Kahūich Lūkös 12:1-59
-
Inföh aṅ in më Feresī (1-3)
-
Pa-ekūö töm Tēv, ui pa-ekūö tö tarik (4-7)
-
Hamô-en Kristū (8-12)
-
Inchōḵ elmat ngam töt akahaṙa tökôlò tarik (13-21)
-
Ṙangenre yin ui yaha pirūtka (22-34)
-
Kun kiteūm (32)
-
-
Aṅhaṅti yin (35-40)
-
Tökô-en mahalanṙen hēk tötlöök yōm chehen (41-48)
-
Öt vamītö lanāmö, tinṙōlen pöri (49-53)
-
Akahakūö tö manah ngam tö halēniṙen ṙētak (54-56)
-
Halāmtö lanīnö höö (57-59)
12 Hē e angū-ö ṙētak yik tökööinyu tömaṙôngö nö hamūlöre nö umuh, uroh cha-a nö kö rööntö kui höö tö kuö ṙôngöre, ngö ṙô ngaich anga-aṅ nö in yik haköptöre: “Haṙēmngenre yin tö nup inföh* aṅ in yip Feresī, ngam inlahen cha inrē nö hanyatkö elmat.
2 Pön öt hěng min ṙô tö hanyāti nö töt meūkö, hēk öt hěng min ṙô tö hanyunngen nö töt akahka.
3 Lökten nup töng ṙô yīö el sinngūlö, hāngö min anū-ö nö el hanātö, nup töng ṙô yīö öi el uròhò öi siṙös ṙôre, ngaich ahangnyu min anū-ö nö ikui patī.
4 Yī-ö hol chu, ngö ṙô Chin tö yīö, uh yin pa-ekūö tö yip tarik yip tö hòṅ fëlngen ngam alaha, yip tötkanò-òvö nö keuheūtngen e.
5 Vë-eny nang yīö pöri Chū-ö töm tö hòṅ chūök pinhë-eṅkūö yīö. Pa-ekūö yin tö ngam tö mihôiṅ nö fëlngen yīö hēk chööngu inrē nö mihôiṅ nö kavalhöt yīö nö ikūö öp Kehenna.* Hòṅ ngö ṙô Chin tö yīö, pa-ekūö yin tö ò.
6 Röh nup ṙung tö taneui nòng kun chehechōn nö i-inyīhiyö nö nëttāk ṙāi tö pësa,* öt hěnghang nòng pöri in u tö vāichiyö* tö ngam Tēv.
7 Kaheūki nun minë keūyö yīö nö ṙòkhöre. Lökten yin ui pa-ekūö, tön pōiṙāi yin tö nup töṙōl nòng kun chechechōn.
8 ‘’Ngö ṙô pöri Chū-ö tö yīö, ngòh hamô-en chu nö ikūö yip tarik, hō-en ò min ngòh Kūön tarik nö ikūö më ma-ahānga ngam Tēv.
9 Yip samô-en chu pöri nö ikūö yip tömaṙôngö tarik, sō-en ò inrē min chū-ö öich ikūö më ma-ahānga ngam Tēv.
10 Yěn ōt tarik töchōchö ṙô nö i minënyö ngòh Kūön tarik, aṙēlöngö min anga-aṅ, ngòh töchōchö ṙô pöri tö ngam töhet kumlēḵ, öt inṙēlu min anga-aṅ.
11 Yēḵ cha min nö kēten yīö nö ikūö yip tömaṙôngö,* ikūö yip tökiröng òfisör hēk ikūö yip mā mahayöng ngaich ui yaha pinṙūtölōn tö nup ṙô yīö min in cha hēk tö öp inlahen ṙô yīö min öi vë-eny nang cha,
12 pön hē e min ngam töhet kumlēḵ nö haköpten yīö tö nup tö hòṅ ṙahônyö yīö.”
13 Hěngtak ngaich ök aṅ in yik tömaṙôngö tö ngö ṙô nö in ò: “Mahaköphöti, tölṙô öp mëm chu man nö katölhökūö ai tö nup amin ai.”
