvē?

Vë-evkūö Isayā 41:10, 13, ngaich kakkö ngih intöönö yamih:

Kūö yòh öm mihôiṅ ṙatö-ellōnre tö meh min mihôiṅ öm hateung nup kinlēḵngôre öm kētöre?

7. Ṙūöhlö ṙôken minlēḵṙenre man tö ngam hanangenlōn Yāvē

Yěm kirööngen ṙētak min öm afēkö ngam hanangenlōn Yāvē tö meh, ngatī ṙôkö sanīöpö min ngam minlēḵṙen meh hēk ngam kuilōn meh inrē öm hòṅ löklōn ò. Vë-evkūö Salmai 40:5, ngaich kakkö ngih intöönö yamih:

Asuh öp inkôlò meh tö tī Yāvē tö mötlö, lökten öm hòṅ ha-öinyö Yāvē?

Töhangenlōn ök misī pròfět Yarimiā tö Yāvē hēk tö ngam ṙô ò inrē. Ṙamlōn anga-aṅ kūö ò nö kaheuktu nö i minë-eny Yāvē. Ngö ṙô anga-aṅ: “Ngaich nup ṙô meh nö in chu nö ṙanāmölōn kumchik ellōn chu inrē; pò chu tö kaheūkö tö ngam minë-eny meh.” (Yarimiā 15:16) Kētö sanapṙô në intöönö:

Kūö yòh öng nö tökiröng nö minlēken hī yěi kaheuktu öi Vamënyen Yāvē?
Hòṅ kēḵ ngam vinôkö öm pò meh ngaich hòṅ Vamënyen Yāvē?
Ōt hòng ṙöng ma-asökngöröön meh?
Hòṅ asuh öp la-en meh tö lōn meh, yěm hòṅ sölta öm kēḵ ngam vinôkö?

ṘÔ YIP TAHËNG: “Öt akahakūö chin chū-ö, unôichrit inlahen chu min öich kēḵ ngam vinôkö yěich kô min öich hateung nup kinlēḵngô re öich sā kuilōn Yāvē hēk yěich hö-ö.”