Kahūich Lūkös 11:1-54
11 Ngaich hē Yēsū nö in ök töhěng chūökö nö vë-ekūötēv. Hē kinheūten ò ngaich nö vë-ekūötēv, hěngtak ngaich ök in yik mahaköp tö ngö ṙô: “Mā, sā inlahen Yôhan nö haköpten yik haköptöre nö vë-ekūötēv, ngatī man më-eṅ yēḵ haköpten ih.”
2 Ngö ṙô ngaich anga-aṅ: “Yēḵ meh öm vë-ekūötēv, ngaich ngö ṙô më-eṅ: ‘Kayööngö yöng ih, hetlö an yēḵ ngam minënyö meh.* Yih an yēḵ ngam Pūlngö meh.
3 Kētö nup tö örheūheu nyā-aṅkūö ih.
4 Aṙē-ěl nup tökööl ih, sā inlahen ih aṙē-ěl tökööl yip tö hötṙehevö nö in ih ngaich yěn yih nup kinlaha nö ikui ih, ui halöngtuṙen öi fukngö.’”
5 Ngaich ngö ṙô ang Yēsū tö cha: “Yěn ōt öre öp hol meh chamuh in meh tö chūöl hatööm ngaich ngö ṙô, ‘Hol, kētö hötṙeh chu man tö tö lūöi tāk ròtī,
6 tön hěngtak öp hol chu lamöktö tömarôvat yamih nö i patī Chu ngaich öt heuveū chū-ö öich hanëlen ò pöich öt aṅhavin tö nyā-aṅkūö.’
7 Höng lātuhēt pöri anga-aṅ nö sapṙô ò nö ngö ṙô: ‘Uh chin öich hakihtuṙen. Ngaich inrē ngam inkūp nö ööpikūö, ngaich in chu vē kūön chu nö haṙòh el chamamre. Hö-ö chin öich kô choholre öich kē-ěkūö meh.’
8 Ngö ṙô chin tö meh, pòrô anga-aṅ nö öt hol ò, sön pöri anga-aṅ nöng meuk inlahen ò nö holtö öt miṙē-ěvre nöng iṙūöhö ṙô nö havëkö kūö ò, öthō min anga-aṅ nö öt choholre ngaich kē-ěkūö ò töp ṙôken lōn ò.
9 Lökten Chin öich ngö ṙô tö yīö, iṙūöhö ṙô yin havë-a ngaich öthō min öi öt teūngen, iṙūöhen inrē öi chöh, ngaich öthō min öi öt kôtökūö, iṙūöhötī yin kuröönga, ngaich öthō min yī-ö öi öt löpnyukūö.
10 Pò ngòh mahavë-a min nö öthō nö öt teūngen hēk ngòh chamöh inrē, ngaich öthō min nö öt kôtökūö hēk ngòh kumröönga inrē, ngaich ōthō min nö öt löpnyukūö.
11 Achīö öp rih inyööngö, yēḵ öp kūön ò nö havëkökūö ò tö kāḵ ngaich kē-ěkūö ò anga-aṅ tö pēch nö ṙēnngen tö kāḵ?
12 Hēk yěn havëkökūö ò min anga-aṅ tö lôl ngaich kē-ěkūö ò hòng min anga-aṅ tö tökanaptöritre?
13 Lökten, yēḵ yīö yī-ö, öi töthet, ngaich akahakūö tö nup tölöök chehen kahëtöre öi in yip kūönre, ngaich kūö yòh min nö öt ngatī ṙôkhöl tī ngam Yöng yīö aṅ el halīöngö nö kē-ěkūö yip mahavëkökūöre tö ngam töhet kumlēḵ!”*
14 Unôichrit e ngaich ang Yēsū nö kēnyen ök tötlöök ma-ahānga nö el alaha ök tö hěngtak tarik, ök tö tī-ivö tö ò nö öt heuveū-eu ṙô. Hē ök tötlöök ma-ahānga pöri ngaich nö kunyī-inyre nö ṙā-ang el alaha ök tarik, heuveū-eu ṙô ngaich anga-aṅ nö ṙò-òvö, pingangkūö ngaich yik tömaṙôngö nö meūkö e.