14 Ngö pöri Yēsū tö ò: “Achīö öp vamīlen chu kamhôṅka anë inrē kamtölhökūö yīö?”
15 Ngö ṙô ngaich anga-aṅ nö in yik tömaṙôngö tarik: “Luvë-akkūö tī yin tö minë matre, ngaich ṙūöhöngre tö nup töng sitih yinikhanga, pön pòrô ngòh tarik nö pōyen aṅ in tö chehen, öthō pöri min minë kanôlò ò nö kētö nômö ò.”
16 Kētö ngih inchōḵ-oṙô hēk anga-aṅ: “Pōyen sanīöpö aṅkūö ök tumlat ök tökôlò tarik.
17 Ngö mufē ngaich anga-aṅ nöng ellōnre lōn, ‘Asuh öp öre tö hòṅ inlahen chu, tön öt chūöku tī chin ngaich tö në ṙòng taneūichre?’
18 Ngö ṙô ngaich anga-aṅ, ʻHěng öp inlahen chu, tiṙōlngö ngih uròhò chin ngaich ṙūöhnyö ṙôkö e, hòṅ chu öich hamūlngö nup ṙòng taneūichre tö nup chehenre öich in e.
19 Ngaich ngö ṙô min öm in re, “Pōyen nun minë chehen aṅ in meh, tö hamūli nö ṙōl samyeuheū, lökten man ngaich haṙamlōnre, nyā, òk inrē.”’
20 Ngö ṙô pöri ngam Tēv nö in ò, ‘Ō më-eṅ töt akaha, i ngih hatööm an min ngam nômö meh nö kē-ěyö nö ṙā-ang in meh. Ngaich nup hamūlngö meh, lumnööṙö chīö min anū-ö?’
21 Ngatī inlahen an min anga-aṅ ngòh tarik, ngòh töng mahamūl kanôlòre, yāich pöri nö imat ngam Tēv.”
22 Ngö ṙô ngaich anga-aṅ nö in yik haköptöre: “Ngö ṙô Chin tö yīö, uh yin piṙūtkö nômöre tö öp nyā-aṅkūö yīö min, ui rēhěn piṙūtkö ngam alahare tö öp kinṙum e min.
23 Tön mööḵlö an ngam nômö ngòh tarik tö ngam nyā-aṅkūö ngaich mööḵlö ngam alaha ò tö ngam hilā.
24 Chumkūöṙen yin tö inlahen ngam kavöö nö öt teūich, öt uvòh, öt rēhěn nö hamūl nya-aṅkūöre nö el uròhò sön ngam Tēv nö hanëlen u. Röh öi yī-ö mööḵlö tö u?
25 Achīö öp öre pumṙūta nö in yīö, öp tökô nö ṙūöhtö rô-òtö nômöre?
26 Lökten yēḵ yīö ötkô öi ngatī inlahen, ngaich kūö yòh öi yahlö pinṙūtölōn tö minë tahëng chehen?
27 Chumkūöṙen yin ngëichkö minë kun pūl* nö sīöp, hö-ö nun nö harëtnyö elmatre, ötrēhěn nö kupāt. Ngö ṙô pöri Chū-ö tö yīö, tö Sòlòmön nö pòrô nö pōyen nuk kanôlò ò, öt rēhěn pöri anga-aṅ nö ngatī inlahen tī nö kafānöre nö sā ṙôken nup kanôlòre.
28 Lökten yēḵ ngam Tēv nö mihôiṅ nö havai chehen minë kun pūl el ngam kahôyö, minë tövai töngamuh ngaich fönghötvö huṙöich nö ikūö tameūiyö, yī-ö tökūöṅnen ṙinatö-ellōn ötkô ang ngam Tēv min nö mööḵlö tī nö chumhënö yīö!
29 Lökten yin ui piṙūta asuh öp min nyā-aṅkūö hī hēk asuh öp min òk hī. Uh yin öi yahlö mufē tö u anū-ö.
30 Höng chahöh vē tarik nun anū-ö vē aṅkūö ngih panam, akahalōn pöri ngam Yöng yīö tö u nö tötṙanāngen nö in yīö.
31 Lökten yin urěhlö* ngam Pūlngö ò ngaich kē-ěkūö yīö min anga-aṅ tö minë tahëng minë tötṙanāngen nö in yīö.
32 Ō yī-ö tö kun kiteūm, uh yin pa-ekūö tön ngaich an ngam yöng yīö nö hō nö kē-ěkūö yīö tö ngam Pūlngö.
