Hēkpī ṙung tarik nö ahūöngen hī, tainy inrē yĕi vë-eny nang cha tö inlahen Yāvē. Lāinyngen hī mihôiṅ ṙāngôre kakkö inlahen ngam Tēv. Hö-ö öm ṙung me-eṅ ngatī lōn?— Vënyu nang in töm Paipöl tök ihih ṙāl tarik töhangenlōn tö Yāvē, ngach pöri nö öhngen nö hòṅ ṙāngôre nö kakkö inlahen Yāvē. Yarimiā ök minë-eny ò. Ta-a töi haköp inlahen ò.

Hē Yarimiā nö ṙòmöng ṙāl tarik, tölṙô ò ang Yāvē nö fēlen yik tarik nö ṙāngö nuk tötlöng la-en re. Kihngen ang Yarimiā töm la-en kinë-ekūöre, pön vöö anga-aṅ inrē. Ngö ṙô anga-aṅ nö in Yāvē: ‘Öt huveū-euṙô chin chū-ö ṙò-òv. Pò chu höng ṙāl tarik.’ Ngö ṙô pöri Yāvē tö ò: ‘Uh man vöö. Tön hayööken meh chin min.’

 Lökten ngach Yarimiā nö chuh in yik tarik, ngach vë-eny nang cha tö ngam Tēv min nö chökṙen cha yĕn öt ṙāngen nuk la-en re töchōich. Hang ṙô Yarimiā yik rih tarik tö lōn meh?— Hö-ö. Masā hayīölken ò cha-a, rīkre inrē yik tö tainy nö in ò. Ōt yik tö hòṅ fëlngen ò! Sitih mufē ngach ang Yarimiā?— Vöö takô ngach anga-aṅ ngach ngö ṙô: ‘Hö-ö chin chū-ö hēk hòṅ kakkö inlahen Yāvē.’ Kò-en hòng anga-aṅ nö ṙāngenre?— Hö-ö. Pön hangenlōn anga-aṅ tö Yāvē lökten ò nö öt ṙāngôre nö kakkö inlahen Yāvē. Kūö Yarimiā nö öt ṙāngenre töm la-en re, lökten Yāvē nö laklen ò.

Tö sā ò, ik hē yik tö kunyaha elmat tö Yarimiā nö sukten ò nö el ök tö ūlö chūök tit mak, ök tö tööḵlö tö tilin. Ötrĕhĕn nö nya-aṅvkūö anga-aṅ, ötrĕhĕn nö ôku tö mak. Tö hòṅ fëlngen Yarimiā lang yik tarik. Ngach pöri anga-aṅ nö laklöngö tö Yāvē!

Asūp öre haköplö meh in Yarimiā?— Pòrô Yarimiā sin nö vöö, öt ṙāngôre pöri anga-aṅ nö kakkö inlahen Yāvē. Yēḵ meh min me-eṅ kakkö inlahen Yāvē, pi-a min yip tarik nö miyëṙô tö meh tainy inrē nö in meh. Lökten meh min kò-òren sirō-ongkūö pi-a öm vöö inrē. Uh pöri me-eṅ ṙāngôre kakkö inlahen Yāvē. Örheūheu an min Yāvē nö holṙen meh sā ò nö holṙen Yarimiā.