Keuheūtnyöre minā pamīhöre tö ṙanamlōnre hē cha nö hamūlö nö in ngam pinīhö, lōnu cha-a töre nöng örheūheu nö ṙamlōn. Mihôiṅ aich min nö ngatī? Heūṅ mihôiṅ nan! Pön pōyen ngaich yip Kristīön töpīhövö hamang minë inlēnö aṅmat ngam Paipöl, ngaich köp ngam pinīhö tö cha tö ngam ṙanamlōn cha inrē. Inmeukhömat hī nun tö më pamīhöre nö mihôiṅ nö ṙamlōn nö in höö.

1. Asuh nup inlēnö yip kikōnyö töpīhövö aṅmat ngam Paipöl?

Ṙahātö Yāvē an ngam kikōnyö nö kui ngam mikūönö. (Vë-evkūö Efisös 5:​23.) Lökten anga-aṅ nö meūka nö in ngam kikōnyö tö nup töng sitih la-en kahëken ò nö hòṅ yanöölen ngam mikūönö ò. Ngö ṙô an ngam inlēnö aṅmat Paipöl: “Yī-ö kikōnyö töpihövö, hāngenlōn yin tö më pīhöre.” (Efisös 5:​25) Tö ngö manah angū-ö tö ngam kikōnyö nö hòṅ vāyö inlahen nö in ngam pīhöre, yēḵ cha nöng nët tak hēk el ṙôngö inrē. Laklen ò min anga-aṅ, hangihtöre tö nup ṙô ò, akahakūö inrē tö nup kanihngen hēk hanāten ò inrē. (1 Timôtī 5:8) Ngam tö mötlö, tö ò nö hòṅ hayööken ngam pīhöre kikānö nö hangönlö ngam innôlö re nö in Yāvē. (Mëtiv 4:4) Holṙô re min cha-a nö vë-ekūötēv, vë-ekūö mat Paipöl inrē. Yēḵ ngam kikōnyö min nö holtö hanangenlōn re nö haṙūötken ngam pīhöre, ngaich möl min ngam innôlö ò nö in Yāvē nö ngön.​—Vë-evkūö 1 Pītör 3:7.

2. Asuh nup inlēnö yip kikānö töpīhövö aṅmat ngam Paipöl?

Ngö ṙô an ngam Paipöl nö halēn më töpīhövö kikānö. “Kö hāngenlōn pöri yī-ö tö më pīhöre.” (Efisös 5:​33) Sitih inlahen ang min nö kò-òren? Mihôiṅ nöng ngëichkö minë tövai tinrīken ngam pīhöre. Chumkūöṙen inrē nö ngëichkö kumlēḵ alaha ò nö meukṙen ngam mikūönö cha. Hō-o nup töng ṙô ngam kikōnyö yěn katöllö nup la-en nö chö-öny tö ngam mikūönö cha, hangenlōn ṙô anga-aṅ nö vë-ekūö ò, öt vë-eng nang ò inrē, pòrô ngam pīhö ò nö lamöklōn Yāvē hēk hö-ö inrē.

3. Sitih inlahen aich minā pamīhöre yěn hòṅ ngön ngam pinīhö tö cha?

Ngö ṙô an ngam Paipöl nö vë-eny inlahen minā pamīhöre: “nët tak cha-a nö vīngöre nöng hēngö alaha.” (Mëtiv 19:5) Tö ngö manah angū-ö tö cha nö hòṅ kēnyö nup töchōich mufē ellōn re nup tö pasū-utī nö mihôiṅ tö ngam innôlö cha. Sitih inlahen aich min nö kò-òren? Yěn kaheuk sakāmö cha-a nö kē-ěny ṙētakre nö vë-ekūö re, nö hangenlōn ṙô, keuheūtnyö ṙô ellōnre inrē nö in höö nö öt hayuntö mat höö. Un mötlö chūök yip tahëng tö Yāvē nö ihôi cha nö pamīhöre. Hòṅ köplōn cha-a tö ngam hanangenlōn re tö höö nö pamīhöre nö un kūönngöre, kūö inlahen cha nö hanôl yip tahëng.

 MIKAHTÖKŪÖRE HĒK

4. Hangenlōn tö ngam pīhöre kikānö, haṙūötken ò inrē

5. Hangenlōn tö ngam pīhöre kikōnyö, milēḵṙen inrē tö ò

Halēnö yin vē töpīhövö kikānö tö ngam Paipöl, nö hòṅ milēḵṙen tö më pīhöre yěn pòrô cha-a nö lamöklōn Yāvē hēk yěn hö-ö. Vë-evkūö 1 Pītör 3:​1, 2, ngaich kakkö minë intöönö yamih:

• Yěn töt ṙamatö-ellōnre öp pīhö meh kikōnyö, pī-a öm lōnu tö ò nö asīnken meh öm löklōn Yāvē. Sitih inlahen öm min asīöp ngam hanangenlōn ò tö Yāvē? Löng öng min yēḵ meh höng örheūheu vë-eny nang ò tö minë haköpre? Höng hameuktö milēḵṙenre ṙöng tö ò, haṙūötken ò inrē? Kūö yòh öm min ngatī ṙô?

 Mihôiṅ minā pamīhöre nö holṙen re nö katöllö nup la-en kahëken re. Ngaich sitih inlahen pöri min yěn öthō-en höö nup ṙô cha? Mihôiṅ min ngam kikānö nö ṙēmö ṙô hēk holtö minlēḵṙenre nö vënyö ṙô ellōn re nö in ngam pīhöre, köplōn pöri anga-aṅ tö ngam kikōnyö nöng anga-aṅ ṙahātö Yāvē nö kui ngam mikūönö, anga-aṅ min tökô nö katöllö nup la-en kahëken cha. Lökten min ngam kikānö nö holtö ellōn re nö hang nup töng chööngö ngam kikōnyö. Yěn ngatī inlahen min anga-aṅ ngaich sīöp min ngam ṙanamölōn cha nö el ngam mikūönö. Vë-evkūö 1 Pītör 3:​3-5, ngaich kakkö ngih intöönö yamih:

• Sitih mufē ang Yāvē yěn meuk inlahen ngam inpīhö kikānö nö milēḵṙen tö ngam pīhöre kikōnyö?

6. Mihôiṅ nan holṙen re la-al nup kanihngenre an pamīhöre

 MINË HAKÖP HĪ NGAICH

Yēḵ minā pamīhöre nö hangenlōn hēk milēḵṙen tö höö, hang minë lökngörit chööngö inrē aṅmat ngam Paipöl ngaich möl min cha-a nö ṙamölōn.

Sitih ṙô öm më-eṅ?

• Sitih inlahen ang mihôiṅ ngam inpīhö kikōnyö, hòṅ ngam mikūönö cha nö ṙamlōn?

• Sitih inlahen ang mihôiṅ ngam inpīhö kikānö, hòṅ ngam mikūönö cha nö ṙamlōn?

• Yēḵ meh öm tö pīhövö, asuh öp min lökngörit chööngö aṅmat Paipöl tö mihôiṅ nö ngönlöre tī tö ngam innôlö nā an pamīhöre?