KĒ-ĔVKŪÖ ang Yēsū tö ngam Tēv tö kumlēḵ re nö hameuktö pinngangkūö, minë töt kanô-òṅ tarik nö la-en. Chöngṙen anga-aṅ nö i kūö yik tömaṙôngö tarik nö hameuktö pinngangkūö. Inmeuktö Yēsū nö tö mötlö kumlēḵ min tö yip tö kunyaha elmat, inmeuktö ò inrē nö mi-hôiṅ nö kēngö nup taṙòkhöre kanihngen ing panam nup töt kanô-òṅ tarik nö kē-ngen u. Tö sā në inchō elmat.

Neūkö. Ngam raneh hameuktö Yēsū pinngangkūö la-en ò nö vīngö ök mak nö tö kuchik nö vāin. In nuk tahëng ngöre hēk ṙētak, nët heuh anga-aṅ nö hanëkö kūö yik tö köönyu ṙôken tarik nö aṅtī tö nuk tö rahëichyen ròtī hēk kun kāḵ inrē. In u në tö nët la-en ò, söönen nö pōitit nuk chööḵ kūö cha nö nyā.

Invah. ‘Halanken töṙōlkangen invah i yik tarik’ ang Yēsū. (Mëtiv 4:23) Höng lööṙen tī anga-aṅ nö halanken yik tötmeuk, töt-hang, töyeūnyu, mahangë-eṅre, tötkôlò alaha, hēk tölum inrē. Öt hĕng invah töt kanô-òṅ ò.

Chanôch panam. Ik sā Yēsū tö yik ha-köptö ò nö hatēhĕng re nö lökngö el ök mai Kelelī, chalô ngach ök yöng chanôichö. Pa-ekūö ngach yik mahaköp. Höng ngëichkö ngam chanôichö ang Yēsū ngach ngö ṙô: “Heūhöre! um halöinyköre.” Ṙāngenre ngach ngam kuföt, ngach kalūöng takô angu-ö. (Mākös 4:37-39) Ik tahëng hēk ṙētak ik saha ök chanôchö, kiröön anga-aṅ nö lök kui mai.—Mëtiv 14:24-33.

Tötlöök sī-ö. Kirööngö kumlēḵ yin vē tötlöök sī-ö tö tarik. Pōyen tarik töt kalēḵ nö luhuny re nö ṙā-ang eltī më tötlöök sī-ö, ngam lā-al ngam Tēv. Ṙōlheuh ang Yēsū yĕn halanken yik tö sī-iv el alaha nöng ahōnyö yik sī-ö, öt vanööṙu anga-aṅ tö cha. Akahalōn yip sī-ö tö ò nö minhôiyu nö in cha lökten cha nö vöö tö ò ngach hang ṙô ò.

Kinpaha. Lööngö invëka an “ngam manā-aṅ tö kunyaha elmat” nö ngam kinpaha, pò tarik nö ötkô nö luhuny re tö e. (1 Kòrin 15:26) Sön Yēsū nö mihôiṅ nö hachohlö tökapah, hē ò nö havantö nômö ök ṙāl tarik kūön ök tafīösi hēk tök kun nyīö kikānö inrē. Tökiröng hēk ngih nö minhôiyö Yēsū töm kinpaha, hē ò nö hachohlen Lāsörös, pòrô ngach anga-aṅ nö fën hata sumkam nö el anūlö! Uroh më tökunyaha elmat inrē mameuk ngam pinngangkūö la-en ò, ngach ṙātö ellōn re töm pinngangkūö la-en ò.—Yôhan 11:38-48; 12:9-11.

Asuh öp yanöölen hī in minë hameuktö Yēsū pinngangkūö? Pōyen yanöölen in öi in u, pòrô yik tarik töhachohlöng tö ò nö hēk nö kapah. Ngih ön raneh yanöölen hī pön hameuktu inlahen minë tösitih kinlēḵngô min nö öt hō nö öt teung. Sīöp inrē ngam ṙinātö ellōn hī in Yēsū ngam rācha ngam pūlngö, tö ò nö mihôiṅ nö kēngö invah, hanëkö kūö tö ha-euk, halāmtö chanôch panam, ahōngö tötlöök sī-ö, kēngö ngam kinpaha inrē. Pò ò nö ha-ehangen nö hameuktöre nö tö kētu kumlēḵ töm Tēv nö in u anu-ö në lā-en.

—Lökngörit im līpöre Mëtiv, Mākös, Lūkös, hēk Yôhan.