NGAM Inmeukhömat an manā-aṅ līpöre aṅmat ngam töhet līpöre nö kamëtö maheūṅkkö taṙòkhöre tarik ikūö ngih panam. Kūichi an tök tanīnöṙô Yôhan, tööḵlö an inrē ngam līpöre tö minë inmeukhömat minë töveūtö taneungtökūö min inmeuknyö minë kuilōn ngam Tēv Yāvē.

Ngam raneh tömeūkö, meūkö ang Yēsū ngam tö hachohlöng nö kētö inreuskö alaha minë Māṅ hēk halēnö u inrē nö i nup tövach kahëken u. Meūkö ngam kantēra ngam Tēv nö el halīöngö i ngam tahëng tömeūkö. Ngach ikūö e yik töpōyen ma-ahānga nö sökhaka nö pōitô nö ha-öiny ngam Tēv Yāvē.

Asā ranöhta ngam ṙētak taneungtökūö minë kuilōn ngam Tēv, kē-ĕvkūö ang Yēsū ngam Kūön sīṅp tö ṙô, tök līpöre tö hapanikūö, ök tö sātö inpanngö. Ik sā ṙinòngnyö kūö minë töfën inpanngö, meūkö minë töfën nòng tö-aṅhav uk kōra. Ngam raneh tö isoh kōra ngam tö sā tö aṅhav uk tö Yēsū ök tö aṅhav kui tök sapīöv rācha. Minë tahëng tö meūkö mi-i uk minë tö ṙōl kangen mirun kōra, nö vinënyö kinyūngö, inyāchö, lanëlngö tö invah inrē—ṙòkhöre anū-ö nö tö hòṅ teungtakūö nö ing manā-aṅ sakāmö. Ngam ṙinòngnyö kūö ngam sinātö inpanngö, föönyu kūö ngach nuk tö sat fanöö nö mahameuktö kinṙôka tö ngam Tēv, nö kumuröön tö minë tö sat lanëlngö hēk inmeuktö minë tanānyö ngam Tēv inrē.

Hameuktu ngam pūlngö ngam Tēv tö asöklöng nö el halīöngö nö sā ök tufömngöre finötnyö nyīö kikōnyö. Kinyūngö ngach ök umuh el halīöngö, suktu ngach ngam sī-ö tö yik ma-ahānga ò inrē nö ing panam. Hāngö ngach ök tö pōitô ṙënṙô nö ngö ṙô: “Ötkôlò yin yī-ö panam.” Tainy takô ngach ngam sī-ö, pön akahakūö töm ṙētak re nöng rahëchtöreṙen.—Inmeukhömat 12:12.

Meūkö Yēsū ang Yôhan nö el halīöngö nö sā mineūkö töhĕng nòng kūön sīṅp tö yip tö 144,000 tö katöllöng nö ṙā-ang i pumnāmö tarik. Acha-a yin “hol ò min nö hayöng.” Vënyu ṙôken yin më hol ò nö hayöng töm līpöre inmeukhömat nö 144,000 ṙôken.—Inmeukhömat 14:1; 20:6.

Hamūlöre yip rācha mahayöng aṅ ing panam “nö kiyung, ip tökiröng sakāmö ngam Tēv, tökeuheūttöre chööngö” ngam Armaketòn tö ṙô Heprāi. Kiyung cha-a nö lā-al ngam töhĕng tak amūich hak nö i uk ngam tö isoh kōra ang Yēsū ngam yöng kūö më kumyung aṅ el halīöngö. Keuheūtngöre vah tī anga-aṅ min tö yip mahayöng në panam nö ṙòkhöre. Nyëki ngach Satān, ngach Yēsū tö më 144,000 mahayöng nö hayöng nö kui ngih panam nö “hĕng köiny samyeūheu” rô-òten.—Inmeukhömat 16:14; 20:4.

Asuh nup inkôlò yip tölöök tarik min kumṙen ngam tö hĕng köiny samyeūheu inyööngö tö Kristū tö yip hol ò inrē? Kūichiyö ön ngam sanap ṙô e tö Yôhan nö ngö ṙô: “Ngach chūtngö mak mat min Anga-aṅ, nö ṙā-ang i mat cha, öt ōtngöre min inrē ngam kinpaha, ötrēhĕn min miṙivlōn nö umuh, öt pineūnyu, öt chanööku nö hēkngöre; ngach nuk raneh inlahen nö chuhngöre.” (Inmeukhömat 21:4) Pò ngih panam min nö havantu vinī-i nö Peretāis!

Höng ngam Inmeukhömat an līpöre mahateungnyö ngam ineūkö ngam tölöök inhanga aṅmat ngam Töhet līpöre. Ngam pūlngö Mesayā an min ma-ahetlö ngam minënyö ngam Tēv Yāvē hĕnghöre harōilö ngam inyööngö tö ò nöng anga-aṅ töng hĕng tak tökô nö hayöng nö örheūheu!

—Lökngörit im Inmeukhömat.