Kihngen öi tölōn meh yĕi kēken tölöök la-en?— Pōyen tarik tö ngatī lōn. Vënyu nang in töm Paipöl tö kanihngen ök ihih nyiö kikōnyö ang Yôsiā pön hòṅ la-en tö tölöök. Tö-akaha pöri yik hol ò nö mahayööken ò. Ta-a töi haköp inlaha Yôsiā tö yik hol ò inrē.

Amön minënyi ök kikōnyö yöng Yôsiā, rācha aṅ Yūta. Tötlöökö nuk la-en Amön, vamë-ekūö insātēv inrē. Hē ò nö kapah, i chūök ò ngach Yôsiā nö hayöng nö i Yūta. Ṙòmöng hëvhöre samyeūheu ṙēḵti anga-aṅ hē e! Asīnkö nuk tötlöök la-en ök yöngre hòng anga-aṅ tölōn meh?— Hö-ö ök nö ngatī!

Pòrô ngach Yôsiā nö kiröng, köp ngam  lōn ò nö hòṅ hang chööngö Yāvē. Lökten ò nöng katöllö holre tö yip tö hangenlōn tö Yāvē. Cha-a mahayööken ò nö lööngö la-en. Chiö yik rih hol Yôsiā?

Sefaniā minënyi ök töhĕng tak hol ò. Pròfĕt ök Sefaniā nö famëlen yik tarik aṅ Yūta tö cha min yĕn öt ṙāngenre nö vë-ekūö insātēv ngach fukkui min cha-a  tö nup kanihngen. Hang ṙô Sefaniā ang Yôsiā lökten ò nö öt vë-ekūö insātēv höng vë-ekūö Yāvē pöri.

Yarimiā ök muh inrē hol Yôsiā. Töhĕngö ṙēḵti cha-a nā Yôsiā. Hĕng ngam ṙētak inruklö cha inrē. Töhangenlōn nak tö höö töp lökten ik sā Yôsiā nö kapah, ngach kūich ök tinköökö ang Yarimiā vamë-eny pinṙūtölōn ò tö Yôsiā. Haruhkö alaha höö nā Yarimiā nā Yôsiā nö la-evṙen tö tölöök, ane inrē hang chööngö Yāvē.

Asūp öre haköp meh im inlaha Yôsiā?— Pòrô ang Yôsiā nö ṙòmöng kunkun, sön anga-aṅ nöng kēken nuk tölöök la-en. Katöllö hol re inrē anga-aṅ tö yip töhangenlōn tö Yāvē. Köpölōn man tö re öm hòṅ katöllö hol re tö yip tö hangenlōn tö Yāvē, yip mahayööken meh min öm lööngö la-en!