LESÖN 56
Haköpken Ngam Hinëngö Nö El Ngam Māṅ
Yēḵ hī ṙung meukkūöre tö yip Kristīön prötör sistör öi hěngkang chūök. Sā mufē ök Rācha Tāvit ayī-ö, ök tö ngö ṙô tī nö kūich: “sitih lanöökö öng nö i vē hanöng kisānöre nö holtöṙahre nö mūl” (Salmai 133:1) Kuchik elmat öi meuk yěi hěng öi mūl. Öt höng kahngenre an ngam hinëngö manūlö hī nö yih. Hòṅ haköpken e ayī-ö, pön höng eltī hī angū-ö.
1. Asuh öp tövai maheuk hī nö ihôi më tarik ngam Tēv?
Asehkūöre tö hī, yěi möl öi chuh el minë kòngrikēsön mīting më holre aṅkūö minë tahëng panam. Öt heuveū-eu ṙô ayī-ö tö minë ëlô cha, sön öi höng sā mi-i panam re öi mīting. Kūö yòh? Kūö hī öi ihôi më tarik ngam Tēv, më tökô-en hanangenlōn tö höö. Höng hěng inrē minë töhakööpö tö hī aṅmat ngam Paipöl nö keuheūtngöre chūök. Öp töng yòh chūök hī öi iyöng, mihôiṅ öi ‘havëkö minë-eny ngam Mā Tēv [Yāvē] lök la-en ò inrē öi hĕngòng ellōn.’ —Sefaniā 3:9.
2. Hòṅ asuh öp la-en hī öi ṙòkhöre yěi lōnu töm hinëngö nö köp?
Ngö ṙô an ngam Paipöl: “hāngenlōn tö höö löklö ellōnre [keuheūttö ellōnre] nö kalēḵ.” (1 Pītör 1:22) Sitih inlahen öi min keuheūttö ellōnre hang ngih inlēnö? Hòṅ ngëichkö nup tövai ayī-ö tinrīken yip holre, öt höng nup vanāichö cha. Höng hanôl yip tarik in ṙung yip töng sāḵta tinrīken nö in hī. Ötkô pöri öi ngatī, pöi hòṅ mikahtökūöre inrē tö yip tahëng, yip töt sāḵta tinrīken nö in hī. Yěn ōt nup tövaich mufē hī, inlahen yip tahëng hol hī, ngaich hòṅ kēnyen u ayī-ö nö ṙā-ang ellōnre.—Vë-evkūö 1 Pītör 2:17. a
3. Sitih inlahen öm min yěm miṙivulōn öm in öp holmaneukre?
Meūkö an töngamuh ngam hinëngö nö ihôi hī öi prötör sistör, töthet pöri ayī-ö. Mihôiṅ min nö haṙivlōn yip prötör sistör hēk chök inrē tö kūö nup ṙô hī hēk inlahen hī inrē. Lökten an ngam Paipöl nö ngö ṙô “kö ṙāpö höö. . .aṙēlen höö.” Ngöṙô an inrē “sā tī ngam Tēv [Yāvē] nö aṙēlen yīö, ngatī yin yēḵ yī-ö inrē”kö aṙēḵlen höö. (Vë-evkūö Kòlòsi 3:13.) Ṙōlheuh in ṙung öi miṙivngölōn Yāvē, sön anga-aṅ nöng aṙēḵlen hī. Lökten an nö meūka nö in hī, öi kö aṙēḵlen höö. Yēḵ meh akahaiṙen töre öm haṙivlōn tī töp tahëng, ngaich hòṅ chuh in ò më-eṅ öm havëkö inṙē-ělre.—Vë-evkūö Mëtiv 5:23, 24. b
MIKAHTÖKŪÖRE HĒK
Sitih inlahen öm yēḵ meh hòṅ vī ngam lanāmö töm hinëngö nö el ngam māṅ? Ta-a töi mikahtökūöre.
Sitih inlahen öm yěm hòṅ vī lanāmö?
4. Um atöltuṙen im hanangenlōn tö tarik
Hòṅ hangenlōn in tö më prötör sistör re nö ṙòkhöre, pön kuilōn hī angū-ö. Ōt pöri yip tö harīkngöre tinrīken tö hī, mihôiṅ min öi kihngen, yěi hòṅ mikahtökūöre tö cha. Asuh öp min mahayööken hī? Vë-evkūö Inlahen 10:34, 35, ngaich kakkö minë intöönö yamih:
-
Hō-o yip tarik an Yāvē nö ṙòkhöre, kaheūkö cha inrē nö Vamënyen ò. Hang inlahen ngam Tēv man ngaich nö töt atöltuṙen, sitih inlahen öm rih min ngaich öm in yip tarik tö harīkngöre tinrīken tö meh?
-
Ip chūök meh iyöng, sitih inlahen yip tarik nö atöltuṙen tö hanangenlōnre? Sitih inlahen öm min më-eṅ yěm sō öm sā mufē cha?
