Meuk më tarik öm in ngam nyat?— Cha-a yin hē Mëtiv, Mākös,Lūkös,Yôhan,Pītör, Yāköp, Yūt, Pôl inrē.Tö hĕngö ṙētak yin nö aṅ i nuk sakāmö Yēsū, ngach kūich nuk inlahen Yēsū cha-a.Tā-a töi ṙūötö mikahkūöre tö cha.

Lūöi tak yin më tanīnöṙô in cha nö hamòlröön Yēsū nö ahānga. Akahakūö öm tö cha?— Mëtiv, Yôhan, ngach Pītör. Tö akahakūö takô nak nā Mëtiv na Yôhān tö Yēsū, kö hĕngö kahūich cha-a tö minë līpöre vamë-eny inlahen  Yēsū. Kahūich Yôhan an inrē ngam līpöre Inmeukhömat holre tö minë tö lūöi chitri i minë-eny ò, ngam Raneh Yôhan, Innëtö Yôhan, töm Linūöyö Yôhan inrē. Nët minë chitri kahūich Pītör imat ngam Paipöl. Ngam Raneh Pītör hēk Innëtö Pītör tö ṙô hī. Im innëtö chitri re ang Pītör nö kūich ngam inlahen Yāvē nö löknyö el halīöngö ṙô nö eūken ngam kūön re nö ngö ṙô: ‘Hanangenlōn chu ön ngòh nö kūön chu, in ò chin ṙamölōn takô.’

Minā tahëng hēk tarik tö meūkö nö in ngam nyat, vë-eny nang hī nan cha-a inrē tö inlahen Yēsū nö imat minë līpöre kahūich re. Hĕng tak ngam tö Mākös minënyi. Tö kôtamat an anga-aṅ nö meuk kinë-eṅ Yēsū. Ngach Lūkös ngam tahëng. Doctor an anga-aṅ, pi-a lohten nö unôichrit kinpaha Yēsū nö vītöre nö Kristīön.

Kahëm Yēsū nan minā tö nët tak hēk kamūich Paipöl tö meukö in ngam nyat. Akahakūö öm tö minë-eny cha?— Nā Yāköp nā Yūt. Hö-ö sin cha-a nö ṙamātö ellōn re nö in Yēsū. Uroh nö kaheūkö ò nö katūöilöng elkui. Unôichngöre pöri ngach cha-a nö ṙatö ellōn re nö in Yēsū ngach vītöre nö Kristīön.

Ngam mana-aṅ tarik maheūṅk meh im nyat Pôl an anga-aṅ. Urĕhĕkūö ò nö vītöre nö Kristīön, Sôl sin ök minë-eny ò. Tökunyaha elmat anga-aṅ tö yik Kristīön hakihten cha inrē. Akahakūö öm rih tö lökten Pôl nö vītöre nö Kristīön?— Hĕng heuh ik tö hĕng sakāmö hē Pôl nö kiröön nö el talöökö hönglūk anga-aṅ nö hang ök ṙô lamöktö el halīöngö nö vë-ekūö ò. Yēsū ök anga-aṅ vamë-ekūö ò! Hatöönö Pôl anga-aṅ nö ngö ṙô: ‘Kūöyòh öm hakihten yip ṙamātö ellōnre nö in chu?’ Unôichrit e ngach Pôl nö halööktit re ngach vītöre nö Kristīön. Fënsīön nup chitri kahūich Pôl imat ngam Paipöl, löktökūö im Rōma söl im Heprāi.

Kaheuk sakāmö in ṙung vë-ekūö mat ngam Paipöl, hö-ö öi ṙöng?— Löktö im vinë-ekūöm Paipöl in min öi pōyen haköp tö inlahen Yēsū. Hòṅ ṙūötö mikahkūöre öm me-eṅ tö Yēsū?—