Töhangenlōn ök Repëka tö Yāvē. Isak minë-eny ök pīhö ò. Tö hangenlōn inrē anga-aṅ tö Yāvē. Isuh chūök ang Repëka nö meukkūö Isak? Sitih inlahen anga-aṅ nö hameuktöre nö hòṅ haṙamlōn Yāvē? Ta-a töi ṙūötö mikahkūöre tö ò.

Kūön nā Apraham nā Sëra ök Isak. Mi-iyöng im panam cha-a Kanā-an. Hö-ö yik tarik aṅ in e nö lamöklōn Yāvē. Lōnu pöri Apraham tök kikōnyö kūön re nö pīhö tö kikānö lamöklōn Yāvē. Lökten ò nö tīnngen ök tarik alaha re ang Ēlisör, nö chöh pīhö Isak nö chuh Haran, ngam chūök yik mak alaha Apraham nö iyöng.

Kiröönngöre ngach Ēlisör nö holröön tö yik tahëng mahalanṙen. Marô-òlkūö cha-a nö kiröön. Kumtö nuk tö söm nòng ūṅt cha-a nö kameun nuk nya-aṅkūö tö nuk nöinykö kum cha. Sitih mikahkūö pöri min ang Ēlisör töp kikānö tö hòṅ pīhö Isak? Hē Ēlisör pöri tö yik tahëng mahalanṙen nö teung nö i Haran, sökngöre ngach sin cha-a nö ikui ök tö-ūlö mak, pò Ēlisör nö akahakūö tö e nö ṙētak yik kikānö nö kunyī nö fòk mak. Vë-ekūötēv ngach anga-aṅ nö ngö ṙô nö in Yāvē: ‘Öp rēlö min chūök chu havëkö òk re tö mak, ngach kētö òk chu anga-aṅ ane inrē kētö òk minë ūṅt chu, akahalōn min ngach chū-ö tö ò nö anga-aṅ tö halēniṙen tö meh.’

Chalô tök rēlö Repëka nö yih nö fòk mak. Vënyu nang in töm Paipöl tö Repëka nö tö löök nö kikānö. Havëkö kūö ò ngach ang Ēlisör tö òk re tö mak,  ngach ngö ṙô Repëka: ‘Hòṅ yĕh. Kētö òk meh chin min, tūök òk minë ūṅt meh chin min inrē.’ Aseh kūöre man! Pōivat takô nun në ūṅt nö òk mak mötlö ṙôkvat yĕn haṙehe nômö, lökten Repëka lohten nö ṙōlvan nö chuh kui mak nö fòk òk u. Meuk kumlēḵ alaha ò öm nö la-envö imat ngam nyat?— Pingangkūö takô Ēlisör tö tī Yāvē nö kētö sanap ṙô ò nö vë-ekūötēv.

Kē-ĕkūö Repëka ngach ang Ēlisör tö nuk tövai nöinykö. Ngach Repëka nö havëten Ēlisör tö yik hol ò inrē nö chuh patī ök yöng ò. Vë-eny ngam chöö-önyre ngach Ēlisör nö tīniyö tö Apraham, ve-eny tī Yāvē inrē nö kētö sanap ṙô ò nö vë-ekūötēv. Ṙamölōn ngach yik aṅ patī Repëka, ngach halöngten ò nö pīhö Isak.

Hōḵ ök rih Repëka tö lōn meh nö hapīöhtu nö in Isak?— Akahalōn ang Repëka tö Ēlisör nö tahīntö Yāvē. Lökten hē ò nö hatöönö tö yik aṅ patī re yĕn hōḵ nö chuh Kanā-an nö hapīhö nö in Isak, ngach ngö ṙô anga-aṅ: ‘Heūṅ, hòṅ kiröönngöre chin.’ Ilööṙen ngach anga-aṅ nö kiröönngöre nö holröön Ēlisör. Teunghë cha-a nö i Kanā-an, hapīhö ngach anga-aṅ nö in Isak.

Kūö re ök Repëka nö hateung nuk lōn Yāvē, lökten Yāvē nö chumkūöṙen tö ò. Lökngörit im mikūönö ò ang Yēsū nö kayònyu unôichrit töṙōlhang samyeūheu! Ngatī man min me-eṅ yĕm asīnken Repëka öm haṙamlōn Yāvē, ngach chumkūöṙen min Yāvē tö meh.