SÖM hang sumkam unôichrit yanônlö Yēsū nö el halīöngö, 120 ṙôken yik haköptö ò nö hamūlöre nö el ök tö hĕng patī i Yērusalem, ik hē ök tökiröng sakāmö yik Yahūti ök tö Pentĕkòstē invëka ik 33 S.M. Hönglūk ngach ök tö sā ṙën ṙô kuföt tökalēḵ nö hatööḵlö ök patī. Ngach yik tanīnöṙô nö kaknyô re tö tahëng ëlô nuk töt huneū-euṅ ṙô cha sin ëlô. Tö sitih manah ön anu-ö töngatī? Pön ṙöstö ngam töhet fanöinylöre ngam Tēv nö ikui yik mahaköp.

Pōyen yik tömaṙòngö el kahôyö yamihtökūö nö im panam nö ṙā-ang i nup tahëng tö ṙōl pinnāmö nö chööḵnyö tök tökiröng sakāmö. Ngach uṙeh cha-a nö hang ṙô yik tanīnöṙô nö ṙôtö ëlô cha nö öt karōhaṙô. Vë-eny nang cha pöri Pītör tö minë pinngangkūö maheuṅk cha nö taneungtö kūö nuk ṙô ök pròfĕt Yô-ĕl tö ngam Tēv min nö “ṙöstö ngam töhet fanöinylöre” nö ikui yik tö hòṅ teunghu töm pinngangkūö inlōnti. (Yôěl 2:28, 29) Inmeuktö ngam hanāngenlōn ngam Tēv nö öt köpsöṙen nö ikui yik Israel, kētu pöri angu-ö nö im tufömngöre Māṅ, lökten yip tö hòṅ löklōn ngam Tēv ngach hòṅ vītöre nö tamömrit Kristū.

Ngach pöri nö sīöplö ṙòken yik tö kunyaha elmat, ngach kalonghötnen yik rīkre tanīnöṙô nö el kinlōngö. Ngach ik hatööm ök ma-ahānga ngam Tēv nö löpnyö kūö ngam kinlōngö ngach hōtö yik mahaköp nö iṙūöhen nö mikahten. Ik tahëng peuheū chā-a nö hēk nö mikahten, kuhēthötre chā-a nö el chūök vine-ekūö Tēv ngach ahangkö ngam tölöök inhanga inlahen Yēsū. Angëṅ takô ngach yik makūökūönṙô ngach tahngen cha nö mikahten. Öt vöö pöri yik tanīnöṙô ngach ngö ṙô: “Hòṅ hang chööngö ngam Tēv in mööḵlö tö chööngö tarik.”—Inlahen 5:28, 29.

Ṙūöhölre ṙôken ngach ngam inkihten. Ōt yik yahuti samūichkö fālen Satēpan nö töt lamëkôre tö ngam Tēv ngach kulehe anga-aṅ tö ihong nö kumpāha. Hĕng tak ök ṙāl tarik—Sôl aṅ Tārsös—nöng ngëicha, hōḵngö finëlngö Satēpan. Kiröönngöre ngach anga-aṅ nö chuh Tāmöskös pô ò nö hòṅ kēḵ yik kristīön tamömrit Yēsū nö haköövö cha. Ik hē Sôl pöri nö kiröön nö el talöökö, ngach hönglūk ök töyang löktö el halīöngö nö havīlen ò ngach hang ök ṙô anga-aṅ tö ngö ṙô: “Sôl, Sôl! kūöyòh öm öthakôlò chu?” Öt meuk anga-aṅ, kūö ök töyang, ngach hatön nö ngö ṙô: “Achiö Öm Me-eṅ?” Ngach ngö ök sanap ṙô ò: “Yēsū chin chū-ö.”—Inlahen 9:3-5.

Lūöi hang sumkam ngach unôichrit në, tīnngen ök töhĕng tak ang Yēsū mahaköp ök tö Ananī invëka nö havantö mat Sôl nö meuk. Vōkö ngach Sôl ngach öt pinhe-eṅvkūö ṙô nö ahanga tö inlahen Yēsū. Kaheukö minënyö ngach ang Sôl nö Pôl ngach vī-ingre nö tökalēḵ nö aṅ ngam Māṅ.

Höng i yik Yahūti tö yik aṅ Samaria chūök yik tanīnöṙô sin nö ahangkö ngam tölöök inhāngö, ngach meukö ök hĕng tak ma-ahanga ngam Tēv tö Kòrnēli ök tö pa-ekūö töm Tēv mā kūö kumyung aṅ Rōm, ök vamë-ekūö ò nö tölṙô kinë-erökuö Pītör ök tanīnöṙò pòn hōtu nö chuh patī ò. Hōlu anga-aṅ tö yik tahëng, ngach Pītör nö haköpten Kòrnēli tö yik aṅ patī ò inrē. Ṙònghöch ṙô ang Pītör nö mikahten, teungtöre ngach ngam töhet fanöinylö nö i kui yik tahëng mihëṙö tarik ṙāmatö ellōnre ngach hōtö vīnôkö cha ök tanīnöṙô nö i minë-eny Yēsū. Ngam talöökö chamuh im nômö tö örheuheu-aṅ, ngach nö löpnyu kūö nö i taṙòkhöre tarik inë panam inrē nö ṙòkhöre. Ngach ngam Māṅ nö pīratngö ngam tölöök inhānga nö keuheutngöre chūök.

—Lökngörit im Inlahen 1:1-11:21.