Kahūich Lūkös 10:1-42
-
Tīnngö yik tö 70 tak mahaköp ang Yēsū (1-12)
-
Öt hakôlöng ṙô më tarik töt mahavöötö ellōnre (13-16)
-
Havan yik tö 70 (17-20)
-
Ha-öiny ngam Yöngre ang Yēsū ngam tö aheūkölōn tö yip tö īnu tö inyaichngö (21-24)
-
Inchōḵ elmat inlahen ngam tö aheūkölōn aṅ Samaria (25-37)
-
I patī Mārta hēk Mariā ang Yēsū (38-42)
10 Unôichrit e hēk ngam Mā nö katöllö yik tö 70 mahaköp ngaich nup panam hēk chūökö chahūhu ò lang nö hakôtenre, ngaich nët nët tahôl tī anga-aṅ nö tīnngen cha nö urēhěkūö ò.
2 Ngö ṙô ngaich anga-aṅ tö yik mahaköp: “Pōyen takô nun në ṙòng taneūich hī, kūöṅnen takô pöri më mu-uvòh töla-evṙen. Lökten yin havëkö kūö ngam yōm panô-òṅ nö söömtö tarik hēk mu-uvòh.
3 Kuṙòh kiröönngöre! Yěh meuk! tīnngen yīö chin öi sā ṙēngen sīṅp öi el ṙôngö yip tö tainy am el inchōn.
4 Uh yin keunkö kapang chūök rupīö re, ui rēhěn keunkö chūök nyā-aṅre, ui rēhěn keun kunröpö re hēk ui salām yip töng tarik el talöököre.*
5 Yēḵ meh kuhēthötre el nup patī ngaich urěh më-eṅ öm ngö ṙô: ‘Lanāmö yēḵ nö el ngih patī.’
6 Yěn ōt tö lōnu tö ngam lanāmö ngaich hökngen ngam lanāmö re më-eṅ nö höngngöh nö in ò, yēḵ ò pöri nö sōḵ, hökngen ngam lanāmö aṅ in yīö nö havantöre nö in yīö.
7 Höngngöh yī-ö in e angū-ö patī ngaich nup töng kahëtö cha nö in yīö, nyā-aṅvkūö yīö, òk inrē, tön öthō ön ngòh töla-evṙen nö öt nyā nö ip chūökre nö la-evṙen, uh yī-ö öi haṙīngö chūök patī re öi iyöng.
8 Nup töng chahuh in yīö panam, yěn ōt tarik mahachūöklen yīö, ngaich nup töng kahëtö cha nyā-aṅkūö yīö, nyā-aṅ u yī-ö,
9 in e yī-ö öi halanken tövāhavö hēk ahangkö ngam ‘Pūlngö ngam Tēv nö ngaich nö röhta nö in yīö.’
10 Ngaich yēḵ yīö pöri öi öt hō-ov in nup panam hēk öt hachūöklöng inrē ngaich chuh kūö talöökö yī-ö ngaich ngö ṙô:
11 ‘Ngih pitung ngih panam yīö mi-i röön ih, chūtngen u in hòṅ e nö kamëtö minkahngö yīö. Köpölōn pöri tö ngam Pūlngö ngam Tēv ngaich nö yih.’
12 Ngö ṙô chin tö yīö, möḵlö ṙôkhangen ötkanòlô an min angū-ö panam tö Sōtöm ip hē e angū-ö sakāmö.*
13 Tötkòlô man më-eṅ Kòrasīn! Tötkòlô man më-eṅ Petsĕitā! Pön hameuknyu nup pinngangkūö la-en nö in meh misī, yēḵ u öre nö hameuknyu nö i Tūrös hēk Sītōn inrē ngaich öre yip aṅ in e, nö ūichngöre nö el tumlat ngaich hayutlöre tö sāk hēk tūi kuire tö tisum nö hameuktö miṙivlōnre.
14 Ĕhten nun min në panam Tūrös, Sītōn inrē tö inlahen yīö hē öp sakāmö kinṙôka.
