KÖÖNYU samyeūheu rô-angen urēhĕkūö kunhëthöt yik Israel nö im panam Kanā-an, kilēḵngôre ngam Tēv Yāvē töre min nö kētö ngam panam nö in yip kūön Aprahām. Yôsuā ök mahachōhöt cha nö kuhēthötre nö chuh im panam kinlēḵngô.

Tölöng an nö i mat ngam Tēv ngam kinṙòkken yik aṅ Kanā-an, kūö tanô-òlkuö ötlanöökö tinrīkngen cha nö i insĕha hēk finëlngö tarik inrē. Lökten ngam Tēv nö kētö chööngö tö pinyaingö ngam panam tö yik aṅ kūö e inrē.

Urēhĕkūö kunhëtö cha pöri nö ikūö ngam panam Kanā-an, tīnngö tö nët tak tarik ang Yôsuā nö mu-ulāikö mat re nö ngëichkö ngam el panam. Höng löö ik panam Yerikō chā-a, ik tö hĕng tak yöngnyīö ök tö töminënyu tö Rāhap. Halönghöt cha anga-aṅ nö el ök patī ò, ngach laklen cha, pòrô nö akahakūö tö cha nö aṅ Israel. Kūö ṙinātö ellōn Rāhap pöri nö in ngam Tēv yik Israel pön hang nuk pinngangkūö minhôiyö lā-en ngam Tēv Yāvē nö laklö më tarik re Israel. Lökten Rāhap nö vë-ekūö nak tarik mu-ulāikö mat re tö cha nö kilēḵngôre nö un fëlngen ò min tö yik aṅ patī ò inrē.

Unôichngöre ngach ik kunhëtö më aṅ Israel nö i Kanā-an, sölta ngach chā-a nö i Yerikō, vītö pinngangkūö ngach ngam Tēv Yāvē nö tinrōltö ök kinlonglö ngam el panam Yerikō. Falhötre ngach yik kumyung, ngach piyāingö ngam panam hĕnghöre fëlngö yik tarik inrē, höng Rāhap tö yik aṅ patī ò töt halönyka tö yik kumyung aṅ Israel. Höng tamfuöl samyeūheuh tī Yôsuā nö kēḵ ngam tö pōyen alaha ngam panam kinlēḵngô. Unôichrit taneūngen cha ngach töm panam kinlēḵngô, katölhökūö yik aṅ Israel ngach Yôsuā.

I kinheūten minë samyeūheu la-en kinë-ekūö Yôsuā hamūltö yik tarik ngach anga-aṅ. Ngach ve-eny nang cha tö nuk taṙòkhöre tī ngam Tēv Yāvē nö i yik muvöhngö cha, hōten cha inrē nö köp nö i līnöökölōn Ò. Höng kapah hë pöri Yôsuā tö yik hol ṙēti ò inrē, havantö inlahen re hēk yik Israel nö vë-ekūö insātēv. Lohten nö 300 samyeūheu rò-òten chā-a nö ngatī inlahen. Lökten ngam Tēv Yāvē nöng hökngötī yik aṅ Filistain nö öt hakòlô cha. Hē yik Israel pöri nö havëkö hinòlṙen re nö im Tēv Yāvē katöllö yik tökalēḵ tarik anga-aṅ nö ṙamānyen cha nö ṙa-ang eltī yik tökunyāha elmat tö cha. Kamhôka ngö ṙô in tö cha.

Nëtsīön tak ṙôken yin më kamhôka tö kūichi minë-eny nö i mat ngam töhet līpöre. Raneh ang Otniĕl nö in më tönëtsīön tak kamhôka, mana-aṅ ang Sëmsön, ök töt insā-av kumlēḵ nö tarik. Kūichiyö nun minë tölöök inlahen cha nö i mat ngam līpöre Kamhôka nö haköp hī, tö hī yĕi hang chööngö ngam Tēv Yāvē ngach aṅ min ayī-ö, yēḵ hī pöri ahôngen chööngö ngam Tēv kapah min ayī-ö.

—Lökngörit im Yôsuā; Kamhôka; La-en Lēvī 18:24, 25.