Vë-evkūö 2 Kòrin 6:11-13, ngaich kakkö ngih intöönö yamih:
-
Sitih inlahen öm min öm ṙūöhlö hanangenlōnre tö yip prötör sistör yip tö harīkngöre tö meh?
5. Kö aṙēlen höö hēk lām inrē i taṙòkhöre
Öt tö hēngö fālen ang Yāvē, lökten nö öt hěngheuh nö havëkö inṙē-ělre nö in hī. Yěi köölö fālen pöri ṙung ayī-ö ngaich keuheūttö ellōnre anga-aṅ nö aṙēḵlen hī. Vë-evkūö Salmai 86:5, ngaich kakkö minë intöönö yamih:
-
Sā ṙô ngam miröökö sitih inlahen ang Yāvē yěn aṙēlen hī?
-
Ṙamlōn öm hang inlahen Yāvē nö hööngöre nö aṙē-ěl? Ngaich kūö yòh?
-
Asuh nup min lāinyngen meh öm kihngen vī ngam lanāmö, yěm miṙivulōn öm in yip tahëng?
Yēḵ hī hòṅ asīnken Yāvē, haköpkö ngam hinëngö inrē nö ihôi yip hol maneukre, ngaich hòṅ sitih inlahen min ayī-ö? Vë-evkūö Inchōḵ-oṙô 19:11, ngaich kakkö ngih intöönö yamih:
-
Yěn vīlö tanānyö hī hēk miṙivngölōn hī yip tahëng, ngaich hòṅ sitih inlahen ayī-ö?
Hēṙu in ṙung ayī-ö öi haṙivlōn tī tö yip tahëng ngaich hòṅ sitih inlahen ayī-ö? Röngnyöm VITIŌ, ngaich kakkö ngih intöönö yamih.
-
Sitih inlahen ang ngam sistör nö vī ngam lanāmö?
6. Ngëichkö nup tölöök inlahen më prötör sistör re man
Yěi ngaich min akahakūö tö më prötör sistör re, meūkö min nup tövai inlahen cha nö holre tö nup tötvai inlahen cha, tö hī. Sitih inlahen öi mihôiṅ höng ngëichkö nup tövai inlahen cha? Röngnyöm VITIŌ, ngaich kakkö minë intöönö yamih.
-
Asuh öp mahayööken hī min höng ngëichken minë tövai inlahen më prötör sistör hī?
Höng ngëichkö nup tövai inlahen hī ang Yāvē. Vë-evkūö 2 Kinṙötngö 16:9a, ngaich kakkö ngih intöönö yamih:
-
Sitih mufē öm hang inlahen Yāvē nöng ngëichkö nup tövai tinrīken meh?
Yěn pòrô ngam tövai kinlong nö rahëichyen nö takôch sön nö ṙömöng pōiṙāi anga-aṅ. Ngatī më prötör sistör yěn pòrô nö īnu töm töt hanëtö sön pöri cha-a nö ṙömöng pōiṙāi nö imat Yāvē
ṘÔ YIP TAHËNG: “Yěich höng ilööṙen min öich aṙēḵlen ò, öthō min anga-aṅ nö akahaiṙen tö ṙôken miṙivlōn chu tö tī ò.”
-
Kūö yòh öi hòṅ hööngöre öi aṙēḵlö yip tahëng?
MINË HAKÖP HĪ NGAICH
Hòṅ hangenlōn in tö më hol maneukre nö ṙòkhöre hēk aṙēḵlen cha inrē. Ngaich köp min ngam lanāmö nö el ngam māṅ.
Sitih ṙô öm më-eṅ?
-
Hòṅ sitih inlahen öm yěm sō öm atöltuṙen?
-
Sitih inlahen öm min yěn miṙivngölōn meh yip holmaneuk meh Kristīön?
-
Hòṅ asīnken Yāvē öm, in ngam inṙē-ěl yip tahëng. Kūö yòh?
NGËICHKÖ NË INRĒ
Sitih inlahen öi yöölen öi löktö im inchōḵ-oṙô Yēsū öi höng öt ngëichkö nup vanāichö yip holre. Töi mikahtökūöre
Pòrô tö lōnre öi öt vanāichu, sön hòng pöri öi hòṅ havëkö inṙē-ělre?
“Havëkö Inṙē-ěl—Vī Ngam Lanāmö” (Chūökamahati-HI, Nòvempör 1, 2002)
Nët tak minā tarik töharuklöng ikūö ngam panam chūök më tarik tösumrīk tö höö pön öt hěngren elmat. Kūö yòh ngaich cha-a nö öt surīkhen höö holre pöri ngaich cha-a.Töi mikahtökūöre
Tösumrīk Sin Nā Chônī Nā Kitīön Töhöö, Holre Nö Ngaich (6:42)
Yěi öt vë-ekūöre min tö nup miṙivlōnre öi in höö, nöng hökiren, ngaich mihôiṅ min nö pasū ngam lanāmö hī nö el ngam māṅ. Hòṅ sitih inlahen öi yěi sōten e nö ngatī? Töi mikahtökūöre
“Halööktö Nup Miṙivlōnre Holtö Hanangenlōn” (Chūökamahati-HI, Mē 2016)
