LESÖN 55
Hayööken Ngam Māṅ re Man
Lāku ṙôken yin më tarik, hamòltö ṙanamlōnre nö ha-öinyö Yāvē, el minë tököinyu ṙôken māṅ ikūö ngih panam. Ha-öiny taneūngen re yin töminë tövai haköp re, hēk töminë inlēnö taneūngen cha nö el ngam māṅ. Lökten yin nö kētöre nö in minë tö ṙōlkangen la-en mineuklö kui ngam māṅ. Ngatī lōn öm më-eṅ inrē hòṅ kētöre öm hayööken ngam māṅ re? Asuh nup kò-òren la-en meh yěm hòṅ kētöre hayööken ngam māṅ re? Töi mikahtökūöre.
1. Asuh nup la-en chūök hī mihôiṅ kētöre öi kē-ěny ṙētakre töm kumlēḵ re öi hayööken ngam māṅ?
Ṙōlkangen nun minë la-en el ngam māṅ tö mihôiṅ nö chūök hī öi kētöre. Sā ngih, yěn ōt më tököiny el ngam māṅ, hēk yěn ōt yip tötkô ngaich nö kiröön tö kūö ṙēḵti re, mihôiṅ öi kumten cha nö chuh el minë mīting, hēk ngëichkö inlahen re öi hayööken cha inup tahëng la-en, sā hī mihôiṅ hayööken cha öi havah nup kuilōn cha, hēk ahet nup patī cha inrē. (Vë-evkūö Yāköp 1:27.) Mihôiṅ inrē öi kētöre im inhëtö minë Patī Pūlngö, im vinītit u, hòṅ u nö köpsören vanāyö. Hòṅ löknyö ellōnre lōn ayī-ö öi kētöre in minë la-en, öi ngö ṙô “Ihih chin chū-ö; tīnngen chu.”—Isayā 6:8.
Më prötör sistör hī tö ngaich nö kēḵ ngam vinôkö, ōt nun minë tahëng inlahen cha nö kētöre nö hayööken ngam māṅ, nö ṙūöhnyö ngam la-en el ngam māṅ. Më prötör tö ngaich nö sölta tinrīken nö sā ṙô ngam Paipöl, mihôiṅ cha-a nö mahayööken töla-evṙen nö el ngam māṅ ngaich unôich nö vītu min cha-a nö minṙöinylen nö el ngam māṅ. Mihôiṅ inrē, më prötör sistör el ngam māṅ nö kētöre nö in ngam la-en painīör nö tānyö ngam inhānga. Ōt më Kristīön, tömihôiṅ nö kētöre nö in minë la-en minānlö minë chūök hī öi ha-öiny ngam Tēv. Mihôiṅ yip tahëng nö chuh el minë tahëng māṅ, minë tö lōnu tö tarik ma-ahangkö ngam tölöök inhānga.
2. Sitih inlahen öi min hayööken ngam māṅ öi kētö minë pësa hēk minë chehen aṅ in hī?
Mihôiṅ in hameuktö ‘minlēḵṙenre tö ngam Mā Tēv [Yāvē] tö nup inlānen’ re öi kē-ěti. (Inchōḵ-oṙô 3:9) Ṙamlōn in öi kētö minë pësa hēk minë chehen nö mineuklö kui ngam māṅ, tinānyö ngam tölöök inhānga inrē nö keuheūtngöre chūök. (Vë-evkūö 2 Kòrin 9:7.) Yöölen inrē më holmaneuk hī tö minë pësa kanahanglōn tökētu, yēḵ cha nö fukkui tö minë tö faltöre kanihngen. Pōyen yip Kristīön tö-örheūheu nö ‘harēvngö nup hamūllöre tökētu.’ (Vë-evkūö 1 Kòrin 16:2.) Mihôiṅ in inrē chaplö aṅ minë köntripiūsön pòks minë töṙā-aka nö el Patī Pūlngö hēk höng chuh el ngam donate.pr418.com. yěi hòṅ kētö minë kanahanglōn tökētu. Yěi kētö minë pësa tö minë tahëng inrē chehen hī nö tökētu ngaich hameuktöre ayī-ö öi hangenlōn tö Yāvē.
MIKAHTÖKŪÖRE HĒK
Asuh nup inrē tumkangen inlahen hī öi hayööken ngam māṅ? Töi mikahtökūöre.
3. Mihôiṅ in öi kētö minë tökētu pësa hēk minë chehen aṅ in re
Hangenlōn Yāvē tö yip töṙamölōn kamë-eti, ngatī inrē ang Yēsū nö sā ò. Sā ngih inchō-elmat, hē Yēsū nö meuk ök yāich tafīösi nö chaplö nuk töng aṅ in re pësa, ṙamlōn anga-aṅ nö meuk inlahen ò ngaich eū ngam la-en ò, pòrô nöng öt pōyen nuk chahaplö ò sön anga-aṅ nöng kē-ěkūö Yāvē tö u. Vë-evkūö Lūkös 21:1-4, ngaich kakkö minë intöönö yamih:
-
Yěn höng pōyen hòng nup kahëtö hī kanahanglōn tökētu ngaich möl hòng Yāvē nö ṙamlōn nö in hī?