33 Lökten yin inyihngö nup chehenre ngaich kē-ěkūö yip yāich* ngaich vī chūök rupīöre tö nup töthō nö hötṙeh, ngam tö ngö manah hamūl kanôlòre el halīöngö minë töthō nö keuheūt, i chūök yip mu-ulāiya nö öt röhta, i chūök nup maneui nö kat inrē.
34 Pön öp chūök nup kanôlò yīö min, in e min öp ellōn yīö.
35 Lökten yin hīnöre öi inmöptechṙat ngaich höng hūkūö inrē nup ëāṅvö yīö.
36 Hòṅ sā inlahen yip tarik yin yip töng hamökkö öp yöngṙenre nö ip hē ò min nö havan nö löktö in ngam inpīhö, hòṅ yīö min ilöö löpnyökūö ò, yēḵ ò min nö kuröngkökūö inkūp.
37 Tö ṙamlōn yip cha-a mahalanṙen, yēḵ öp yöngṙen cha min nöng meūkö cha nöng aṅhaṅti! Tökò-òṙô Chin tö yīö hakôtenre öp min nö hamöplöṙatre ngaich meukṙen cha ngaich ngö ṙô min tö cha, ūichngöre yin nyā* ngaich söktöhëichṙen min anga-aṅ nö meukṙen cha.
38 Ngaich yēḵ ò min nö kôtökūö tö cha nöng aṅhen im innëtö pāt* hēk linūöyö pāt* alaha ngam hatööm, ngaich ṙanamlōn min angū-ö nö in cha.
39 Akahalōn pöri yī-ö tö ngih, yēḵ ngam aṅ patī öre nö akahalōn tö ṙētak yanīhi ngam mu-ulāiya ngaich aṅhaṅti anga-aṅ pön sōḵtö ngam patīre nö tiṙōli.
40 Ngatī inrē yī-ö aṅhaṅti öi lēntöhëichṙen, pön öp hē yīö öt mufē-ěvö tö yanīhi ò, hē e min ngòh Kūön tarik nö yih.”
41 Ngö ṙô ngaich Pītör nö in ò: “Mā, chö-önyten ih öng ngih inchōḵ-oṙô nö vënyu töm, chö-önytö taṙòkhöre ṙöng?”
42 Ngö ṙô ngaich ngam Mā: “Achīö öp ri tökô-en hēk tö akaha* nö yōm chehen,* öp tö hamālöng tö ngam mā nö i patī yip tarik alaha ò, öp tö lööngö ṙētak tī min nö kē-ěkūö cha tö nyā-aṅkūö?
43 Tö ṙamlōn öp min anga-aṅ mahalanṙen yěn meūkö nö ngatī la-en hē yanīhi öp yöngṙenre!
44 Tökò-òṙô chin tö yīö, vīlöng min anga-aṅ nö mahayōm chehen öp yöngṙen ò.
45 Yēḵ ngòh mahalanṙen pöri nö ngö ṙô nö ellōnre, ‘Ha-āṅtö yīhire öp mā chu,’ hēk fël yik mahalanṙen, òk ka-eūt inrē nö hiyōi aṅ,
46 im hē-e min ngam mā ò nö yih, ip sakāmö hē ò nö öt hööka hēk ip ṙētak inrē hē ò nö öt akahalōn tö yanīhi ò, kētu min ngam tökiröng ötinkôlò ò ngaich kavaltu min anga-aṅ nö in yip lama-al.
47 Yēḵ ngam mahalanṙen nöng akahakūö tö ngam kuilōn ngam yöngṙenre, hö-ö pöri nö hīnöre hēk öt kēken u inrē* ngaich fōho min anga-aṅ.