15 Rīkre pöri yik in cha tö ngö ṙô: “Löktö in më rāchakūö yip tötlöök ma-ahānga Pě-elsipul* tī an kòl, nö ahōnyen më tötlöök ma-ahānga.”
16 Ngaich rīkre yik tahëng kamlaha Yēsū nö hōten ò, nö hameuktö minkahngö nö löktö el halīöngö.
17 Akahakūö pöri ang Yēsū tö mufē cha, lökten anga-aṅ nö ngö ṙô: “Yěn choholre öp töhěng pūlngö nö la-al re, öthō min angū-ö nö köp, ngatī inrē öp patī yěn höng choholre yip aṅ e nöng la-al re, hetngö min angū-ö.
18 Ngatī ngam Satān, yēḵ ò nöng choholre nö la-al re, sitih inlahen min ngam pūlngö ò nö köp? Pò yīö öi ngö ṙô tö Chu öich lökten i kumlēḵ Pě-elsipul öich kēnyen yip tötlöök ma-ahānga.
19 Tö lökten yēḵ chu chū-ö öich löktö i kumlēḵ Pě-elsipul öich kēnyen yip tötlöök ma-ahānga, ngaich löktö i kumlēḵ chīö më kūön yīö nö kēnyen cha? Lökten yip min nöng cha-a kamhòkken yīö.
20 Yēḵ chu pöri öich löktö in ngam töhet kumlēḵ ngam Tēv, öich kēnyen yip tötlöök ma-ahānga, tö ngö manah angū-ö tö ngam Pūlngö ngam Tēv ngaich nö ṙā-ang eltī* yīö.
21 Yēḵ öp tökalēḵ tarik nö aṅhav eltī, ngaich aṅhtö öp patī re, ngaich öt hěngtak tökô nö kēngö nup kanôlò ò.
22 Yěn ōt pöri öp tö mööḵlö kumlēḵ tarik tö ò nö la-al ò ngaich ötkô-ò tī tö ò, ngaich kēngö nup taṙòkhöre aṅhtī ò nup chūök ò nö hayönglenre, ngaich nup kanôlò ò nö kē-ěyö ngaich katööliyö.
23 Ngòh töt lamā in chu, tö hòṅ la-al chu anga-aṅ, ngòh töt hamòlṙen chu öich hamūl, höng pumrāthang anga-aṅ.
24 “Hē ngam tötlöök ma-ahānga nö kunyī-inyre nö ṙāngen ngam tarik, ngaich chöh öp chūök re nö heūheure öp tö makuvö, hö-ö pöri anga-aṅ nö kôtökūö tö e, ngö ṙô ngaich anga-aṅ, ‘Hòṅ havan Chin hēk öich chuh el öp patīre öp ṙāhaḵngö Chu.’
25 Hē ò ngaich nö havan nö el ngam patī, ngaich rö-ö anga-aṅ nöng meūkö e nö öt aṅhav, pön meūkö e inrē nö het, hanyöötö inrē.
26 Kiröönngöre ngaich anga-aṅ ngaich sat tak hēk yik ma-ahānga tö kumtu tö ò yik tö mööḵlö ötlanöökö tö ò, kuhēthötre ngaich cha-a nö iyöng el alaha ngam tarik ngaich iyöng in e. Höchngen ngaich ngam inlahen ngam tarik tö ök mu-urěh inlahen ò sin.”
27 Hē ò nö ṙònghöichṙen nö vënyen në ṙô, hěngtak ök kikānö aṅ in yik tömaṙôngö hamū-a nö ngö ṙô: “Tökôlò öp anga-aṅ kikānö öp tö chūöku kanūönö tö meh öp tö ôkö tūt inrē tö meh!”
