LESÖN 03
Mihôiṅ Öm Ṙatö-ellōnre Im Paipöl?
Ngaich man pōyen haköp imat ngam Paipöl tö minë kinlēḵngô ṙanamlōn töt chanuhuvṙen, minë tövai inlēnö inrē imat e. Lohten ngaich öm ṙamölōn pô meh öm akahakūö tö u. Kihngen pöri öm ṙatö-ellōnre pöm ngölōn töm Paipöl tö e nö, ‘töng hötṙeh nö līpöre.’ Kò-en öi ri mihôiṅ ṙatö-ellōnre, tö minë vahënyöm Paipöl kumchikṙen töngamuh hēk nup yamih min inrē? Lāku ṙôken yip ngaich töyöölen tö u. Ta-a chěi töi ngëicha, kūöyòh öi mihôiṅ ṙatö-ellōnre in minë tö kūichiyö aṅmat ngam Paipöl.
1. Nuk inlahngen tökūichi töm Paipöl, kò-en hòng misī anū-ön ōt?
Öt töng vīka nun nö istōri minë ṙô vahënyö ngam Paipöl, pön tökô-en nö tö kūichi. (Mumkahten 12:10) Öt kanahnguṙen yik kamūich nö kūichtö minë ṙētak, kamngö hēk inlahen yik tarik inrē imat e. Yěi vë-ekūö nuk tö ngaichngen inlahen ngih panam ngaich kôtökūö min ayī-ö tö minë ṙô aṅmat ngam Paipöl nö tökô-en. Ngatī kanôtökūö yip tö akahakūö tö nuk tö ngaichngen, yip chamöh līöthen inrē. Töi ngëichkö ngih töhěng inchō elmat.—Vë-evkūö Lūkös 1:3; 3:1, 2.
2. Kūö yòh öi mihôiṅ ṙatö-ellōnre in minë ṙô ngam Paipöl, yěn töng hötṙeh angū-ö nö līpöre?
Yēḵ ngam Paipöl nö kakkö ṙô ngam sāëns ngaich hō-en höö ṙô anū-ö. Tö sā e yěn kakkö inlahen ngih panam tö minë tövīlöng inrē aṅ el halīöngö. Öt ṙatö-ellōnre pöri yik tarik misī tö ṙô ngam Paipöl nö vënyö inlahen u. Yěi ngëichkö minë chahöh yip sāëntis pöri ngaich kôtökūö ayī-ö tö minë tökūichi imat ngam Paipöl nö kô-en nö löng. Mihôiṅ ‘töngamuh hēk örheūheu inrē öi ṙatö-ellōnre’ öi im Paipöl.—Salmai 111:8.
3. Kūö yòh öi mihôiṅ ṙatö-ellōnre inup tö-eūka ṙô ngam Paipöl tö-öl nö teungtökūö?
Aṅhav mat an ngam Paipöl tö ‘nup ṙô nup tö-öl nö teungtökūö.’ a (Isayā 46:10) Lööngö ṙô angū-ö nö vë-eny inlahen minë tö-eūka kinlēḵngô urēhěkūö u nö teungtakūö. Minë tö vënyu inrē inlahen në ṙētak hī töngamuh ṙòkhöre anū-ö nö teung. Haroh tūmö nup min kinlēḵngôm Paipöl kahakkö hī öi in ngih lesön. Lohten min öm pingang öm meuk inlahen u nö teungtökūö!
MIKAHTÖKŪÖRE HĒK
Ngaich in meuk minë ṙô aṅmat ngam Paipöl nö tökô-en. Hō-o ṙô ngam Paipöl inrē ngam sāëns. Kò-òren in ngëichkö minë tö rahëichyen tö-urěhangen vinënyi ṙôm Paipöl. Lohten min öm pingangkūö öm hang inlahen u.
4. Minë tökūichi ṙô imat ngam Paipöl anū-ö inrē kanôtökūö ngam sāëns
Ngö lōn yik tarik misī töng panam nö chūöku nö ṙātu. Röngnyöm VITIŌ.
Hangṙô ngam tökūichi imat ngam līpöre Yōp ngam tö 3,500 samyeūheu rò-angen vinënyi. Vë-evkūö Yōp 26:7, ngaich kakkö minë intöönö yamih:
-
Kūö yòh öi pingangkūö tö inlahen vinënyö ngih panam nö seūhaka “nö öt chūöku”?
Yěn suktöre ngam kumṙah nö löktö latulöng, havanlöre hēk angū-ö nö chuh latulöng ngaich vīngöre nö taṙul ngaich suktöre hēk nö ikui ngih panam. Angū-ö an ṙô chinvīṙö röön mak. Höng urěhēkūö tö 200 samyeūheu tarik nö akahakūö tö e. Ha-ehangen ṙô pöri ngam Paipöl nö vënyö inlahen chinvīṙö röön ngam mak. Vë-evkūö Mumkahten 1:7, ngaich kakkö minë intöönö yamih:
-
Kūöyòh öm pingang öm hang ṙô ngam Paipöl nö vë-eny inlahen chinvīṙö röön ngam mak?
