ṘŌL samyeūheu rô-òten yik kūön Israel nö iyöng ip panam Aikup, kòlô chā-a ngach nö in e, hēk ṙūölöre ṙôngö inrē. Tufömngöre ngach ök umuh rācha i Aikup ök töt akahākūö tö Yôsĕf. Hē ök rācha nö meuk sanīöpö ṙôngö më Israel, vīten cha ngach anga-aṅ nö sā tö haköövö. Kētö chööngö inrē anga-aṅ nö in yik lamāch tö yip töng fötnyu nyīö kikōnyö nö kavalnyu nö el ök tahël Nāil. Hĕng tak pöri ök yöngnyīö töt vöö, lamaklö ök kūön re kikōnyö nö hayunngen ò nö el kuvôkö nö i hôi nuk pāpirös chōn el mak. Meūkö ngach ök kun nyīö tök kūön Fërō kikānö, kē-ĕ ò ngach anga-aṅ ngach kaheuk minë-eny ò nö Môsös, ngach haruklen ò nö sā inruklö kūön rācha.

Hē Môsös pöri nö 40 samyeūheu ṙēti, fukkui anga-aṅ tök töhĕng kanihngen, pön hòṅ laklö nômö ök hol maneuk re Israel ök töhaköövö tarik nö ṙā-ang eltī ök yöngkūö töla-envö aṅ Aikup hē cha nö fëlö höö, ngach kapāha tī tö ò. Falngöre ngach Môsös tö kūö pinhë-ekūöre ngach chuh ik tö marôvat panam. In e ngach anga-aṅ nö hayunngöre töm fālen re. Ik hē ò pöri ngach nö 80 samyeūheu ṙēti, tīnngen ò hēk ngam Tēv Yāvē nö chuh kūö Fërō nö i Aikup, pòn hōtu nö havëkö ṙinānyö më tarik ngam Tēv hòṅ cha nö ha-öönyan.

Halööknyôre pöri ang Fërō tö re nö öt hòṅ halöngngen cha. Lökten ngam Tēv nö söömtö tö söm lanëlngö nö i Aikup. Asā tum van Môsös nö ikūö Fërō, öt hanvööten ellōn ang Fërō, hanöng sāha ngam sinöömö plēk nö kapaha tī tö yik lanòh kūön yik aṅ Aikup. Höng yik mikūönö hamang chööngö ngam Tēv yip kamëtö minkahngö kūö patī re nö lūöptö mahām nuk pöököre nuk tökētu tö fööngö, cha-a töt löökö töm kinpāha. Ngach ök ma-ahānga ngam Tēv ök mahalëlngö yik lanòh nö chööḵngö kūö nuk patī tö mikahayö. Unôichrit në ngach yik Israel nö haköpken ngih pinngangkūö ṙinānyö re nö kaheuk samyeūheu nö haköpken ngam Pāska.

I kinpahlöre Fërō tök lanòh kūön re kētö chööngö ngach anga-aṅ hinôtö yik taṙôkhöre kūön Israel nö kiröönngöre nö ṙāngö ngam panam Aikup. Ilöö halēnlöng ngach ngam maneutnyi cha. Haṙi-ing ellōn re pöri Fërō, ngach lū-ulrit yik Israel nö holtö yik töpōyen kumyung tö nup inröl tö tūökö tö kōra. Ngach hē më Israel nö ṙòngmö i taseū ngam Töngāṅv Mai tö linūlöritre tö yik kumyung, pa-ekūö ngach chā-a pön öt talööku nö falngöre. Vīten ngam mai pöri ngach ngam Tēv Yāvē nö nyôlö ngach harēvöre minë mai, lök ellōn ngam mai ngach yik kūön Israel nö kiröön nö el tanyô, ngach minë mai nö rananglö cha nö lāhamö hēk lā tavē inrē. Hē yik kumyung pöri aṅ Aikup nö ròngti röön töm mai nö lūlörit cha, havantö ngam mai ngach ngam Tēv nö kapökngen Fërō tö yik kumyung ò inrē.

Unôichngöre ngach yik Israel nö vīlö inrūkui re nö ikui ök rôngö Sināi, ngach kētö kinlēḵngô ngam Tēv nö in yik Israel. Lökten in Môsös tī anga-aṅ nö kētö chööngö nö lamaklen cha hēk mahachōḵ kūö cha inrē nö inup tölöök inlēnö cha i rô-òlkūö el talöökö cha. Hanöng saha më aṅ Israel nö köp nö lök i minë chööngö ngam Tēv, öthō ngam Tēv Yāvē nö ṙāngen cha. Ngach vīten ngam mumātö cha nö löktö inkòlô taṙôkhöre tarik.

Ngach pöri nö pōyen yik aṅ Israel töt mahameuktö ngam ṙinātö ellōn re nö im Tēv. Lökten ngam Tēv Yāvē nö vīten cha nö 40 samyeūheu rô-òtö röön nö lök ël ngam elinchōn. Vīlen Yôsuā ngach ang Môsös nö i chūök re ök tö chīpen, nö mahachōnyen më aṅ Israel. Halēnken re ngach yik aṅ Israel nö hòṅ kuhēthötre nö im panam kinlēḵngô, ngam ṙô ngam Tēv nö in Aprahām.

—Lökngörit im līpöre Maneutnyi; La-en Lēvī; Kinṙeūkö; I.Chööngö; Salmai 136:10-15; Inlahen 7:17-36.