15 Ngaich më-eṅ Kafarnahum, hapōilöng öm min tölōnre öm el halīöngö? Höng chuh lātaṙeū man min el chūök kupah!
16 Ngòh töt hamang ṙô yīö, töt hamang ṙô chu cha-a. Ngòh töt hamô-en yīö, töt hamô-en chu cha-a. Ngòh töt hamô-en chu, öt hamô-en ngam Tēv cha-a ngam tamīnten chu.”
17 Unôichrit e ngaich yik tö 70 mahaköp nö holtö ṙanamlōnre nö havan, ngaich ngö ṙô: “Mā, hang chööngö ih yip tötlöök ma-ahānga, yēḵ ih öi kēḵ minënyö meh.”
18 Ngö ṙô ngaich ang Yēsū: “Meuk ngam Satān chin ngaich nö suktöre nö sā hanyālö nö ṙā-ang el halīöngö.
19 Yěh meuk! ngaich chin kē-ěkūö yīö tö kanô-òṅ yīö öi rööntökui pēch, kanaptörit re inrē hēk kētö minhôiṅyö yīö inrē öi la-al yip tö kunyaha elmat töre hēk öt hěng min chehen tö chökhutī tö yīö.
20 Uh pöri yī-ö öi ṙamölōn tö yip tötlöök ma-ahānga nö hang chööngö yīö, ṙamölōn pöri yī-ö kūö ngam minë-eny yīö nö kūichi nö el halīöngö.”
21 Im hē e ngaich anga-aṅ nö tööḵlö tö ngam töhet kumlēḵ ngaich öt kūöngu ṙanamlōn, nö ngö ṙô: “Ō Kayööngö, Mā ngam halīöngö, panam inrē, ha-öinyö meh Chin öich ikūö vē tömaṙôngö tarik pöm hayunngö në ṙô nö i vē tö akaha, tö heuveū-en inrē, hameukten u pöri më-eṅ öm in vē tö tëṅnö nyīö. Kūö u Kayööngö, nö lōn meh takô nö ngatī inlahen.
22 Kētu nun në taṙòkhöre nö eltī chu tö ngam yöng chu. Achīö ang ngam Kūön, öt hěngtak tö akahakūö höng ngam yöng. Achīö ngam yöng, öt hěngtak tö akahakūö höng ngam Kūön, anga-aṅ inrē öp lōn ngam Kūön chūök ṙô ò nö hameuknyen u.”
23 Havölökūöre ngaich anga-aṅ nö in yik mahaköp hē cha nö chēvhakṙen, ngaich ngö ṙô: “Töṙamölōn yip cha-a yip tö kôtamat nö meuk nup taṙòkhöre maheuk yīö.
24 Ngö ṙô pöri chū-ö tö yīö, maṙôngö yik misī pròfět hēk rācha tö hòṅ meuk në maheuk yīö, hö-ö pöri cha-a nö teungtamat nö meūkö u. Hòṅ hang në ahang yīö inrē cha-a, hö-ö pöri nö hāngö u.”
25 Unôichrit e ngaich, hěngtak ök tarik ök tö akahakūö tö minë chööngö, söklöre anga-aṅ nö kalaha Yēsū, ngaich ngö ṙô: “Mahaköphöti, asuh öp öre tölöök la-en kahëken chu, yēḵ chu hòṅ nômuvö tö ngam tö örheūheu-aṅ?”
26 Ngö ṙô ngaich ang Yēsū: “Asuh öp tö kūichi nö im Chööngö? Sitih ṙô öm vë-ekūö e?”
27 Sapṙô ò ngaich anga-aṅ nö ngö ṙô: “Hangenlōn man tö ngam Tēv re Yāvē* öm keuheūttö ellōnre, keuheūttö nômöre,* keuheūttö elkuilōnre hēk keuheūttö kumlēḵre inrē hēk hangenlōn inrē tö holre sā re töre.”