48 Ngòh töt akahalōn pöri mahalanṙen tö kuilōn ngam yöngṙenre, ngaich öt la-evṙen tö u, kūöṅnën nyaha min anga-aṅ nö fōho. Kô-en, yip töpōyen kinë-ěkūö cha-a min tö pōyen invëka kūö, ngaich ngòh töpōyen kinë-ěkūö nö ngëichken minë töpōyen la-en, cha-a min hēk töpōyen invëka kūö.
49 Yamih chin öich kamvaltö tameūiyö ikūö ngih panam, ngaich an ngam tameūiyö nö ha-ehëten nö hūlökūö höng angū-ö an lōn chu.
50 Heūṅ, hěng öp vinôkö tö hòṅ kē-ě tö chu, yēḵ Chu ngaich min öich kē ngih vinôkö ngaich örheūheu min chū-ö kihngen!
51 Sitih lōn öm më-eṅ, yamih Öich tö lōn meh Öich kumtö lanāmö öich ing panam? Hö-ö chin kumtö lanāmö, ngö ṙô pöri Chū-ö tö yīö, tö Chu öich vamī tinṙōlen öich yih.
52 Lökten yip tö taneui tak aṅ öp töng hěng patī nö la-al höö ngaich yip tö lūöi tak nö la-al nap tö nët tak, ngaich nap tö nët tak nö la-al yip tö lūöi tak.
53 La-al ngam kūönre min ngam inyöngö kikōnyö, ngaich ngam kūön min nö la-al ngam inyöngö kikōnyö, ngaich ngam inyöngö kikānö min nö la-al ngam kūönre kikānö, hēk ngam kikānö min nö la-al ngam yöngre kikānö, ngaich ngam yöngpīhö nö la-al ngam kankūönre ngaich ngam kankūön nö la-al ngam yöngpīhöre.”
54 Unôichrit e ngaich anga-aṅ nö ngö ṙô nö in yik tömaṙôngö: “Yēḵ yīö meuk taṙul lamöktö lā sūng, Ilööṙen yī-ö ngö ṙô, ‘kalēḵ öp min kumṙah,’ ngaich ngatī angū-ö.
55 Yēḵ yīö meuk öp kuföt lamöktö lā lòhngö ngaich ngö ṙô yī-ö, ‘Tölngö ṙanāchö öp min,’ ngaich ngatī angū-ö.
56 Yī-ö mahanyatkö elmat, höng meuk kūö ngam panam yin ngaich akahakūö tö inlahen e, kūö yòh pöri yī-ö öt akaha elmat tö manah ngih ṙētak töngamuh?
57 Kūö yòh öi ötkô katöllö nup tölöng inlahenre?
58 Sā ngih inchō elmat, yěn ōt tö hòṅ kahôkken meh nö chuh kūö yip mā mahayöng ngaich el talöökö më-eṅ öm halāman, hòṅ meh min öt kētu in öp kamhôṅka ngaich ngam kamhôṅka min nö kēten meh nö eltī ngam amahati ngaich anga-aṅ min nö chaphöt meh öm el chēl.
59 Tökò-òṙô Chin tö meh, pöm öthō min öm ṙānyu öm ṙā-ang el chēl hanöng saha meh öt keuheūtnyöre tī tö ṙāi* re.”
Footnotes
^ Ṙô Krīk, “tö aföhlöng ròtī.”
^ Ṙô Krīk, “Nët Asāriön.” Ngëichköm Tahëng Ātiköl B14.
^ Hēk, “töt ngëichka.”
^ Hēk lohten, “nö i chūök patī vamë-ekūötēv.”
^ Hēk, “lilī.”
^ Hēk, “iṙūöhen chöh.”
^ Hēk, “ūichtöre ing mīs.”
^ Löktö kūö im tö 9 köṅnyṙô tö hatööm söl im chūöl hatööm
^ Löktökūö im chūöl hatööm söl im tö 3 köṅnyṙô tö peuheū
^ Hēk, “hamôltö mikah elmatre nö la-evṙen.”
^ Hēk, “ngamëichken minë la-en el patī.”
^ Hēk, “öt hateungngö nup kuilōn ò inrē.”
^ Hēk, “manā-aṅ lëptôn.” Ngëichköm Tahëng Ātiköl B14.
