AKAHALŌN ngam Tēv Yāvē töm hanāngenlōn kūön re, ngam tö kilē-ĕyö ṙama-any min, nö öthō nö öt kihngen, ötlööngö kinpāha inrē. Nö inteungngö ṙô ngam raneh kinlēḵngô im līpöre Ranehlö 3:15. Mihôiṅ öi akah ṙôken öp miṙivlōn ngam Tēv nö meuk finëlngö ngam kūön re? Hameuktu ön tö Ò, i inlahen Aprahām nö kēḵngö ngam töng hĕng maneuk kūön re Isak.

Tökiröngö ṙinātö ellōn ök Aprahām nö im Tēv, ngam kumlēḵngôre töp tö kilē-ĕyö ṙama-any min, nö löknyö in Isak. Ṙātö ellōn re inrē Aprahām tö ngam Tēv nö hachohlen Isak yēḵ ò öre nö kapah, lökten Aprahām nö halöngngen ngam kūön re nö tökētu. Ik hē ò pöri nö hanyāklö kël re, sōtu anga-aṅ tök ma-ahanga nö ṙā-al kël re nö in ò. Eūḵ ngam ṙinātö ellōn Aprahām ngach ngam Tēv, tö ò nö öt kintööngulōn nö kēngö nômö ngam kūön re, lökten ngam Tēv nö havīölrit ṙô re töm kinlēḵngô re nö in ò.

Uhēngöreṙen ngach, ang Isak nö nët maneuk kūön tö kikōnyö tö nā Isô nā Yāköp. Öt sā Isô pöri ang Yāköp, pô ò nö tö aheuk tö nup ṙô ngam Tēv lökten ò nö hakôlöngṙô tö ngam Tēv. Harīkiyö ngach ök minë-eny Yāköp nö Israel, ngach yik tö 12 tak kūön ò nö vītöre nö yöng kūö miyööngö Israel. Sitih löktö pöri ngam mikūönö nö vī-ilre nö tökiröng nö miyööngö?

I chinvālö minë ṙētak ik hē yik maṙöinylö kūön Yāköp nö kunyahaṅ elmat tö ök kahëm re Yôsĕf. Inyihngen ò ngach chā-a nö haköövö nö i Aikup. Öt ṙāngen Yôsĕf pöri ngam Tēv Yāvē, ngòh töyāchö ellōn töt pinhë-eṅvkūö inrē ṙāl tarik. Pòrô anga-aṅ nö pōyen kanihngen sön ngam Tēv nö kēnyen ò nö ṙā-ang el minë kanihngen. Kē-ĕvkūö anga-aṅ tö Fërō tö tökiröng minā-aṅ. Lööngö ṙētak vinīlö ang Yôsĕf nö yōm kintölngö nya-akūö nö i Aikup tö ṙētak yanīhi ngam inyāichö nö keuheūtngör chūök nö im panam. Lökten Yāköp nö tīnngö yik kūön re nö havah nyā-aṅkūö cha nö chuh Aikup. Hē ranehtömat yik mëm Yôsĕf nö meūkan urĕh sin chā-a nö rööyö alaha tö kūö nuk inlahen tī re tö ò, Unôich pöri yik mëm Yôsĕf nö fūöllöre nö in ò ngach peuny miṙivlōnre tö nuk tinī-i cha tö Yôsĕf. Lökten cha nö havëkö inṙēlö re nö in Yôsĕf. Halēnlö el talöökö më mikūönö ngam yöng re ngach ang Yôsĕf nö chuh Aikup. Kē-ĕvkūö ngach chā-a tö tökôlò kūö tumlat, chūök tī cha nö teūch nyā-aṅkūö re ngach kôlò. Akahalōn Yôsĕf tö e nö tī ngam Tēv nö in ò nö halēnlö inteungtö kūö minë kinlēḵngô re.

Keuheūtngö minë sakāmö kanööinyöre ang Yāköp nö i Aikup, havīlöng anga-aṅ tö më samīöplö mikūönö ò. Ik hē ò nö hòṅ kapah, kilēḵngô re anga-aṅ tö öp ṙama-any min nö tökalēḵ nö mahayöng, öp tö fötnyu min nö i ngam mikūönö Yāköp nö lökten im mikūönö Yūta. Unôichngöre pöri urēhĕkūö kinpāha Yôsĕf ngach kilēḵngôre tö ngam Tēv min nö ṙānyö më kūön Yāköp nö ṙa-ang Aikup.

—Lökngörit im Ranehlö tö 20 mirūlö söl im tö 50; Heprāi 11:17-22.