-
Ngönlöre öng ngam ṙinātö ellōn meh, nö löktö im vahë-ekūö meh miröökö aṅmat Paipöl?
5. Minë tö ha-ehangen vinënyi inlahen nö imat ngam Paipöl
Vë-evkūö Isayā 44:27–45:2, ngaich kakkö minë intöönö yamih:
-
Sitih inlahen kinūichngö öng ngam ötkanò-òṅ më aṅ Pēpilön nö kiyung urēhěkūö tö 200 samyeūheu?
Yēḵ hī vë-ekūö minë töha-ehangen vinënyi inlahen ngih panam, ngaich akahakūö ayī-ö tö inlahen ök Racha Sairös tö yik hol ò kumyung aṅ Pörsiā nö mihôiṅ tö yik la-alre aṅ Pēpilön ik 539 B.C.E. b Nö sitih inlahen? Pön töhavīlöng Pēpilön tök töhěng tahël, lökten yip töhòṅ kiyūngö cha nö ötkô nö kuhēthötre. Harīkngö talöökö hanëmö ngam mak pöri ang Sairös, lökten ngaich angū-ö nö kūönngöre. Lööṙen ngaich më kumyung nö kuhēthötre, pön höng luvë-akkūö inrē nuk inkūp, lökten cha-a nöng öt kiyung ngaich nöng mihôiṅ, unôichrit tö 2500 samyeūheu rô-angen. Ha-ehangen vinënyi angū-ö inrē nö imat ngam Paipöl.
Vë-evkūö Isayā 13:19, 20, ngaich kakkö minë intöönö yamih:
-
Ngam inlahen Pēpilön töngamuh nö in ngam nyat, sitih inlahen angū-ö nö vënyö ngih tö-eūka kinlēḵngô aṅmat ngam Paipöl nö löng?
Nyat ngam panam Pēpilön unôichrit pinyāyngö e nö i Irāk töngamuh
6. Ha-ehangen ṙô inrē ngam Paipöl nö vë-eny inlahen në ṙētak hī töngamuh
Vënyu inlahen ngih panam nöng öt löng inë “manā-aṅ sakāmö” tö ngam Paipöl. (2 Timôtī 3:1) Ngaich kô-en öi meūkö u töngamuh.
Vë-evkūö Mëtiv 24:6, 7, ngaich kakkö minë intöönö yamih:
-
Asuh nup min kanihngen töhāngö tö hī el në manā-aṅ sakāmö?
Vë-evkūö 2 Timôtī 3:1-5, ngaich kakkö minë intöönö yamih:
-
Asuh öp tökūichö nö in ngih miröökö nö vamënyö tinrīken yip tarik inë manā-aṅ sakāmö?
-
Meuk töngatī öm më-eṅ tinrīken tarik töngamuh?
ṘÔ YIP TAHËNG: “Sitih inlahen öi ṙatö-ellōnre tö ṙô ngam Paipöl yěn höng kahūich tarik angū-ö?”
-
Sitih lōn öm më-eṅ höng ṙô mufē ellōn tarik öng ngam Paipöl?
MINË HAKÖP HĪ NGAICH
Löktö in minë töha-ehangen vinënyi inlahen ngih panam, ngam sāëns hēk minë tö-eūka kinlēḵngô in mihôiṅ ṙatö-ellōnre tö minë tökūichi ṙô aṅmat ngam Paipöl nö tökô-en.
Sitih ṙô öm më-eṅ?
-
Tökô-en ön minë tökūichi inlahngen aṅmat ngam Paipöl, hö-ö ṙöng?
-
Asuh nup ṙô aṅmat ngam Paipöl nup tö unôichngöre kanôtökūö ngam sāëns?
-
Mihôiṅ öi ṙatö-ellōnre in minë tö-eūka kinlēḵngô aṅmat ngam Paipöl? Sitih lōn öm më-eṅ?
NGËICHKÖ NË INRĒ
Ōt hòng inup vahënyöm Paipöl, töt sāḵta ṙô nö im sāëns?
“Sāḵta Ṙô Hòng Ngam Sāëns nö im Paipöl?” (El vepsāit töhakööpö)
Asuh nup minkahngö imat ngam Paipöl vamënyen hī öi in në “manā-aṅ-sakāmö”?
“Minë Tö 6 Kinlēḵngôm Paipöl, Tömeūkö Tö Hī Nö Teung” (Chūökamahati-HI, Mē 1, 2011)
Mikahtökūöre man tö minë tö-eūka kinlēḵngô aṅmat ngam Paipöl nö teungtakūö nö vamë-eny inlahen ngam inyööngö tö Krīs.
Mikahtökūöre tö inlahen ngam tarik tö ngönlöre ṙinātö-ellōn nö im Paipöl hē ò nö haköp minë tö-eūka kinlēḵngô imat ngam Paipöl.
“Töng Öt Ōt Ngam Tēv Tö Lōn Chu” (Chūökamahati-HI Öngk 5 2017)
