IK LINŪÖYÖ sakāmö unôichrit kinpaha Yēsū, rēvre yik yöngnyīö yik mi-i yik mahaköp tö kôtökūö tök tökiröng ihong ök mi-i kūö ök anūlö nö piliôngiyö. Kôtökūö chā-a tök anūlö nö öt aṅhavö!

Nët tak nak ma-ahānga tö meūkö, hĕng tak ök tö ngö ṙô: “Chamöhö Yēsū yin, öp aṅ Nāsaret. . . Choholre ök nö ngach.” (Mākös 16:6) Öt ahāṅken re ngach yik yöngnyīö nö fal nö hòṅ ve-eny nang yik mahaköp. El talöökö chā-a ngach nö meūkö Yēsū, ngö ṙô anga-aṅ tö cha “ui pa-ekūö, kuṙòh ve-eny nang yip kahëm chu, hòṅ cha nö chuh Kelelī, in e yip min nö meukkūö chu.”—Mëtiv 28:10.

Unôichngöre im hē e angu-ö sakāmö nët tak nak mahaköp kumröön nö ṙā-ang Yērusalem nö chuh ip elpanam Ēmīös. Hĕng tak ngach ök tarik hamòlröön cha, ngach hatöönö cha tö nuk ṙô cha nö ve-ekūö re. Höng anga-aṅ pöri ang Yēsū ngam tö hachohlöng hö-ö pöri cha-a nö akahakūö tö ò sin. Holtö miṙivlōn re chā-a nö sapṙô ò nö ve-eny re nö kakken Yēsū. Rĕhnyô re ngach ök hamòlröön cha nö ve-eny inlahen taneungtö kūö nuk ineūkö Mesayā nö ṙòkhöre nö hateūngiyö tö Yēsū. * Hē nak mahaköp pöri nö akahalōn tö ngam hamòlröön cha nö Yēsū, chaṙēviṙen ngach Yēsū nö ṙāngen cha.

Ilöören ngach nak tö nët tak mahaköp nö chuh Yērusalem. Umuh cha-a nö kôtökūö tö yik mahaköp nö mūlhakṙen nöng löphak kūö. Ik hē nak tö nët tak nö venyö nuk maheukre hameuktö re ngach ang Yēsū. Öt ṙātö ellōn re pöri yik mahaköp hĕngöre pingangkūö inrē. Ngö ṙô Yēsū tö cha “kūöyòh öi rööyö alaha? Kūöyòh öi katööngalōn inrē?” Ngö ṙô inrē anga-aṅ: “Ngö kinūichngö an tö Kristū nö tökihngen ngach havanlöre nö hēk im linūöi sumkam, nö ṙā-ang yip tökapah.”—Lūkös 24:38, 46.

Unôichrit anahlö Yēsu 40 tum sumkam anga-aṅ nö hameuktöre nö in yik haköptöre. Ik töhĕng heuh, meūkö anga-aṅ tö yik tö 500 ṙôken! Ik hē e angu-ö ṙētak lohten anga-aṅ nö kē-ĕkūö cha töm tö tökiröng tinöölô cha nö ngö ṙô: “Kuṙòh vīten vē taṙòkhöre tarik nö mahaköp. . . Haköpten cha nö haköp nup taṙòkhöre tinöölô yīö tö chu. Yĕh meuk, örheūheu chin holtöṙah yīö söl ip manāngen ngih panam.”—Mëtiv 28:19, 20.

Ik manā-aṅ mineūkö ò tö yik tö 11 tak mahaköp, kilēḵngôre Yēsū nö in cha “teū-ngen pöri min yīö tö kanô-òṅ, hē ngam töhet fanöinylö nö i kui yīö. Ngach yīö min ameūken chu. . . söl ip manā-angkūö ngih panam.” (Inlahen 1:8) Ṙòngmöng hatīöna cha-a ngach kēḵlöngö anga-aṅ nö chuh el halīöngö, ngach ök taṙul nö hanyatngen ò nö ṙā-ang mat yik haköptö ò.

—Lökngörit im Mëtiv 28 mirūlö; Mākös 16 mirūlö; Lūkös 24 mirūlö; Yôhan 20 mirūlö hēk 21; 1 Kòrin 15:5, 6.