-
Sitih mufē ang Yāvē hēk Yēsū yěi keuheūttö ellōnre öi kētö nup kahëtöre?
Ṙōlkangen talöökö nun minë kahëtö hī pësa nö in minë la-en. Nö sitih inlahen? Töi mikahtökūöre, röngnyöm VITIŌ. Ngaich kakkö ngih intöönö yamih.
-
Kū-ö tö yih ön minë köntripiūsön kahëtö hī hòn yöölen minë māṅ tökeuheūtngöre chūök?
4. Mihôiṅ in ayī-ö inrē öi volöntīör öi kētöre
Vāyö inlahen tī yik misī tarik ngam Tēv Yāvē tö minë chūök ò nö ha-öinyö, rö-ö cha nöng kētö minë pësa pön ōt inrē nuk la-en cha misī. Vë-evkūö 2 Kinṙötngö 34:9-11, ngaich kakkö ngih intöönö yamih:
-
Sitih inlahen yik misī Israel nö ṙòkhöre nö kētö tīre nö haṙūötken ngam patī ngam Tēv Yāvē?
Sitih inlahen aich töngamuh më Vamënyen Yāvē nö hěngren inlahen tö yik Israel misī? Ta-a töi mikahtökūöre, röngnyöm VITIŌ. ngaich kakkö ngih intöönö yamih.
-
Kūö yòh öng nö tötṙanāngen ngam inhëtö hēk inköpkö vanānyö minë Patī Pūlngö?
-
Sitih inlahen öm min më-eṅ kētö tīre in u anū-ö la-en?
5. Mihôiṅ më prötör tö sölta tinrīken nö sā ṙô ngam Paipöl nö kēḵ minë la-en el ngam māṅ
Ṙūöhlö alaha më Kristīön ngam Paipöl nö kēḵ minë la-en el ngam māṅ yěn lōnu angū-ö tö cha. Töi ngëichkö ngih inchō elmat, röngnyöm VITIŌ. Ngaich kakkö ngih intöönö yamih.
-
Sitih inlahen ang Rayön nö kētöre nö in minë la-en, hòn yöölen ngam māṅ tö tī ò?
Kētu nun minë tinrīken më mahayööken töla-evṙen hēk më minṙöinylen inrē nö imat ngam Paipöl yēḵ cha nö hòṅ sölta nö in u. Vë-evkūö 1 Timôtī 3:1-13, ngaich kakkö minë intöönö yamih:
-
Asuh nup tinrīken tö hòṅ meūkö nö in më prötör tö hòṅ kētöre nö mahayööken töla-evṙen hēk minṙöinylen inrē?
-
Asuh nup tinrīken yip aṅ patī cha tötṙanāngen?—Ngëichköm miröökö 4 hēk 11.
-
Yěn sölta më prötör nö in minë tinrīken vahënyö ngam Paipöl ngaich sitih inlahen min më tahëng nö yöölen nö lökten in cha?
ṘÔ YIP TAHËNG NÖ HATÖN: “Löktö yih pësa aich kan më Vamënyen Yāvē yěn kēḵken nup la-enre?”
-
Sitih ṙô öm min öm kētö sanapṙô?
MINË HAKÖP HĪ NGAICH
Yēḵ hī kētö ngam ṙētak, ngam kumlēḵ hī, minë pësa hī, tö minë tahëng inrē chehen aṅ in hī nö inyööken ngam māṅ, ngaich pōiṙāi anū-ö nö imat Yāvē.
Sitih ṙô öm më-eṅ?
-
Asuh nup la-en chūök hī mihôiṅ öi kēnyö ṙētak re, kētö ngam kumlēḵ re inrē hòṅ ngam māṅ nö yöölen?
-
Sitih inlahen tī öi mihôiṅ tö nup pësa hēk tö nup chehen aṅ in hī hòṅ ngam māṅ nö yöölen nö lökten in u?
-
Asuh nup öre la-en meh më-eṅ yēḵ më hòṅ yöölen tī tö ngam māṅ?
NGËICHKÖ NË INRĒ
Lōnu ang ngam Tēv tö ngòh tökô-en Kristīön nö hòṅ kētö tö hěng i tösöm? Töi mikahtökūöre.
“Sitih Ṙô Öng Ngam Paipöl Tö Ngam Kinë-eti i Tösöm?” (El vepsāit töhakööpö)
Ōt minë la-en el ngam māṅ kinë-ekūö më prötör tö ngaich nö vōkö. Hòṅ sitih inlahen pöri më sistör yěn kētöre nö in u?
“Asuh Nup Kinë-ekūö Më Minröinylen El ngam Māṅ” (Chūökamahati, Förvörī 2021)
Töi ngëichkö vē prötör töt pinhë-evkūö tö minë kanihngen re nö sölta tī tö minë līpöre nö in më hol maneuk re.
Sitih inlahen öng ngam söngkötön hī nö harīkngöre inlahen tī tö minë pësa tö minë tahëng söngkötön hēk tinlööken inrē. Töi mikahtökūöre.
“Löktö Yih Pësa Aich Kan Më Vamënyen Yāvē Yěn Kēken Nup La-enre?” (El vepsāit töhakööpö)