28 Ngö ṙô pöri ang Yēsū: “Hö-ö, öt ngatī, töṙamölōn pöri anga-aṅ ngòh hamang në ṙô ngam Tēv ngaich lök in u!”
29 Hē yik tömaṙôngö ngaich nö hòṅ hamūltöre, ngö ṙô ngaich anga-aṅ: “Höng hòṅ örheūheu yin vē tötlöök tarik in në ṙētak hī töngamuh, nö hòṅ meuk minkahngö, öt ōtngöre pöri minkahngö kinë-ekūö cha, höng ngam minkahngö ngam pròfět Yôna.
30 Lökten sā Yôna nö minkahngö yik tarik aṅ Ninēvē, ngatī ngòh Kūön tarik nö minkahngö yip tarik töngamuh in në ṙētak hī.
31 Choholre öp min rāni aṅ lā lòhngö ip sakāmö kinṙôka nö hol vē tötlöök tarik in në ṙētak hī töngamuh, kūö ò misī nö yih nö hang nuk mikah Sòlòmön nö löktö i manā-angkūö ngih panam. Yěh meuk pöri! ihih an töngamuh nö ōt ngam tömööḵlö tö Sòlòmön.
32 Choholre yip min tarik aṅ Ninēvē ip sakāmö kinṙôka nö hol vē tötlöök tarik in në ṙētak hī töngamuh, kūö cha nö hangṙô Yôna misī nö vënyö ngam tölöök inhānga ngaich havöötö ellōnre. Yěh meuk pöri! ihih an töngamuh nö ōt ngam tömööḵlö tö Yôna.
33 Öt hěngtak tarik tamôttökūö ëaṅvö ngach ṙāḵten e nö ip chūök e nö öt meūkö, ötṙēhěn nö ṙāḵten e nö el katòh kuvôkö, ṙāḵten e pöri nö ikui mīs, hòṅ yip kumhēthötre nö meuk ngam hanātö.
34 Ngam mat meh an ëaṅvö ngam alaha meh. Yēḵ ngam mat meh pöri nöng hēngö ngahëichka, ngaich keuheūtlöre hanātö min ngam alaha meh, yēḵ ngam mat meh pöri nö tööḵlö tö tanāilölōn,* ngaich keuheūtlöre min ngam alaha meh nö el sinngūlö.
35 Chumkūöṙen yī-ö tö ngam mat, ngam kamëtö ngam hanātö nö un chuh el ngam sinngūlö.
36 Lökten yēḵ ngam alaha meh nö ṙòkhöre nö el ngam hanātö ngaich öt ōt nup alaha e me-el ngam sinngūlö, ngaich ṙòkhöre min ngam alaha meh nö hat, sā inlahen ngam tö yāngökūö ëaṅvö nö kētö ngam hanātö.”
37 Hē kinheūtö ṙô ò ngaich nö ṙò-òvö, hěngtak ngaich ök Feresī tö hòṅ aṙētu ṙô tö ò nö chuh patī ò nö nyā. Lökten anga-aṅ nö chuh patī ò ngaich ūichngöre nö nyā.*
38 Pingangkūö pöri ngam Feresī hē ò nö meuk inlahen ò nöng öt söichtīre urēhěkūöre nö nyā.*
39 Ngö ṙô pöri ngam Mā nö in ò: “Ō yī-ö Feresī, sā ṙēngen nup chūök òk hēk pingāṅl yin, nup töng lamātunyī nö het, mumū pöri nö lātuhēt, tööḵlö pöri yī-ö tö yinikhanga hēk ötlanöökö inrē.
40 Yī-ö tötakahaṙa! Ngam vamī në lamā-uk, ngaich hö-ö hòng anga-aṅ nö vī nup lamātuhēt?
41 Lökten yēḵ yīö öi kētö nup tökētu* ngaich löknyö ellōnre tī, ngaich möl min yī-ö kaheūkö öi töhet.
42 Tötkôlò yin yī-ö Feresī, pò yīö hěnghata i nup tösöm tötahūsa, tö angu-övö inrē, nup töṙōlkangen rōichōn* inrē, öt pōiṙāi pöri ngam töt michūṙen kinṙôka tö ngam hanangenlōn tö hināngö chööngö ngam Tēv nö in yīö! Kô-en nun nö töt ṙanāngen nö tö hòṅ kēkaṙen tö yīö, un ṙā-ai pöri öre minë tahëng la-en tö yīö.
