KAHËM Yēsū nak nā Yāköp nā Yūt. Hol yik tö 12 tak mahaköp nā Pītör nā Yôhan. Sat nun minë chitri kahūich vē töfën tak tarik nö i ëlô Krīk. Ṙòkhöre minë chitri nö kö i minë-eny më kamūich. Meūkö minë töhet inlēnö nö i mat minë chitri nö chööḵnyö tö inyööken yik kristīön mahaköpken ngam nganöönöre nö im Tēv Yāvē im pūlngö ò inrē.

Hameuktö Ngam Mikah. Ötkô in höng vë-eny re ṙātö ellōn re. Pòn hòṅ hōlu ngam ṙinātö ellōn hī tö nup la-en. Sā tī Yāköp nö ngö ṙô tī nö kūich, “pòn sā. . . ngam ṙinātö ellōn nö kapah yĕn köhngen tö nup la-en.” (Yāköp 2:26) Yĕm hol tö mikah re lā-al nup kanihngen re sīöp min öp manööyö meh. Yēḵ meh hòṅ mihôiṅ tö nup kinlāhare ngach hòṅ havëkö kūö ngam Tēv re më-eṅ tö mikah meh öm lā-al nup kanihngen re hēk hòṅ ṙātö ellōnre inrē tö ò nö öthō nö öt kē-ĕkūö meh tö mikah. Ṙāmölōn tī ayī-ö tö ngam Tēv yēḵ hī īnu tö ngam manööyö. (Yāköp 1:2-6, 12) Yēḵ öp töhĕng tak tarik mahameuktö ngam ṙinātö ellōnre, haköp ngam chaniplen re inrē, öthō ngam Tēv nö öt hang ṙô ò. Ngatī ṙô an ngam līpöre Yāköp “ṙūötöre im Tēv, ngach ṙūötöre min anga-aṅ nö in yīö.”—Yāköp 4:8.

Hòṅ ngön yin vē kristīön nö i mikah, hòṅ cha nö mihòiṅ tö nup kinlaha re i minë ötlanöökö hēk öt hanëtö el kuilōn tarik. Kūö ṙôken minë ötlanöökö misī inuk sakāmö yik raneh kristīön ang Yūt nö ötkô nö öt ṙônyö ngih ṙô re nö ngö ṙô: “I tölngö re laklö ngam mikah.”—Yūt 3.

Haköp ngam hanëtö tinrīken. Lōnu an ngam Tēv Yāvē tö yip vamë-ekūö re nö hòṅ het i tö keuheūttöre hanëtö. Kūich ang Pītör nö ngö ṙô: “Ngatī yin yēḵ yīö het inrē i nup taṙòkhöre inlaha yīö, sā kinūichngö e nö ngö, Töhet yin min yīö; pò chu Chū-ö töhet.” (1 Pītör 1:15, 16) Inchōḵ elmat vē kristīön an Kristū, lökten Pītör nö ngö ṙô: “Pò Kristū nö kihngen töpòkūö yīö, ṙā-akūö yīö tö inchōten, hòṅ yīö tömköröön ò.” (1 Pītör 2:21) Pòrô yin vē kristīön nö kihngen tö kūö cha nö haköp ngam inlaha re nö tūönkui minë tölöök tinrīken ngam Tēv sön pöri chā-a nö “īnu tö lanöökö elkuilōn” re. (1 Pītör 3:16, 17) Hareuslö alaha më kristīön inrē Pītör nö hameuktö minë töhet tinrīken tölöök lā-en inrē. Hōten cha inrē nö meūkkö yanihih ngam kinṙôka töm Tēv töm kinlēḵngô ò inrē töm tufömngöre panam “minë chūök lanöökö nö iyöng.”—2 Pītör 3:11-13.

Hameuktö hanāngenlōn re töm Tēv tö holre inrē. Ngö ṙô ök Yôhan: “Hanāngenlōn an ngam Tēv.” Vë-eny nang hī inrē anga-aṅ tö ngam Tēv nö hameuktö ngam tökiröng hanāngenlōn re, i inlahen tī ò nö tīnten Yēsū “nö inlāmö pòkūö në tökööl hī.” Sitih tī öng min ngòh kristīön nö haṙënngen ngam hanāngenlōn ngam Tēv? Halēnö hī ök Yôhan nö ngö ṙô: “Kahōlö; yē ngam Tēv nö ngatī hanāngenlōn tö hī, hòṅ ngatī ayī-ö kö hāngenlōn tö höö.” (1 Yôhan 4:8-11) Hĕng ön ngih inlaha hī hameuktö hanāngenlōn re tö höö, öi haṙūötken yip tö sā ṙinātö ellōn re.—3 Yôhan 5-8.

Sitih inlahen pöri min ayī-ö hameuktö hanāngenlōn re töm Tēv Yāvē? Kētö sanap ṙô ngam intöönö ang Yôhan nö ngö ṙô: “Pön angū-ö ngih hanāngenlōn ngam Tēv tö hī, öi haköp në chööngö ò. . . hö-ö nun në chööngö ò nö lumrāḵ.” (1 Yôhan 5:3; 2 Yôhan 6) Lökten yip töng hamang nup chööngö ngam Tēv nö ṙātö ellōn re tö cha min nö örheūheu nö hanghuṙen töm Tēv nö holröön töm “nômö tö örheūheu-aṅ.”—Yūt 21.

—Lökngörit im Yāköp; 1 Pītör; 2 Pītör; 1 Yôhan; 2 Yôhan; 3 Yôhan; Yūt.