Meuk ngam kun kikānö öm in ngam nyat?— Kūön ök tarik an tö Yefta minënyi. Öt vë-eny nang hī ngam Paipöl tö minë-eny ò, akahalōn pöri ayi-ö tö ò nö ṙāmölōn tī tök yöngre tö Yāvē inrē. Ta-a chĕi töi haköp inlahen ò tök yöng ò inrē Yefta.

Tö akaha ök Yefta nö tarik, kamënyö ṙētak re inrē nö haköpten ök kūönre tö inlahen Yāvē. Hĕnghöre tökalēḵ ök inrē nö tarik, tö akaha inrē nö mahachōḵkūö. Lökten yik aṅ Israel nö tölṙô ò nö hachōkūö cha nö kiyung.

Vë-ekūötēv ngach Yefta nö havëkö kūö ngam Tēv tö minhôiṅyö cha nö kiyung. Kilēḵngôre anga-aṅ tö cha min yĕn mihôiṅ, ngach öp töng raneh min tarik kumnyi-inyre nö höngkūö ò nö i patī, anga-aṅ min tökētu nö in Yāvē. Ngach  höng ngöhören min anga-aṅ nö la-evṙen nö el ngam inrūkui ngam Tēv asā rò-òtö nômö ò. Chūök yik tarik ön misī ngam inrūkui yĕn ha-öiny ngam Tēv. Kò-en ngach ang Yefta nö mihôiṅ! Akahakūö öm rih tök kumnyi-inyre nö höngkūö ò ik sā ò nö havan nö chuh patī?—

Heūṅ, ök kūön Yefta kikānö! Töng hĕng maneuk ök nö kūön ò, ngach pöri min Yefta nö hòṅ söömngen ò. Angu-ö lökten Yefta nö haṙivölōn. Akahalōn pöri ök kūön ò kikānö tö ò nö kilēḵngôre lökten ò nö ngö ṙô: ‘Pa-a, ngach man kilēḵngôre im Tēv, hateung ṙô re man yēḵ ngach.’

Rö-ö pön höng haṙivlōn inrē ök kūön Yefta. Pön yēḵ ò min nö la-evṙen nö el ngam inrūkui, ötkô anga-aṅ nö hapīhö hēk kūönuvö inrē. Kalē-ĕlōn pöri anga-aṅ nö hòṅ hateung ngam kinlēḵngô ök yöngre ane inrē hòṅ haṙamlōn Yāvē. Angu-ö tömötlö nö lōn ò tö ngam inlahen ò öre nö hapīhö ngach kūönu inrē. Lökten ò ngach nö ṙāngö patī re ngach chuh el ngam inrūkui nö iyöng asā rôtö nômö ò.

Ṙamölōn tī ök rih tö lōn meh tö ök yöng re tö Yāvē inrē?— Heūṅ, ṙamölōn tī ök! Ngatī man min me-eṅ yĕm hang chööngö yöngre ane inrē hangenlōn tö Yāvē, ngach mihôiṅ min öm sā inlahen ök kūön Yefta, öm ṙamölōn tī tö nap yöng re tö Yāvē inrē.