43 Tötkôlò yin yī-ö Feresī, pöi ööire öi ūich el nup lamākūö* anūichö tö ṙāḵaka nö el chūök vinë-ekūötēv, ööire inrē öi hangṙô yip tarik nö salāmö yīö nö el pachār!
44 Tötkôlò yin yī-ö, pöi sā inlahen nup anūlö nup töt meūkö,* ngaich höng lök kui u yip tarik nö kiröönköre pön öt akahakūö!”
45 Hē ök tö akahakūö tö minë Chööngö nö hāngö u, ngö ṙô ngaich anga-aṅ: “Mahaköphöti, höng miṙēḵngen ih man öm ngatī ṙô.”
46 Ngö ṙô ngaich ang Yēsū: “Ō më-eṅ tö akahakūö tö minë Chööngö, tötkôlò man më-eṅ inrē, pò meh vī nup chööngö nup tö langan nö in yip tarik, ötrēhěn pöri öm hòṅ lūöltötīre öm in u, öt keunlöre inrē tö u!
47 Tötkôlò man më-eṅ, pò meh öm vī anūlö yik pròfět, yik tö fëli tö yik töng muvöhngö yīö!
48 Akahakūö yī-ö tö nuk la-en yik muvöhngö yīö, sön pöri më-eṅ öm höng vënyen cha nö lööngö la-en, fëlngen yik pròfět cha-a ngaich vīlö nuk anūlö yik pròfět më-eṅ.
49 Lökten ngam Tēv nö löktö i mikah* re nö ngö ṙô: ‘Tīntö yip pròfět chin min hēk tö yip tanīnöṙô inrē nö in yīö, ōt min yip in cha tötlēkaṙen hēk tö fëli inrē,
50 pò nuk mahām yik pròfět tökitaknyu hēten tö ranehlö ngih panam nö havëka min nö in yip tarik in në ṙētak hī töngamuh,
51 tö ngö manah, löktökūö ik mahām Apēl söl in ngam mahām Sakariā, ngam tö fëli nö elhôi ök tahāklö hēk tö ngam chūök vinë-ekūötēv.’ Heūṅ, ngö ṙô Chin tö yīö, ṙôkhöre nup min mahām cha nö havëka nö vē tarik in në ṙētak hī töngamuh.
52 Tötkôlò man më-eṅ tö akahakūö tö ngam Chööngö, pò meh höng in re tī tö ngam chāpi ngam lamöpnyökūö inkūp ngam mikah ngam Tēv, ötrēhěn öm kuhēthötre lātuhēt töm inkūp ngaich yip kumhēthötre ngaich asökngen cha më-eṅ!”
53 Hē Yēsū ngaich nö kunyī-inyre nö ṙā-ang umuh, ngaich fachūlörit ò yik kamūich hēk tö yik Feresī inrē, hatöönan ngaich cha-a tö minë töpōyen intöönö,
54 pön höng hòṅ haṙěinyö nup ṙô ò cha-a nup lamöknyö elvāng ò hòṅ cha nö kē an.
Footnotes
^ Hēk, “hòṅ het nö imat hī; akahakūö tö hanëtö e.”
^ tökētu nö minënyö ngam Satān.
^ Ṙô Krīk, “kuntī.”
^ Ṙô Krīk, “nö ötlöng; ötlöök.”
^ Hēk, “nö ūichtöre nö ik mīs.”
^ Ngam tö ngö, öt söich tīre asā minë la-en kui panam.
^ Hēk, “töṙōlkangen söpchī.”
^ Hēk, “tövai takô.”
^ Hēk, “nup töt minkahngu kui.”
^ Ṙô Krīk, “mikah ngam Tēv.”
