Ngëchken ngam nyīö man imat ngam nyat. Vööṙö mineukö an pön höng hĕng tak, hö-ö ang ṙöng? Ngatī inlahen öm ṙung me-eṅ?— Ṙòkhöre in ṙung hēṙu öi ngatī mufē. Vënyu nang in töm Paipöl tö yik hol Yāvē tö ngatī inkahngen nö vöö yĕn höng hĕng tak. In cha ök Ēlaicha. Ta-a töi haköp inlahen ò.

Mi-iyöng im panam Israel ök misī Ēlaicha, urĕhĕkūö finötnyö Yēsū. Hē u anū-ö sakāmö, Ahap ök muh rācha aṅ Israel, ök töt vamë-ekūö ngam tökô-en Tēv, Yāvē. Nët re taka na Ahap tök pīhö ò inrē Yēsipel, nö vamë-ekūö Pē-al ngam töt kô-en tēv. Lökten ngach yik tarik aṅ Israel nö pōyen vamë-ekūö Pē-al. Tötkòlô elkui ök rānī Yēsipel lökten ò nö hòṅ fëlngen yik töng tarik vamë-ekūö Yāvē, holre tö Ēlaicha inrē! Sitih inlahen ök rih Ēlaicha tö lōn meh?—

Falngöre ök Ēlaicha! Marò-òlkūö ngach anga-aṅ nö kiröönngöre nö lök el tönyalnyi ngach hayunngöre nö el kinlūhu. Kūöyòh ök tö lōn  meh nö ngatī inlahen?— Heūṅ, kūö ò nö vöö. Öt faitavö pöri Ēlaicha nö vöö. Kūöyòh? Pön akahakūö anga-aṅ tö Yāvē nö mihôiṅ nö hayööken ò. Ngach inrē ang Yāvē nö hameukhömat Ēlaicha tö ngam kumlēḵ re inuk tö urĕhngöre ṙētak. Hĕng heuh, anga-aṅ nö sapṙô Ēlaicha nö vë-ekūötēv nö söömtö ök tameūyö lamöktö el halīöngö. Lökten Yāvē min nö öthō nöt hayööken Ēlaicha nö hēk!

Hē Ēlaicha ngach nö el ök kinlūhu, hatöönan ang Yāvē nö ngö ṙô: ‘Asūp la-en meh ihih?’ Ngö ṙô Ēlaicha nö sapṙô ò: ‘Humeng tit tak chin öich tö köp öich vamë-ekūö meh. Öt holuvö chu-ö, lökten öich vöö töre min öich fëli.’ Pön ngö lōn Ēlaicha tö yik taṙòkhöre vamë-ekūö Yāvē nö ṙòkngöre vah nö fëli. Ngö ṙô pöri Yāvē nö in Ēlaicha: ‘Hö-ö, öt tökô-en ön ngam ahang meh. Sat kööny tumtak yip tarik tö ṙòngmö aṅ tö köp nö vë-ekūö chu. Hangöönöre man um vöö. Ṙòmöng pōitit nup la-en meh kahëtö chu!’ Ṙamölōn ök rih Ēlaicha tö lōn meh nö hangö e?—

Asūp öre haköp meh im inlahen Ēlaicha?— Um hĕng heuh vöö hēk ngö lōn töre höng hĕng tit tak chin.Pön ōt yip hol meh yip töhangenlōn tö Yāvē tö meh inrē. Hĕnghöre tökalēḵ kūö tökalēḵ inrē ang Yāvē, ngach örheūheu min anga-aṅ nö hayööken meh! Ṙamölōn öm ngach töre akahakūö, tö meh öm rö-ö öm höng hĕng tak?—