Löktökūö kanūönö re ök Samuĕl nö iyöng el ngam inrūkui nö la-evṙen, chūök yik tarik ön misī ngam inrūkui nö ha-öinyö Yāvē. Akahakūö öm tö löktö yanīhih Samuěl nö el ngam inrūkui? Ta-a töi urĕh haköp inlahen Hëna, ök yöng Samuĕl.

Öt tö ilööṙen ök Hëna nö kūönuvö pòrò lang anga-aṅ nö hòṅ lōnu töre nö kūönu. Lökten ò nö vë-ekūötēv nö havëkö inyööken re nö in Yāvē. Kilēḵngôre anga-aṅ yĕn kūöntö kikōnyö min, ngach kēten ò min anga-aṅ nö iyöng el ngam inrūkui nö la-evṙen. Hangṙô ò ngach ang Yāvē lökten ò ngach nö kūönu tö kikōnyö. Kaheuk minë-eny ök nyīö ngach anga-aṅ nö Samuĕl. Sā ṙô Hëna pöri nö kilēḵngôre, ngatī inlahen ngach anga-aṅ nö söömhöt Samuĕl nö el ngam inrūkui hē ò nö ṙòmöng lūöi fën höiny samyeūheu.

Ēli ök hē e makūö kūönṙô nö el ngam inrūkui. Umuh inrē nak tö nët taka kūön ò nö la-evṙen. Hòṅ köpölōn man tö ngam inrūkui nö chūök ngam Tēv misī nö ha-öinyö, töp lökten yip tarik tö la-evṙen nö in e nö tö hòǹ löökö la-en. Ngach pöri nak kūön Ēli nöng öt löökö la-en nö in e. Höng meuk nuk tötlöök la-en cha ang Samuěl. Asīnken nuk tötlöök la-en nak kūön Ēli ök rih Samuĕl?— Hö-ö, pön höng öt ṙāngenre anga-aṅ nö la-evṙen tö nuk tölöök, sā inköptö ò tö nak yöng ò.

Hòṅ sitih tī ök öreh Ēli tö nak kūönre tö lōn meh?— Hòṅ chökren cha ök öre. Ötkô inrē nö halöngten cha nö köpsören nö la-evṙen nö el patī ngam Tēv. Hö-ö pöri ang Ēli nö ngatī inlahen, lökten ang Yāvē nö hūlökūö tanāinyö nö in ò, in nak kūön ò inrē. Kē-ĕlkūö alahare ngach Yāvē nö chökṙen cha.

Hěng heuh ngach ik töhěng hatööm hē Samuĕl nö ṙòngmö haṙòh, hang ṙô ök mahavëkö re anga-aṅ tö ngö ṙô: ‘Samuĕl!’ Faltöre ngach anga-aṅ nö chuh in Ēli, ngö ṙô pöri Ēli: ‘Hö-ö chin chu-ö havëken meh.’ Nët heuh angu-ö nö ngatī. Im linūöi heuh ngach ang Ēli nö tölṙô Samuĕl nö ngö ṙô, yĕn hēk min nö havëka: ‘Yāvē, ṙò-òv man yēḵ; tön hangihtöre chin tö ṙô meh.’ Ngatī ṙô ngach ang Samuĕl. Ngö ṙô ngach ang Yāvē tö Samuĕl: ‘Vë-eny nang Ēli man tö chu min chökren ò töp mikūönö ò inrē kūö nup tötlöök la-en cha.’ Lööṙen ök rih  Samuĕl tö lōn meh nö vë-eny nuk ṙô ngam Tēv nö in Ēli?— Hö-ö, öt lööṙen ök. Pòrô pöri Samuĕl nö vöö, sön anga-aṅ nö kēken ngam tinöölôre tö Yāvē. Teung ngach ngam ṙô Yāvē tö inlahen nak tö nët taka kūön Ēli nö fëli, kapah inrē ang Ēli.

Tövai an Samuĕl nö inchōḵ elmat hī. Pön öt ṙāngenre anga-aṅ nö la-en tö tölöök pòrò yik tahëng hol ò nö chōichö la-en. Sitih inlahen öm min më-eṅ? Asīnken Samuĕl öm min, öm höng iṙūöhen la-en tö tölöök? Yēḵ meh min ngatī, ṙamölōn tī min me-eṅ tö Yāvē tö nap yöng meh inrē.