28 Ngö ṙô ngaich ang Yēsū: “Lööngö ṙô takô man. Ngatī inlahen man yēḵ, ngaich teūngen min më-eṅ tö ngam nômö.”
29 Ngaich pöri ngam tarik nö hòṅ hameuktöre nö tölöök, lökten anga-aṅ nö hatöönö Yēsū nö ngö ṙô: “Achīö öp hol chu?”
30 Ngö ṙô ngaich ang Yēsū: “Hěngtak ök tarik lamöktö Yērūsalem nö chuh Yerikō, havīlöng ngaich anga-aṅ tö yik tö tūmu, luhngö nuk inyut ò cha-a ngaich kēngö nup töng aṅ in ò ngaich fëlan, ngaich ṙāngen ò nöng öhtö hòṅ kapah.
31 Hěngtak ngaich ök kūönṙô lamök el ök talöökö, hē ò pöri nö meuk ök tarik nö umuh, harīkngö talöököre ngaich anga-aṅ nö kiröönngöre.
32 Ngatī inlahen hēk ök tö hěngtak Lēvī nö lök umuh nö kiröön, meuk ngam tarik anga-aṅ nö umuh, chööḵngen ò pöri anga-aṅ nöng harīkngö talöököre.
33 Hěngtak pöri ngaich ök tarik aṅ Samariā lamök el ngam talöökö, hē ò ngaich nö meuk ngam tarik, tööḵlö ngaich anga-aṅ tö miṙēḵlōnre.
34 Hē ò ngaich nö yihtöre nö in ök tarik, fòhtökūö vah ò ngaich anga-aṅ tö tavī-i hēk vāin inrē ngaich haṙūngö u, ha-ūichlen ò ngaich anga-aṅ nö i uk ök köttö re ngaich kēhöt ò nö el öp chūök haneūheu patī ngaich meukṙen ò.
35 Im huṙěich hēk anga-aṅ nö kēten nuk tö nët tāk tinār* nö in ök yōmkūö ngam chūök haneūheu patī, ngaich ngö ṙô: ‘Meukṙen ngòh tarik man, ngaich nup ṙāi tī meh min öm meukṙen ò, kē-ěkūö meh min chū-ö tö u, yēḵ chu havan.’
36 Vë-eny nang chu man, sitih lōn öm më-eṅ, achīö öp in më tö lūöi tak hol ngòh tarik tö havīlöng tö yik tö tūmu?”
37 Ngö ṙô ngaich anga-aṅ: “Anga-aṅ ngam tö aheūkölōn tö ò hēk hayööken ò inrē.” Ngö ṙô ngaich ang Yēsū nö in ò: “Kuṙòh, ngatī inlahen man yēḵ më-eṅ.”
38 Hē cha ngaich nö iṙūöhöröön nö kiröön, kuhēthötre ngaich cha-a nö in ök tö hěng tuhēt. Hěngtak ngaich ök kikānö tö Mārta minënyi ök mahachūöklen ò nö i patīre.
39 Hěngtak inrē ök kahëm ò kikānö, Mariā ök minënyö ò. Iröön ngam Mā anga-aṅ nö ūichhak nö hangihtö ṙô ò.
40 Ngaich pöri ang Mārta nö rëtnyi elmat nö halēnken nyā-aṅkūö. Lökten ngaich anga-aṅ nö yihtöre nö in Yēsū, ngaich ngö ṙô: “Mā, öt chumkūöṙen öm tö inlahen ngam kahëm chu, nöng ṙāḵten minë taṙòkhöre la-en nö in chu öich höng hěngṙen? Tölṙô ò man nö holṙen chu.”
41 Ngö ṙô ngaich ngam Mā: “Mārta, Mārta, uh man yaha ṙôken afēka tö nup tö pōyen.
42 Öt uroh ṙôken lōn chin, mihôiṅ nöng rahëichyen hēk mihôiṅ nöng hěng mihëṅṙö. Yěm ngëichkö inlahen Mariā, kēḵ ngam tölöök* an anga-aṅ lā-are ngaich öt hěngtak tökô nö kēngen e nö in ò.”
Footnotes
^ Hēk, “ui salām yip tarik öi fūölö cha.”
^ Ngam tö ngö, sakāmö kinṙôka.
^ Ngëichköm Tahëng Ātiköl A5.
^ Ngëichköm Tahëng Ātiköl B14.
^ Hēk, “tövai takô.”
