SITIH inlahen öi öre yĕn ṙòkhöre në pūlngö hēk tö yip mā mahayöng nö elkatòh ngam inyööngö tö Yāvē? Lohten nöng keuheūtngör chūök ngam lanāmö, kumchikṙen inrē nö i në taṙòkhöre panam. Pòn ngatī inlahen ök inyööngö tök rācha Sòlòmön inuk tö 40 samyeūheu rò-òten ò nö hayöng.

Urēhĕkūö kinpāha Tāvit, ha-ūichlen ök kūön re anga-aṅ ang Sòlòmön nö i chūök ò nö rācha. Ik hē Sòlòmön nö heūv heūvö tö hatööm, vë-ekūö ò ngam Tēv nö löktö i heūvö nö hōten ò nö havëkö öp kuilōn re nö in ò. Höng havëkö mikah re pöri Sòlòmön, huneū-en re inrē nö hayöng yik tarik. Ṙamölōn ngach Yāvē tö minë havëkö ò ngach kĕ-ĕkūö ò tö mikah, mikah elmat inrē. Kilēḵngôre inrē ngam Tēv Yāvē tö ò min nö ṙūölö ṙôken kanôlò ò, ineū-eu, hēk rô-òtö nômö ò inrē, yēk ò nö köpsören nö hang chööngö ngam Tēv.

Teūingö hināngö ngach nuk mikah hēk huneū-eu ṙô Sòlòmön nö kahôka. Ngach ngö inlahen angu-ö, hē nak tö nët tak yöngnyīö lamā-al kūö re tök kūön re pön nët re taka chā-a nö sūöchköre nö yöng ök nyīö. Tölrô sināchnyö ök nyīö ngach Sòlòmön nö nët tit hòṅ minā yöngnyīö nö kö harònghukūö töm nyīö. Ngach hōḵ ök hĕng tak yöngnyīö. Ngach pöri ök tökô-en yöng ök nyīö nö ilöören nö sōtö sināchnyö ök nyīö hōtö ök nyīö pöri anga-aṅ nö kētu nö ik hol ò. Akahalōn ngach Sòlòmön tök tö aṙē-ĕlōn yöngnyīö nö anga-aṅ yöng ök nyīö, lökten ò nö kētö ök nyīö nö in ò. Ilööṙen ngach nö parāti hināngö ngam huneū-en Sòlòmön nö kahôka. Akahalōn ngach yik tarik töm mikah Sòlòmön nö aṅ im Tēv.

Hĕng ök tökiröng ineūnyö kahëken Sòlòmön lā-en misī, ök minānlö ngam patī ngam Tēv töt insā-av vanāyö vinī-i nö i Yērusalem ngam chūök manūltö më Israel nö vë-ekūötēv. Ik ṙinòngnyö kūö ngam patī ngam Tēv ngach vë-ekūötēv Sòlòmön nö ngö ṙô: “Yēh meuk, ngam halīöngö tö ngam lātulöng takô halīöngö inrē nö öt kô-òre nö chūök meh; höichngen ngih patī tö mānlöng tö chu!”—1 Rācha 8:27.

Parāti hināngö ngam minë-eny Sòlòmön nö in minë tahëng panam, sölngö nö i Sīpā i Arēpīa. Ngach ök rānī aṅ Sīpā nö yih nö hòṅ meuk nuk ineūkö Sòlòmön, tö nuk kanôlò ò, hēk hòṅ kalah ṙū-u ök mikah ò inrē. Pingangkūö ngach ök rānī tö minë mikah Sòlòmön, tö minë kanôlò ò, töp lökten ò nö ha-öiny ngam Tēv Yāvē nö ṙamātö töngatī mikah nö el ngam kantēra rācha. Kô-en minë inkôlò, lanāmö, kumchikṙen inrē tī ngam Tēv Yāvē nö keuheūtngör chūök mineūkö nö i kūö ngam panam Israel nöng inuk hē ök rācha Sòlòmön nö hayöng.

Hö-ö pöri Sòlòmön nö köp tī tö minë chööngö, hēk minë mikah minë kinë-ekūö ò tö ngam Tēv Yāvē. Lökten ngach anga-aṅ nö kööinyu ṙôken kahë tö pīhöre, in cha më tö kööinyu ṙôken nö ōt më vamë-ekūö tahëng Tēv. Tömrit nuk tēv yik pīhöre ngach Sòlòmön yik töt ṙamātö ellōn re nö im Tēv Yāvē. Marôvat ngach Sòlòmön töm Tēv. Lökten ngam Tēv nö vë-eny nang ò tö ngam pūlngö ò min nö kĕ-ĕyö nö ṙa-ang in ò, hö-ö pöri nö keuheūtngöre kinëngö. Pòn köplōn ngam Tēv tök kinlēḵngô re nö in ök yöng ò Tāvit. Höng ngam mana-ang kūö kanūönö alaha ngam pūlngö ò tököp nö eltī ò, nö chöö-öny tö ök kinlēḵngô ò nö ik yöng ò Tāvit. Pòrò ang Sòlòmön nö öt köpsören nö hang chööngö, sön pöri ngam Tēv Yāvē nö haköp ngam kinlēḵngôre nö in Tāvit.

—Lökngörit im 1 Racha 1 mirūlö söl im tö 11; 2 Kinṙötngö 1 mirūlö söl im tö 9; I.Chööngö 17:17.