MIRŪLÖ 2
Ngam tö Chatngen Peretāis
Inlahen ök töhĕng tak tötlöök ma-ahānga tö hòṅ anòngnguvah tö nak raneh tarik, nā Ātöm nā Ēva. Sō-en ngam inyööngö chā-a töm Tēv. Angū-ö löktö yanīhih ngam tökööl töm kinpāha
KÖÖNYU samyeūheu rô-angen misī urēhĕkūö ngam Tēv nö vīlö tarik, vīlö yik töt kanṙeūken anga-aṅ ma-ahānga el halīöngö. In cha ök töhĕng tak ma-ahānga chamòhòlre nö lā-al ngam Tēv, nö el ök panô-òṅ i Ēten. Satān hēk tö ötlöök ngö ṙô in tö ò, ngam mahachīlö Ēva nö nyā ṙòng ök chōn ök sinôtö kūö cha nö nyā tö ngam Tēv.
Löktö ik pēch ṙô ngam sī-ö nö vë-ekūö Ēva. Vīlö fālen ngam Tēv anga-aṅ, tö Ò nö mahayuntö mat ngam kikānö tök pīhö ò inrē tö nup tölöök. Ngöṙô anga-aṅ nö in Ēva öthō nan min kapah yēḵ nā nyā ṙòng ngam chōn. Angū-ö ön ngih ṙô ngam sī-ö sinūöchlö fālen ngam Tēv nö i kūö nak tarik. Pön hòṅ hameukhömat cha anga-aṅ tö cha nö kuchīken yĕn öt hayöngkaṙen töm Tēv. Angū-ö ön ngih raneh tökiröng minyôny i kūö ngih panam, hĕnghöre tökiröng nö innāichngen ngam Tēv tö tī ngam sī-ö. Vënyen Ò anga-aṅ nö tötheuveū-en nö hayöng hēk töt akahakūö inrē tö nup ṙanāmölōn yip hayöngkenre tarik.
Ilöö ṙātö ellōn re ang Ēva tö ṙô ngam sī-ö. Ngach nyā ök ṙòng chōn ök sinô-òngkūö cha nö nyā, kē-ĕkūö ök pīhö re inrē anga-aṅ ngach nyā ök pīhö ò. Angu-ö ngaich lökten cha nö köölö fālen. Öt fālen ön nö kò-òren nö elmat hī ngam nyinā-aṅ ṙòng ngam chōn. In e pöri chā-a nö hameuktöre nö sō-en ngam inyööngö töm Tēv, ngam kamë-ekūö cha tö nup taṙòkhöre tölöök, tö ngam nômö tö örheūheu-aṅ inrē.
Kūön ngam kikānö “paṙôkö kui man min tö tī ò, ngach me-eṅ min paṙôkö tī tö kulôichröön ò.”—Ranehlö 3:15
Kahòkkaṙen ngach ngam fālen cha töm Tēv. Vënyö yanīhih öp kamëtö ṙinānyö inrē anga-aṅ öp famëlngö ngam Sī-ö min, ngam pēch tö ṙô. Öt ilööṙen pöri ngam Tēv nö fëlngen nā Ātöm kūö ò nö hòṅ hameuktö miṙēlōn re nö in yip kūön cha yip tö öl nö fötnyu. Achā-a min tö maheūṅkkuvö nö lökten im tö kilē-ĕyö ṙamā-any, ngam mahalööktit minë tö pasū ël ngam panô-òṅ i Ēten. Achiö ang anga-aṅ tö kilē-ĕyö yanīhih ṙama-any? Anga-aṅ an tö hiṙeūt-hiṙeūtka vinënyi töm Tēv nö löknyö mat ngam töhet līpöre, pòn anga-aṅ min mahateungngö ngam kuilōn Ò.
Ha-ōnyu ngach nā Ātöm nā Ēva tö ngam Tēv nö ṙā-ang el ök peretāis, kūö cha nö halôngen chööngö Ò. Lökten cha nö harëtnyö elmat re nö ul ngam tumlat ngach möl nö teūngen tö nya-aṅkūöre. Pirūkö nyīö ngach Ēva ngach kayônyen Kēn ök lanòh kūön cha. Unôichngöre hēk chā-a nö kūönten tö Āpēl hēk Sët inrē, ök muvöhngö Nō-a. Kūönu inrē chā-a tö kikānö.
—Lökngörit im Ranehlö tö 3 mirūlö söl im tö 5; Inmeukhömat 12:9.
